Падрыхтоўку да новага навучальнага года і шэраг іншых надзённых тэм міністр адукацыі Андрэй Іванец абмеркаваў з педагагічнай грамадскасцю Клімаўшчыны, паведамляе карэспандэнт “Настаўніцкай газеты”.
У рамках адзінага дня інфармавання міністр падрабязна азнаёміўся з матэрыяльнай базай навучальных устаноў раёна. Першым пунктам у маршруце стала Барсукоўская базавая школа. Установа малакамплектная: у верасні вучобу працягнуць 36 вучняў і 9 дашкалят. Стараннямі педагагічнага калектыву школа ўжо гатова да сустрэчы з навучэнцамі.
— Цалкам замянілі ўсе драўляныя аконныя блокі на сучасныя, адрамантавалі вучэбныя кабінеты, спартыўную і актавую залы, тэхналагічна пераабсталявалі харчаблок, добраўпарадкавалі прылеглую тэрыторыю. Плошча нашага ўчастка — больш за гектар. У падтрыманні парадку дапамагаюць вучні. Улетку яны даглядаюць расліны і кветнікі. Увогуле, у перыяд канікул у школе не перастаюць гучаць дзіцячыя галасы. Для навучэнцаў функцыянаваў аздараўленчы лагер. Рэгулярна хлопцы і дзяўчаты прыходзяць на спартыўныя пляцоўкі і стадыён, дзе для іх праводзяцца гульнявыя праграмы, — расказала дырэктар Ірына Анціпенка.
Цікавае лета арганізавалі для вучняў і ў сярэдняй школе № 1 Клімавіч. Лагеры розных профіляў, спартыўныя спаборніцтвы, забаўляльныя мерапрыемствы загартоўвалі і зараджалі дзяцей пазітыўнымі эмоцыямі. Зараз ва ўстанове чакаюць дзяцей, якія адпачылі і набраліся сіл. Да пачатку новага навучальнага года тут падрыхтаваліся загадзя, бо рамонт быў толькі касметычны.
— Некалькі гадоў назад у нас адбылася мадэрнізацыя. Школа істотна змянілася як знешне, так і ўнутрана. Былі капітальна адрамантаваны фасад, сцены, падлога, майстэрні і спартзала. Да ўсяго гэтага ставімся беражліва, таму і рамонт сёлета быў мінімальным. Знакавым стала абнаўленне столі ў фае, афарбоўка сцен на ўсіх паверхах і цокаля па перыметры будынка. На школьным двары з’явіліся новыя лавачкі і тратуарная плітка, — паведаміла дырэктар Алена Маскалёва.
На стадыі завяршэння рамонтныя работы і ў 4-й гарадской школе. Установа таксама не так даўно была мадэрнізавана. Сёлета калектыў зрабіў упор на перааснашчэнне сталовай: у абедзеннай зале абнавілі мэблю, у харчаблок паставілі неабходную тэхніку. Сучаснае абсталяванне цяпер ёсць у майстэрнях па працоўным навучанні, на стадыёне зроблена бегавая дарожка, а на тэрыторыі размясціўся шэраг прыгожых клумб і малых архітэктурных форм.
— Зараз ва ўстановах адукацыі гарачая пара. Ідзе фінальны этап падрыхтоўкі да новага навучальнага года. У Клімавіцкім раёне праведзена вялікая работа ў гэтым кірунку. Пытанні падрыхтоўкі трымаюцца на кантролі па ўсёй краіне. Да 20 жніўня школы павінны атрымаць пашпарты гатоўнасці. Да 1 верасня школы будуць прыведзены ў належны стан. Бацькі могуць быць упэўнены: дзеці знаходзяцца ў надзейных руках і атрымаюць добрую адукацыю і выхаванне, — адзначыў Андрэй Іванец.
Абмеркаванне прыярытэтаў работы ў новым навучальным годзе адбылося на базе Клімавіцкага дзяржаўнага аграрнага каледжа. Тут міністр адукацыі сустрэўся з кіраўніцтвам навучальных устаноў і педагогамі раёна. Акрамя арганізацыі вучэбнага працэсу, у рамках дыялогу шмат гаварылі аб значнасці выхаваўчай работы.
— Сёння педагог павінен умець разгледзець дзіця, але не толькі ў плане яго здольнасцей па вучэбных прадметах. Неабходна ўбачыць у вучню асобу і развіваць яе. Больш увагі трэба ўдзяляць навучэнцам з АПФР, якія маюць асаблівыя адукацыйныя патрэбы. Усе нашы дзеці павінны атрымаць прафесію і пуцёўку ў жыццё, — заўважыў Андрэй Іванец.
Размаўляючы з педагогамі, Андрэй Іванавіч зрабіў акцэнт на ўзаемадзеянні з сям’ёй, прафілактыцы сямейнай нядобранадзейнасці, ахове правоў дзяцінства. Дасканала было разгледжана пытанне забеспячэння ўстаноў адукацыі педагагічнымі кадрамі.
— Матэрыяльна-тэхнічная база, вучэбна-метадычнае забеспячэнне — значны аспект. Але ключавая фігура ў сістэме адукацыі — настаўнік, — падкрэсліў міністр.
Паводле яго слоў, у новым навучальным годзе запланавана ўдасканаленне функцыянавання педагагічных і ўвогуле ўсіх класаў прафесійнай накіраванасці. Яны будуць замацаваны за канкрэтнымі ўніверсітэтамі. Штомесяц будуць арганізаваны выезды ва ўстановы адукацыі або на прадпрыемствы рэальнага сектара эканомікі. Гэта дазволіць зрабіць заняткі больш практыка-арыентаванымі, а прафесійны выбар вучняў — больш свядомым.
У ходзе размовы не раз падкрэслівалася: у Год якасці перад адукацыйнай сферай стаіць задача павышэння якасці адукацыі на ўсіх узроўнях. Але не менш важным застаецца выхаванне. Галоўнае для навучальных устаноў — выгадаваць кожнае дзіця сумленным чалавекам, грамадзянінам, патрыётам.
Ганна СІНЬКЕВІЧ
Фота аўтара
