Сістэма адукацыі Гродзенскай вобласці па выніках работы за мінулы год прызнана лепшай у краіне. Асноўным пасылам даклада начальніка галоўнага ўпраўлення адукацыі Гродзенскага аблвыканкама А.Г.Сонгіна сталі задачы, мэты і праблемы сістэмы адукацыі і шляхі іх вырашэння ў 2019 годзе.
Тры галоўныя задачы сістэмы дашкольнай адукацыі — гэта захаванне здароўя дзяцей, стварэнне бяспечных умоў іх знаходжання і забеспячэнне кваліфікаванымі кадрамі. У мінулым годзе былі ўведзены чатыры новыя дзіцячыя садкі. Працягнутая работа па вяртанні функцыянальнага прызначэння памяшканняў і рацыянальным іх выкарыстанні дала магчымасць адкрыць да новага навучальнага года дадаткова 616 месцаў. У гэтым годзе будуць уведзены яшчэ два новыя дзіцячыя садкі. Актуальным застаецца пытанне кваліфікацыі спецыялістаў дашкольнай адукацыі: 70 працэнтаў выхавальнікаў не маюць вышэйшай адукацыі па профілі “Педагогіка”.
Высокія вынікі на цэнтралізаваным тэсціраванні і рэспубліканскай алімпіядзе па вучэбных прадметах навучэнцы Гродзеншчыны дэманструюць не адзін год. Вялікай увагі і адпаведнай работы патрабуе ўдзел у навукова-практычных канферэнцыях.
— Для таго каб утрымаць высокую планку ў гэтых пытаннях, трэба адпрацаваць арганізацыю круглагадовай падрыхтоўкі да алімпіяды як у вочнай, так і ў дыстанцыйнай форме. У Гродзенскім абласным інстытуце развіцця адукацыі ў найбліжэйшы час будзе створаны аддзел па арганізацыі работы з адоранымі навучэнцамі, — падкрэсліў Аляксандр Генрыхавіч.
Аналіз работы метадычных службаў па арганізацыі ўдзелу ў рэспубліканскай навукова-практычнай канферэнцыі, а таксама па павышэнні якасці прадметнага выкладання будзе зроблены на пасяджэнні калегіі ў чэрвені гэтага года.
Вырашэння патрабуе стварэнне цэнтраў дапрызыўнай падрыхтоўкі. Нядаўна пяты цэнтр адкрыты ў Мастах, а вось у Гродне гэтая работа яшчэ не завершана. На калегіі была вызначана дата канчатковага вырашэння пытання — да 1 верасня.
Плануецца, што да дзвюх устаноў, дзе кітайская мова вывучаецца як вучэбны прадмет, у новым навучальным годзе дабавяцца новыя. А ўвогуле ў Гродзенскай вобласці кітайскую мову вывучаюць амаль 700 дзяцей у 14 навучальных установах.
Дзейнасць сістэмы прафесійнай адукацыі ў мінулым годзе была накіравана на вырашэнне галоўнай задачы — дасягненне максімальнай адпаведнасці рынку адукацыйных паслуг і рынку працы. Быў прыпынены прыём па 18 спецыяльнасцях і адкрыты па 11 новых. У вобласці працуюць 5 рэсурсных цэнтраў. Пяты рэсурсны цэнтр, дзе будуць праходзіць навучанне кухары і кандытары, пачаў зусім нядаўна дзейнічаць у Гродзенскім дзяржаўным прафесійным тэхналагічным каледжы. Удзельнікі пасяджэння калегіі мелі магчымасць перад яго пачаткам азнаёміцца з рэсурсным цэнтрам і пабываць на майстар-класах пераможцаў конкурсаў прафесійнага майстэрства WorldSkills 2016—2018 гадоў у намінацыі “Кандытарскае мастацтва” майстра вытворчага навучання Златы Шпак і навучэнкі каледжа Аляксандры Васільчык.
У маі мінулага года гродзенцы на конкурсе прафесійнага майстэрства WorldSkills заваявалі 17 медалёў (сярод іх 6 залатых) і паказалі другі вынік пасля Мінска.
Цікавасць выклікала і выстава, прысвечаная прафесійнай падрыхтоўцы старшакласнікаў, якія не ахоплены профільным навучаннем. Па 35 спецыяльнасцях каля 2 тысяч вучняў 10-х класаў атрымліваюць рабочую спецыяльнасць на базе ўстаноў агульнай сярэдняй і прафесійнай адукацыі, а таксама дадатковай адукацыі.
— У выхаваўчай рабоце прынятыя меры па арганізацыі занятасці дзяцей, прафілактыцы правапарушэнняў далі станоўчыя вынікі. У 2018 годзе колькасць правапарушэнняў з удзелам непаўналетніх знізілася на 30,8%. Упершыню за тры гады дасягнута скарачэнне сацыяльнага сіроцтва, — паведаміў Аляксандр Генрыхавіч. — Са студзеня гэтага года пачаў работу абласны сацыяльна-педагагічны цэнтр.
Ужо сёння вырашаюцца пытанні па аздараўленні дзяцей у летні перыяд. Планамі гэтага года прадугледжана аздараўленне звыш 66 тысяч дзяцей, што амаль на 7 тысяч больш, чым у мінулым годзе. Пастаўлена задача, каб профільныя лагеры або лагеры працы і адпачынку функцыянавалі на базе кожнай установы прафадукацыі.
У год святкавання 75-годдзя вызвалення Беларусі ад нямецка-фашысцкіх захопнікаў асаблівая ўвага будзе ўдзяляцца валанцёрскаму руху. Сумесна з абласной газетай рэалізоўваецца абласны праект “Фота для ветэрана”, які дазволіць захаваць у фота- і відэаматэрыялах успаміны ветэранаў Вялікай Айчыннай вайны, іх жыццёвыя гісторыі. Пастаўлена задача да 1 красавіка завяршыць работу па алічбоўцы музейных фондаў усіх устаноў адукацыі і падрыхтаваць новыя экспазіцыі, прысвечаныя юбілейным падзеям гэтага года.
У дакладзе начальніка галоўнага ўпраўлення адукацыі ўвага была звернута і на нарматыўнае фінансаванне ўстаноў адукацыі. Са студзеня 2019 года на такое фінансаванне перайшлі ўсе 334 установы агульнай сярэдняй адукацыі вобласці. Пілотны праект па апрабацыі нарматыўнага фінансавання рэалізоўваецца ў 60 дашкольных установах Лідскага і Слонімскага раёнаў.
— 2019 год папярэднічае ўкараненню нарматыўнага фінансавання ва ўстановах дашкольнай адукацыі ўсёй вобласці, — падкрэсліў А.Г.Сонгін. — У сувязі з гэтым да 1 студзеня 2020 года неабходна прааналізаваць адхіленне выдаткаў па нарматыве ў адносінах да прадугледжаных у бюджэтах на ўстановы дашкольнай адукацыі, выявіць прычыны адхіленняў і прыняць меры па іх мінімізацыі.
У абмеркаванні даклада прынялі ўдзел дырэктар сярэдняй школы № 1 Анатоль Фаносаў (ён расказаў, як у школе ствараюцца ўмовы для фарміравання сацыяльна актыўнай асобы) і дырэктар Гродзенскага дзяржаўнага прафесійнага ліцэя будаўнікоў № 1 Алена Жалязняковіч (прадставіла бачанне шляхоў удасканалення функцыянавання ўстаноў прафесійнай адукацыі ва ўмовах сучаснага рынку працы).
У рабоце калегіі прынялі ўдзел дырэктар Дэпартамента кантролю якасці адукацыі Міністэрства адукацыі Рэспублікі Беларусь Міхаіл Мірончык, намеснік старшыні Гродзенскага аблвыканкама Віктар Лісковіч, намеснік старшыні Пастаяннай камісіі Палаты прадстаўнікоў Нацыянальнага сходу Рэспублікі Беларусь па адукацыі, культуры і навуцы Аляксандр Сягоднік, начальнік упраўлення Камітэта дзяржаўнай бяспекі па Гродзенскай вобласці Аляксандр Невяроўскі, намеснік начальніка ўпраўлення ўнутраных спраў аблвыканкама — начальнік міліцыі грамадскай бяспекі Валянцін Асіповіч, начальнік упраўлення кантролю бюджэтна-фінансавай сферы Камітэта дзяржаўнага кантролю Гродзенскай вобласці Таццяна Слабыш, старшы памочнік пракурора вобласці Святлана Нанкевіч.
— Сістэма адукацыі складаецца з многіх кампанентаў — пачынаючы з дашкольнай адукацыі і заканчваючы вышэйшай, — падкрэсліў В.А.Лісковіч. — Нам трэба навучыць чалавека думаць, захаваць яму здароўе, прыцягнуць яго да сацыяльна карыснай працы.
Дасягненні сістэмы адукацыі Гродзеншчыны ў многіх галінах і высокі яе патэнцыял адзначыў М.У.Мірончык, які ўручыў падзяку Міністэрства адукацыі В.А.Лісковічу. Падзякі галоўнага ўпраўлення адукацыі былі ўручаны прадстаўнікам арганізацый і ўстаноў, якія цесна супрацоўнічаюць з сістэмай адукацыі.
На пасяджэнні калегіі былі падведзены вынікі абласнога конкурсу на лепшую арганізацыю работы. Сярод пераможцаў — упраўленні адукацыі Лідскага і Мастоўскага раёнаў, Гродзенскі дзяржаўны політэхнічны каледж, Гродзенскі дзяржаўны прафесійны ліцэй будаўнікоў № 1, Гродзенскі дзяржаўны прафесійны тэхналагічны каледж, Гродзенскі дзяржаўны абласны эколага-біялагічны цэнтр дзяцей і моладзі.
Надзея ВАШКЕЛЕВІЧ.
Фота Яна ХВЕДЧЫНА.