Зрабіць разлікі ў інтэрнэце больш абароненымі

Міністэрства ўнутраных спраў звярнулася да Нацыянальнага банка з прапановай аб паляпшэнні бяспекі інтэрнэт-плацяжоў. Такая інфармацыя размешчана на сайце МУС.

У Беларусі назіраецца рост колькасці крадзяжоў грошай з выкарыстаннем камп’ютарнай тэхнікі. За 5 месяцаў бягучага года органы ўнутраных спраў зарэгістравалі больш за 1,3 тысячы такіх злачынстваў. Гэта амаль на 90 працэнтаў больш, чым за аналагічны перыяд мінулага года. Часцей пачалі фіксавацца супрацьпраўныя дзеянні, учыненыя пры дапамозе скампраметаваных рэквізітаў банкаўскіх плацежных картак.

Знізіць колькасць злачынных замахаў і зрабіць разлікі ў інтэрнэце больш абароненымі, на думку праваахоўнікаў, дасць магчымасць абавязковае для ўсіх інтэрнэт-плацяжоў з выкарыстаннем рэквізітаў банкаўскіх картак прымяненне такіх тэхналогій бяспекі, як 3-D Secure, Verified by Visa, Mastercard SecureCode і “Інтэрнэт Пароль”. МУС звярнулася з прапановай да Нацыянальнага банка Беларусі распрацаваць абавязковыя тэхнічныя патрабаванні па выкарыстанні гэтых тэхналогій усімі банкамі краіны, а таксама прадугледзець іншыя спосабы забеспячэння бяспекі пры інтэрнэт-плацяжах.

“Асноўнымі прычынамі з’яўляюцца даверлівасць грамадзян, іх недасведчанасць аб спосабах абароны пры інтэрнэт-плацяжах і неабходнасці захоўвання ў тайне плацежных рэквізітаў”, — адзначыў намеснік начальніка ўпраўлення па раскрыцці злачынстваў у сферы высокіх тэхналогій МУС Уладзімір Зайцаў. На яго думку, усім зацікаўленым органам важна сканцэнтраваць намаганні на прафілактычнай рабоце ў гэтым напрамку і актыўна інфармаваць насельніцтва аб рызыках, звязаных з раскрыццём рэквізітаў плацежных картак.