Міністр адукацыі Андрэй Іванец і намеснік міністра вышэйшай адукацыі Рэспублікі Куба Мірыям Ісабель Альпізар Сантана падпісалі пагадненне паміж урадамі Рэспублікі Беларусь і Рэспублікі Куба аб узаемным прызнанні дакументаў аб адукацыі.
— На сёння беларускімі ўстановамі вышэйшай адукацыі заключаны 10 прамых дагавораў аб супрацоўніцтве з установамі адукацыі і арганізацыямі Рэспублікі Куба, — адзначыў Андрэй Іванавіч. — На базе БДЭУ дзейнічае цэнтр лацінаамерыканскіх даследаванняў, работу якога неабходна развіваць. І гэта добры падмурак для далейшага развіцця нашых узаемаадносін.
Агучу шэраг прапаноў. Перш за ўсё аб рэалізацыі двухбаковых дамоўленасцей, дасягнутых у рамках наведвання прадстаўнікамі Кубы беларускіх універсітэтаў. Варта гаварыць і аб рэалізацыі сумесных адукацыйных праграм па падрыхтоўцы бакалаўраў і магістраў, у тым ліку праз дыстанцыйныя адукацыйныя праграмы, па цэлым шэрагу напрамкаў: фармацэўтыка, ІТ, інжынерна-тэхнічныя спецыяльнасці. Праводзіцца конкурс беларуска-кубінскіх навукова-тэхнічных праектаў. У сувязі з гэтым перспектыўнымі будуць такія напрамкі, як распрацоўка новых лекавых прэпаратаў, вырабаў біямедыцынскага прызначэння, узаемадзеянне ў галіне ЗВЧ-тэхнікі і мікраэлектронікі і г.д. Мы гатовы супрацоўнічаць у рамках навукова-тэхналагічных паркаў, ствараць сумесныя прадпрыемствы, у тым ліку на тэрыторыі Кубы.
Зацікаўлены ў выніках, якія можна будзе выкарыстоўваць у рэальным сектары эканомікі або для вырашэння сацыяльна значных задач. Імкнёмся рэалізоўваць поўны інавацыйны ланцужок на базе навуковых арганізацый нашых універсітэтаў — ад ідэі да распрацоўкі і ўкаранення.
Гатовы ўзаемадзейнічаць і ў рамках дзейнасці нашых маладзёжных арганізацый, работы з адоранай моладдзю. У нашай краіне праводзіцца Адкрытая беларуская фізічная алімпіяда школьнікаў, міжнародныя конкурсы прафесійнага майстэрства па рабочых кампетэнцыях. Запрашаем і вашых школьнікаў і студэнтаў прыняць у іх
удзел. Таксама чакаем кубінскіх школьнікаў для аздараўлення ў Нацыянальным дзіцячым адукацыйна-аздараўленчым цэнтры “Зубраня”.
Намеснік міністра вышэйшай адукацыі Рэспублікі Куба Мірыям Ісабель Альпізар Сантана адзначыла, што яе краіна зацікаўлена ў рэалізацыі сумесных адукацыйных праграм, развіцці акадэмічнай мабільнасці і навуковага супрацоўніцтва. І запрасіла рэктараў беларускіх універсітэтаў сустрэцца з іх кубінскімі калегамі, каб вызначыць праекты, цікавыя абодвум бакам, і падпісаць пагадненні аб супрацоўніцтве.
Міністр адукацыі А.І.Іванец падтрымаў прапанову аб візіце рэктараў на Кубу і адзначыў, што ў мэтах лепшай падрыхтоўкі да сустрэчы мэтазгодна правесці ў пашыраным фармаце (відэаканферэнцыі) сумеснае абмеркаванне кірункаў супрацоўніцтва, каб прыбыць на Кубу з ужо гатовымі рашэннямі.
Надзея ЦЕРАХАВА.