Светлагорскім школьнікам у рамках акцыі “Мы — грамадзяне Беларусі!”, прысвечанай Дню Канстытуцыі, уручылі нацыянальныя пашпарты, паведамляе карэспандэнт “Настаўніцкай газеты”.
Старшыня суда Светлагорскага раёна Віталь Каўбеня і метадыст Светлагорскага раённага вучэбна-метадычнага кабінета Святлана Жураўская падзялілі са школьнікамі радасць урачыстага моманту
Напярэдадні важнага свята — Дня Канстытуцыі — адбылася адна з унікальных падзей у жыцці юных грамадзян — урачыстае ўручэнне пашпартоў. Гэтая цырымонія другі год запар праходзіць у будынку суда Светлагорскага раёна, што наглядна дэманструе аб’яднанне трох галін улады: заканадаўчай, выканаўчай і судовай. 20 самых актыўных і таленавітых юнакоў і дзяўчат, якія дасягнулі 14-гадовага ўзросту, атрымалі галоўны дакумент. Цяпер яны паўнапраўныя грамадзяне сваёй Радзімы. І гэты момант для іх вельмі адказны — маладыя людзі ўсведамляюць, што на іх ускладзены вялікія абавязкі перад дзяржавай і сваім народам.
Шчырыя словы віншавання гучалі ад начальніка аддзела адукацыі Светлагорскага райвыканкама Жанны Чэркас:
— Упэўнена, што наша сустрэча напярэдадні Дня Канстытуцыі запомніцца вам надоўга. Кожны з вас — гордасць і надзея на светлую будучыню раёна, вобласці, рэспублікі. Прыемна назіраць за тым, як моладзь дабіваецца высокіх вынікаў, усімі сіламі садзейнічае росквіту Беларусі. Заўсёды ганарыцеся Радзімай, будзьце патрыётамі — і ўсё ў вас атрымаецца! Я з упэўненасцю магу сцвярджаць, што ў нас падрастае пакаленне дастойных грамадзян нашай краіны.
Акцыя “Мы — грамадзяне Беларусі!” прызвана акцэнтаваць увагу моладзі на такой важнай падзеі, як атрыманне пуцёўкі ў дарослае жыццё, на ўсведамленні сэнсу, значнасці сваёй дзейнасці як грамадзяніна.
Дакумент атрымалі школьнікі, якія праявілі сябе ў вучобе, у прыватнасці, у алімпіядным руху, культурным, спартыўным і грамадскім жыцці рэгіёна. Яны пераможцы конкурсаў і спаборніцтваў рознага ўзроўню. У іх ліку — навучэнец гімназіі Цімур Шкабераў — пераможац абласнога этапу Рэспубліканскай алімпіяды па біялогіі, адкрытай гімназічнай алімпіяды “Куб”.
Для навучэнкі сярэдняй школы № 10 Светлагорска імя С.Л.Краснапёрава Марыі Родзінай момант уручэння пашпартоў вельмі хвалюючы. Яна ўваходзіць у савет старшакласнікаў сваёй установы адукацыі, прымае актыўны ўдзел у розных мерапрыемствах і конкурсах, скончыла аддзяленне харэаграфіі школы мастацтваў, з’яўляецца карэспандэнтам маладзёжнай рэдакцыі “New FISHкі”. Акрамя таго, дзяўчына — пераможца міжнароднага конкурсу па інфарматыцы і вылічальнай логіцы “Бабёр-2019”. На раённым этапе рэспубліканскага конкурсу лідараў “Супертройка” заваявала дыплом І ступені. У адкрытым конкурсе дзіцячай і юнацкай творчасці “На пачатку дарог” да 140-годдзя Якуба Коласа атрымала дыплом III ступені.
Васьмікласнік сярэдняй школы № 12 імя І.Р.Катлярова Уладзіслаў Мішчанка — пераможац абласнога конкурсу-выставы ROBOATRIUM у намінацыях “Робаты-памочнікі” і “Прамысловыя робаты”, адкрытага турніру “Выратаванне марскіх насельнікаў. LEGO-алімпіяда”, а таксама рэспубліканскай канферэнцыі навучэнцаў “Першы крок у навуку”, абласнога этапу рэспубліканскага праекта “100 ідэй для Беларусі”. Юнак падкрэсліў, што пасля атрымання пашпарта пачынаецца новая старонка яго жыцця і ён будзе імкнуцца прыкласці ўсё намаганні, каб яна атрымалася яркай і плённай.
Соф’я Шафарэнка, якая вучыцца ў сярэдняй школе № 11, падзялілася, што, з аднаго боку, трымаючы ў руках галоўны дакумент, яна адчувае сябе больш упэўнена, а з другога — разумее сваю адказнасць за будучыню Беларусі:
— Не сумняваюся, што наперадзе мяне чакаюць новыя поспехі і дасягненні. Шчыра кажучы, гэты дзень запомню на ўсё жыццё: вельмі хвалююча і адначасова ганарова.
Юныя светлагорцы адзначылі, што атрыманне галоўнага дакумента — гэта першы крок у дарослае жыццё, які дае шырокія правы, але разам з тым накладвае і немалыя абавязацельствы. Школьнікі паабяцалі шанаваць і паважаць законы нашай дзяржавы і быць дастойнымі грамадзянамі Беларусі.
Алена КАСЬЯН-ПАЎЛЯНКОВА
Фота аўтара
