У Хойніцкім санаторным садзе дзеці вучацца асновам эканамічнай культуры праз гульню, а педагогі пастаянна шукаюць новыя формы работы, каб выхаванне адказнасці і самастойнасці стала арганічнай часткай адукацыйнага працэсу. Падрабязнасці — у матэрыяле карэспандэнта “Настаўніцкай газеты”.
Па словах загадчыцы Марыі Вяргейчык, педагогі імкнуцца ўдасканальваць свае прафесійныя навыкі і прапануюць новыя ідэі.
Намеснік загадчыка па асноўнай дзейнасці Іна Шут рэалізуе праект па энергазберажэнні. У выніку адукацыйны працэс у дашкольнай установе накіраваны на фарміраванне ў выхаванцаў эканомных і беражлівых адносін да прыродных рэсурсаў. Як гэта выглядае на практыцы? Спачатку педагогі сфакусіраваліся на арганізацыі адпаведнага прадметна-прасторавага асяроддзя. Нават правялі конкурс ва ўсіх узроставых групах. Каб перамагчы, выхавальнікам трэба было стварыць найлепшыя ўмовы для фарміравання эканамічнай культуры праз сюжэтна-ролевыя гульні.
У шафах і на паліцах з’явіліся атрыбуты, якія накіраваны на фарміраванне эканамічных паняццяў: альбомы з інфармацыяй пра прафесіі, прадпрыемствы нашай краіны, прыродныя рэсурсы, правілы эканамічных і беражлівых адносін; дыдактычныя гульні па эканамічным выхаванні па самых розных напрамках (сям’я, сямейны бюджэт; пакупкі, продаж, паслугі; рэсурсы і іх выкарыстанне; праца, прафесія).
Як адзначыла Іна Шут, створаныя сюжэтна-ролевыя гульні дазваляюць мадэляваць рэальныя жыццёвыя сітуацыі: працэс куплі-продажу, вытворчасці і збыту гатовай прадукцыі, банкаўскія аперацыі.
— Умела арганізаваная эканамічная гульня спрыяе развіццю пазнавальнай актыўнасці, фарміраванню дзелавых якасцей дзяцей, — заўважае Іна Віктараўна. — А калі яна яшчэ і цікавая, то захопіць нават самае не актыўнае дзіця. Для фарміравання ўяўленняў аб прыродных рэсурсах (вадзе, сонечнай энергіі, энергіі ветру) і ўстанаўлення ўзаемасувязі паміж аб’ектамі жывой і нежывой прыроды на тэрыторыі нашага сада створана экалагічная сцяжынка, дзе разам з яе гаспадыняй Савояй праходзяць пазнавальныя мерапрыемствы.
Акрамя таго, ва ўсіх групах штодзень арганізуецца элементарная працоўная дзейнасць, якая напрамую звязана з эканамічным выхаваннем і накіравана на фарміраванне карысных бытавых звычак. Напрыклад, дзецям увесь час нагадваюць выключаць ваду пры мыцці цацак. Педагогі пастаянна звяртаюць увагу выхаванцаў на зламаныя цацкі, разарваныя кнігі, паказваюць, як іх можна адрамантаваць. Каля кожнага выключальніка, дзвярэй, ракавіны расклеены значкі аб неабходнасці эканоміі святла, вады, цяпла. Іх дызайн, дарэчы, распрацоўвалі дашкольнікі сумесна з педагогамі. У групах з’явіліся свае персанажы-сімвалы, напрыклад, Кропелька, Гном-эканом, якія знаёмяць дзяцей са спосабамі эканомнага расходавання энергарэсурсаў.
Безумоўна, усе веды ў дзіцячым садзе лепш за ўсё замацоўваюцца праз гульнявую, творчую дзейнасць. У санаторным садзе рэгулярна арганізуюцца тэматычныя выставы дзіцячых малюнкаў, выкарыстоўваюцца дыдактычныя гульні “Берагоша”, “Магазін”, “Карысна — шкодна”, “Прафесіі”.
— Праводзім для дзетак экскурсіі “Дзе жыве электрычнасць у дзіцячым садзе?” (электрашчытавая), “Адкуль цяпло ў сад прыйшло?” (цеплапункт), “Энергапрыборы ва ўстанове” (харчаблок, пральня), што пашырае кругагляд, узбагачае асабісты вопыт дзяцей. Як, дарэчы, і праектная дзейнасць, падчас якой выхаванцы вывучалі асаблівасці захоўвання і ўтылізацыі пластыку, уздзеянне смецця на экалогію, — адзначыла Іна Шут.
Педагогам для паспяховай рэалізацыі праекта таксама неабходна пашыраць свой прафесійны кругагляд. У сувязі з гэтым у дзіцячым садзе рэгулярна праводзяцца семінары-практыкумы, кансультацыі, тэматычныя тыдні.
Вольга ДУБОЎСКАЯ
Фота Алега ІГНАТОВІЧА
