Апошні дзень работы аздараўленчага лагера “ЭКАстыль” Баравікоўскай сярэдняй школы Светлагорскага раёна запомніўся паездкай у Мінск.
Экскурсія стала магчымай дзякуючы садзейнічанню дэпутата Палаты прадстаўнікоў Нацыянальнага сходу Рэспублікі Беларусь Ігара Паўлавіча Таўтына і падтрымцы генеральнага дырэктара ААТ “СветлагорскХімвалакно” Васіля Васільевіча Касцюкевіча. Яшчэ напярэдадні Дня Перамогі ва ўстанове прайшоў урок памяці “Нам гэты мір завешчана берагчы”. Пачэсным госцем тады стаў Ігар Паўлавіч Таўтын. Ён падзяліўся “старонкамі памяці” сваёй сям’і ў летапісе Вялікай Айчыннай і прапанаваў дзецям прыехаць на яго непасрэднае месца работы.
Прайшло паўтара месяца падрыхтоўкі. І вось нам пашчасціла наведаць Палату прадстаўнікоў. Там мы пабывалі ў кабінеце дэпутата. Здавалася б, звычайны кабінет, але… адзін з тэлефонаў — з дадатковай ступенню абароны. Цікава. Нам далі агульную інфармацыю аб складзе палаты, крытэрыях кандыдатаў для выбрання ў дэпутаты, азнаёмілі з гісторыяй і прынцыпамі работы, асноўнымі кампетэнцыямі дэпутатаў, некаторымі тонкасцямі заканатворчасці. У Авальнай зале кожны на хвілінку стаў больш дарослым. Мы ўбачылі, дзе праходзяць пасяджэнні, нам расказалі, як ажыццяўляецца пераклад, калі Авальную залу наведваюць прадстаўнікі замежных дэлегацый. Уразіла пяцітонная люстра, натхніла фота з дэпутатам.
Потым нас запрасілі ў Прэзідэнцкую бібліятэку — адну з найбуйнейшых навуковых спецыялізаваных бібліятэк краіны. Не лішнім будзе адзначыць, што супрацоўнічаем мы не першы год, а вось прыехаць удалося ўпершыню. У структуры бібліятэкі 13 аддзелаў. Мы наведалі аддзел старадрукаваных і рэдкіх выданняў — асаблівую гордасць бібліятэкі, убачылі першыя варыянты Канстытуцыі БССР і першыя пашпарты, дакрануліся да выданняў, якім больш за 200 гадоў. У чытальнай зале нам расказалі гісторыю стварэння бібліятэкі, аднаўлення помніка У.І.Леніну перад будынкам, паведамілі пра значнасць і ўнікальнасць фондаў, што знаходзяцца ў бібліятэцы.
У гэты дзень мы наведалі навукова-практычны цэнтр НАН Беларусі па біярэсурсах, Курган Славы і Лінію Сталіна. Чарговы раз паглыбіліся ў гісторыю нашай краіны, усведамляючы, што памяць — гэта адказ на пытанне, хто мы і што мы значым…
Іна ГОШКА,
дырэктар Баравікоўскай сярэдняй школы
Светлагорскага раёна.
Фота аўтара.
