Аўтарскі праект па арганізацыі пазаўрочнай занятасці навучэнцаў ажыццяўляюць у сярэдняй школе № 2 Мсціслава. Тут створаны спецыялізаваны цэнтр “Кропка росту”, дзейнасць якога накіравана на ўсебаковае развіццё навучэнцаў. Падрабязнасці – у матэрыяле карэспандэнта “Настаўніцкай газеты”.
— Сёння перад школай стаіць задача не проста даць веды, на першы план выходзіць выхаванне дзяцей. За час навучання педагогам трэба сфарміраваць самадастатковую асобу, грамадзяніна-патрыёта з шырокім кругаглядам і высокай маральнай культурай. Таму ўзнікла ідэя стварэння цэнтра “Кропка росту”. Мы сістэматызавалі грамадска карысную дзейнасць і дадатковую адукацыю, што дало вучням неабмежаваныя магчымасці для самарэалізацыі, — паведаміла дырэктар Алена Вяркеенка.
Цэнтр аб’яднаў 16 напрамкаў. Гэта дазваляе любому навучэнцу знайсці занятак па душы і раскрыць свае здольнасці. Дзеці, захопленыя мастацтвам, з энтузіязмам наведваюць студыю творчасці “Яркі стыль”. Для тых, каму бліжэй спорт, у школе функцыянуе клуб “Чэмпіён”. Эрудытаў тут запрашаюць у інтэлектуальны клуб “Ізвіліум”. Тых, хто цікавіцца літаратурай, далучаюць да работы на школьным радыё і тэлебачанні. Да вывучэння гісторыі навучэнцаў стымулююць праз краязнаўчы музей, у якім арганізавалі школу экскурсаводаў.
— Павышаную ўвагу ўдзяляем развіццю цікавасці да гульні ў шахматы, таму наладзілі шахматны ўсенавуч, які ахоплівае значную колькасць вучняў. Маральныя якасці развіваем праз валанцёрскі рух, які таксама знаходзіць водгук сярод нашых хлопцаў і дзяўчат, — адзначыла Алена Адамаўна.
У прыярытэце выхаваўчага працэсу ў школе — прывіццё вучням патрыятызму і грамадзянскасці. Фарміраванню гэтых якасцей у дзяцей садзейнічае работа ваенна-патрыятычнага клуба “Фенікс” і дыспут-клуба “Новае пакаленне”.
— У сучасных рэаліях неабходна валодаць крытычным мысленнем, уменнем аналізаваць інфармацыю. Такія навыкі дзеці набываюць у дыспут-клубе. Мы рэгулярна праводзім разнастайныя дыскусіі, сустракаемся з экспертамі з розных сфер. У фармаце дыялогаў і дэбатаў навучэнцы набываюць важныя каштоўнасці і перакананні, вучацца адстойваць свой пункт гледжання, — расказала настаўніца гісторыі і грамадазнаўства Святлана Галакціёнава.
Матывуюць вучняў 2-й школы і да набыцця лідарскіх якасцей, да праяўлення актыўнай грамадзянскай пазіцыі. Ва ўстанове адукацыі дзейнічаюць фарміраванне для юных лідараў, атрад сяброў міліцыі і цэнтр бяспекі.
— Навучэнцы аказваюць пасільную дапамогу міліцыянерам і ратавальнікам. Сумесна з супрацоўнікамі праваахоўных органаў яны патрулююць вадаёмы, удзельнічаюць у прафілактычных рэйдах. Для папярэджання дарожна-транспартных здарэнняў наносяць адметныя надпісы паблізу пешаходных пераходаў. Разам з інспектарамі РАНС дзеці ўдзельнічаюць у рабоце па прафілактыцы пажараў. Акрамя таго, вучні ствараюць тэматычныя відэаролікі прававой накіраванасці, распрацоўваюць гульні, з якімі наведваюць дзіцячыя садкі, — патлумачыла намеснік дырэктара па выхаваўчай рабоце Марыя Асіпенка.
Ключавая роля ў цэнтры “Кропка росту” адводзіцца прафарыентацыі. Пачаткоўцы масава наведваюць аб’яднанне “Майстарслаў”. Больш прадметна са светам прафесій дзеці знаёмяцца на сярэдняй і старшай ступені навучання.
— У нашай установе вялікая ўвага ўдзяляецца дапрофільнай і профільнай падрыхтоўцы, таму ў праекце “Кропка росту” прадугледжаны адпаведныя напрамкі. У папулярызацыі інжынерных спецыяльнасцей дапамагае гурток па робататэхніцы, дзе дзеці займаюцца праграмаваннем, будуюць мадэлі механічных прылад. У лабараторыі мікрадаследаванняў “Біяхімікум” навучэнцы праводзяць эксперыменты, даследаванні. Сур’ёзна да будучай прафесіі рыхтуем і вучняў педагагічных класаў. Для іх працуе школа маладога важатага, у рамках якой юнакі і дзяўчаты могуць паспрабаваць сябе ў ролі педагога ці выхавальніка, — заўважыла Алена Вяркеенка.
Цэнтр “Кропка росту” функцыянуе ў 2-й мсціслаўскай школе 4 гады, і яго эфектыўнасць відавочная.
— Палепшылася вучэбная паспяховасць вучняў. Дзеці вынікова праяўляюць сябе ў алімпіядах, інтэлектуальных, творчых, спартыўных спаборніцтвах, — падкрэсліла Алена Адамаўна. — “Кропка росту” дапамагае нам выхоўваць будучых сацыяльна адказных грамадзян, цалкам гатовых да жыцця ў грамадстве.
Ганна СІНЬКЕВІЧ
Фота аўтара
