У дзяцей асаблівая эмацыянальная сувязь з тым месцам, дзе яны нарадзіліся. З гэтай прычыны выхоўваць патрыятызм, духоўнасць і грамадзянскасць лепш за ўсё не на абстрактных ідэалах, а на блізкіх і зразумелых навучэнцам прыкладах. Такога меркавання прытрымліваецца педагагічны калектыў Ленінскай сярэдняй школы Краснапольскага раёна. Падрабязнасці — у матэрыяле карэспандэнта “Настаўніцкай газеты”.
— Вакол нашай навучальнай установы размешчана мноства гістарычных помнікаў. З вёскі Леніна паходзіць нямала вядомых людзей, выбітных працаўнікоў і абаронцаў Айчыны. Багаты краязнаўчы матэрыял настаўнікі ўсебакова інтэгруюць у адукацыйны працэс, — пачала размову намеснік дырэктара Жанна Сокалава.
Паводле яе слоў, рэгіянальны кампанент шырока выкарыстоўваецца педагогамі ў структуры ўрокаў і на пазакласных мерапрыемствах. Падмогай у гэтай справе служыць школьны музей, дзе сабраны ўнікальныя экспанаты аб гісторыі Краснапольшчыны.
— Сёлета мы завяршылі рэалізацыю рэспубліканскага інавацыйнага праекта, які быў накіраваны на фарміраванне эмацыянальна-каштоўнасных адносін навучэнцаў да гераічнага мінулага беларускага народа праз выкарыстанне гісторыка-культурнай спадчыны рэгіёна. Інавацыя матывавала настаўнікаў да ўдасканалення выхаваўчай работы. Акцэнт зрабілі на далучэнні дзяцей да праектнай, даследчай і пошукавай дзейнасці, — працягнула Жанна Міхайлаўна.
Вывучэнне роднага краю захапіла ўсіх вучняў школы — з 1 па 11 клас. Разам з педагогамі дзеці здзяйснялі паходы і экскурсіі па наваколлі вёскі. У ходзе даследаванняў навучэнцы дэталёва вывучылі традыцыі, звычаі, абрады сваіх продкаў. Вынікам падарожжаў стала складанне турыстычнага маршруту “У госці да радзімічаў”.
— Вандроўка дапамагае азнаёміцца з археалагічнымі помнікамі Ленінскага сельскага савета: наглядна ўбачыць курганныя могільнікі перыяду неаліту, старажытнае гарадзішча, рэшткі сярэдневяковай сядзібы памешчыка, ландшафтны заказнік. Адметна, што наш маршрут размешчаны на інтэрактыўнай карце Рэспубліканскага цэнтра экалогіі і краязнаўства, — адзначыла Жанна Сокалава.
Акрамя таго, у школе распрацавалі шэраг тэматычных праектаў. Дзеці даследавалі тапаніміку роднай вёскі, гаючыя крыніцы на тэрыторыі раёна. Знакавым стаў праект “Сялянскі побыт беларусаў: повязь сучаснага і мінулага”, які разам з вучнямі ажыццявіла настаўніца пачатковых класаў Святлана Шамянкова.
— Вывучэнне народных традыцый — першасны аспект у станаўленні патрыятызму. Але тут нельга абмяжоўвацца матэрыялам з падручнікаў. Патрэбны больш творчыя і даступныя для дзіцячага ўспрымання формы падачы інфармацыі. Менавіта таму ўзнікла ідэя стварэння відэаэкскурсу па старадаўняй сялянскай хаце з адсылкай да сучаснасці. Разам з дзецьмі мы ўбачылі бажніцу, покуць, калаўрот, матавіла. А пасля даведаліся, для чаго ўжываліся гэтыя прадметы, ці ёсць яны ў дамах цяперашняга пакалення беларусаў. Атрыманыя звесткі прэзентавалі ў фармаце займальнага відэароліка, — расказала Святлана Сцяпанаўна.
Шмат даследаванняў педагогі і вучні прысвяцілі падзеям Вялікай Айчыннай вайны.
Імі была створана настольная гульня “Піянеры-героі” і праект “Памяць мацнейшая за час”, дзе прадстаўлены біяграфіі, апісанне подзвігаў і жыццёвага шляху юных удзельнікаў вайны — ураджэнцаў Краснапольшчыны.
— У рамках інавацыі наш педагагічны калектыў распрацаваў разнастайны метадычны інструментарый: сцэнарыі ўрокаў, заняткаў на базе музея, выхаваўчых мерапрыемстваў. Зараз матэрыялы праходзяць экспертызу, пасля будуць распаўсюджаны ў адпаведным друкаваным зборніку. Укараненне рэгіянальнага кампанента ў навучанне будзем працягваць. У гэтай справе знаходзім істотную падтрымку з боку бацькоў навучэнцаў і сацыякультурных устаноў аграгарадка. Такое адзінства ў выхаванні вельмі важна, бо прывіць дзецям правільныя каштоўнасці і арыенціры можна толькі сумеснымі намаганнямі, — запэўніла Жанна Сокалава.
Ганна СІНЬКЕВІЧ
Фота аўтара
