Знаходзіць агульную мову і выходзіць на пазітыўны вынік

Прэзідэнт Беларусі Аляксандр Лукашэнка сустрэўся з украінскім дзяржаўным і палітычным дзеячам трэцім прэзідэнтам Украіны (2005—2010 гады) Віктарам Юшчанкам.

“Ёсць шмат праблем, якія я гатовы з вамі абмеркаваць, у тым ліку па пазіцыі Украіны ў СНД. Як вядома, Украіна фактычна заявіла аб выхадзе, але афіцыйна гэтага яшчэ не здарылася. І на апошнім саміце ў Душанбэ ўкраінскі сцяг прысутнічаў, як заўсёды. Я так разумею, што гэта працэс не аднаго дня. Напэўна, і Украіне парываць усялякія сувязі з нашымі дзяржавамі паасобку і ў цэлым з СНД нявыгадна. Таму будзе нейкі працэс. Мой пункт гледжання вы ведаеце. Я заўсёды гаварыў аб тым, што выйсці прасцей, чым потым увайсці, калі трэба будзе. Але гэта суверэнная справа Украіны, мы вымушаны з гэтым лічыцца”, — сказаў беларускі лідар.

“Па падзеях ва Украіне вы маю пазіцыю ведаеце. Мы ні ў якім разе не хочам умешвацца ў падзеі ва Украіне. Груба кажучы, гэта не наша справа, калі нас не просяць. Хоць, сумленна скажу, — мы аб гэтым пагаворым — уплыў падзей ва Украіне на нас вельмі вялікі. Асабліва нас непакоіць, прыток зброі праз украінскую граніцу. Вельмі шмат мы канфіскуем зброі”, — адзначыў кіраўнік дзяржавы.

Паводле яго слоў, выяўляюцца факты, калі зброя ідзе ў Беларусь з Украіны праз Расію. “Калі крымінальныя справы расследуюцца, мы таксама такія факты фіксуем. І я Прэзідэнту Расіі аб гэтым гаварыў. Вось гэта нас больш за ўсё непакоіць”, — заявіў Прэзідэнт Беларусі.

“Але магло б быць значна горш. І калі ўжо шчыра гаварыць, няма такой азлобленасці ў адносінах да беларусаў з боку ўкраінцаў. Няма гэтага сутыкнення народнага меркавання. Вось гэта самае галоўнае. Гэта абнадзейвае. Гэта аснова нашых добрых адносін, — адзначыў Аляксандр Лукашэнка. — Праблем шмат, і я гатовы іх абмеркаваць”.

Закранаючы двухбаковыя адносіны Беларусі і Украіны, кіраўнік дзяржавы ўспомніў і пра час прэзідэнцтва Віктара Юшчанкі. “Калі параўноўваеш цяперашні час… Я ўжо не толькі гавару пра Украіну і Беларусь, — і нашы ўзаемаадносіны на постсавецкай прасторы. Вядома, гэта быў не горшы час, асабліва паміж нашымі дзяржавамі. Мы пры ўсіх адрозненнях, розных пунктах гледжання заўсёды знаходзілі нейкі кансэнсус і выбудоўвалі нашы адносіны, — заявіў Аляксандр Лукашэнка. — І гэта тычыцца не толькі нас. Як бы ні было складана, і з Расійскай Федэрацыяй знаходзілі агульную мову, узаемапрымальную, і з іншымі дзяржавамі. Усяляк было, але ў цэлым заўсёды мы выходзілі на пазітыўны вынік. І па тавараабароце мы тады высокімі тэмпамі раслі. Хоць і цяпер у нас крыўдзіцца няма на што — прырост тавараабароту 20—30 працэнтаў. Дарэчы, у СНД яшчэ вышэйшы. Другі год такі рост адбываецца. Было сур’ёзнае падзенне, а цяпер салідны рост і ў Еўразійскім эканамічным саюзе, і ў СНД у цэлым. Тое ж самае адбываецца і з Украінай”.

У сваю чаргу Віктар Юшчанка адзначыў, што ў яго разуменні двухбаковыя адносіны з Беларуссю заўсёды былі ідэальнымі і на палітычным узроўні, і на народным. “Мы заўсёды знаходзілі ўзаемаразуменне па самых складаных пытаннях. Цяпер тое, што адбываецца не толькі ва Украіне, я згодны, — гэта вялікае выпрабаванне, гэта вялікая праблема для ўладкавання і нашага жыцця як нацыі, краіны, і суседзяў, і Еўропы”, — адзначыў экс-прэзідэнт Украіны.

Паводле яго слоў, з аднаго боку, ва Украіне людзі сталі больш кансалідаваныя, чым, напрыклад, 5—10 гадоў назад. “Мы працягнулі адзін аднаму руку больш, чым калі-небудзь, больш стала адзінства”, — сказаў ён.

З другога боку, Віктар Юшчанка адзначыў складанасць тэрытарыяльнага пытання, падкрэсліўшы, што простага аднакампанентнага рашэння не можа быць знойдзена. “Відавочна, размова ідзе пра доўгатэрміновы працэс”, — лічыць экс-прэзідэнт.

Ён канстатаваў, што на фоне ўсіх падзей, якія адбываюцца, унутрыпалітычнае жыццё ва Украіне таксама складанае, паколькі ёсць шмат бакоў, якія хочуць нешта ўзяць з кантэксту і на гэтым рабіць палітыку. Віктар Юшчанка выказаў меркаванне, што па гэтай прычыне на маючых адбыцца ва Украіне прэзідэнцкіх выбарах можа быць самая вялікая колькасць кандыдатаў у гісторыі краіны. Ён адзначыў, што вострая ўнутрыпалітычная дыскусія часта не працуе на стабілізацыю, але ўкраінскі народ праходзіць вельмі важную нацыянальную школу.

Пакінуць каментарый

Ваш электронны адрас не будзе апублікаваны. Абавязковыя палі пазначаны *