Прадметны кабінет — творчая майстэрня як для педагога, так і для вучняў. Настаўнік у сваім вучэбным кабінеце дэманструе прафесійны рост, а для дзяцей гэта прастора для работы на ўроку і самастойнай вучэбнай дзейнасці.
Настаўніца беларускай мовы і літаратуры сярэдняй школы № 1 Ліды Ганна Волчак у свой вучэбны кабінет укладвае шмат сэнсаў. Найперш — навучальны і выхаваўчы. Акрамя таго, гэта месца, якое матывуе і спрыяе поспеху ў даследчай і алімпіяднай дзейнасці. І, безумоўна, вучэбны кабінет — гэта пляцоўка для актыўнай пазакласнай дзейнасці.
“Адна з галоўных задач кабінета беларускай мовы i літаратуры — арганізацыя самастойнай i творчай дзейнасці вучняў, развіццё ў ix цікавасці да прадмета. Разам з тым гэта своеасаблівы метадычны цэнтр для настаўнікаў беларускай мовы i літаратуры”, — адзначыла Ганна Вячаславаўна. Настаўніца ў сваім прадметным кабінеце здолела арганізаваць сучаснае, гарманічнае асяроддзе.
Кабінет з’яўляецца метадычнай базай для забеспячэння патрэбнага ўзроўню навучання, таму ён мае шматгаліновую структуру: памяшканне для арганізацыі вучэбных заняткаў, на базе якога створана музейная экспазіцыя вышыўкі i ткацтва, лабаранцкую, віртуальны кабінет беларускай мовы i літаратуры, які ўваходзіць у анлайн-школу па прадметах. Асноўнае прызначэнне гэтага комплексу — забеспячэнне якаснага выкладання прадмета праз правядзенне сучасных форм урокаў, пазакласных мерапрыемстваў i эфектыўнае выкарыстанне матэрыяльна-тэхнічнай базы.
“Кабінет беларускай мовы i літаратуры з’яўляецца часткай адзінай адукацыйна-інфармацыйнай прасторы школы. Колькасць інфармацыйных рэсурсаў пашыраецца, i, каб паспець за гэтымі змяненнямі, патрабуецца ўсебаковае абнаўленне. У нашай школе створаны адпаведныя ўмовы для пашырэння новых тэхналогій: камп’ютары, выхад у адзіную інфармацыйную сістэму, рабочае месца вучня як у кабінеце, так і ў лабаранцкай. Віртуальны кабінет функцыянуе, забяспечвае даступнасць электронных матэрыялаў па прадмеце ў адзінай інфармацыйнай прасторы школы. Анлайн-школа ажыццяўляе дыстанцыйнае суправаджэнне навучання i выхавання вучняў.
Прадметы даўніны з’яўляюцца правадніком у гісторыю нашай краіны, напаўняюць кабінет аўтэнтыкай. Створаная экспазіцыя “Вышыўка i ткацтва” дапамагае далучаць навучэнцаў да нацыянальнай культуры i традыцый, прымушае iх з гордасцю глядзець на тое, як жылі ix продкі, спрыяе фарміраванню патрыятычных пачуццяў.
Для арганізацыі работы кабінета выкарыстоўваюцца 2 персанальныя камп’ютары. Да іх падключаны тэлевізар для трансляцыі вучэбнага матэрыялу. Камп’ютарызацыя кабінета i лабаранцкай дазваляе выкарыстоўваць матэрыялы, тэкставыя дакументы віртуальнага кабінета беларускай мовы i літаратуры па лакальнай сетцы, а таксама падключацца падчас урока да інтэрнэту. На аснове лакальнай сеткі, якая аб’ядноўвае ўсе кабінеты школы, кожны педагог мае доступ да электроннай базы даных, магчымасць перадаваць i капіраваць любы матэрыял, ажыццяўляць сумеснае рэдагаванне дакументаў, абменьвацца паведамленнямі. У той жа час віртуальны кабінет з’яўляецца лабараторыяй для настаўніка, дапамагае ў падрыхтоўцы да ўрокаў, стыму- люе на пошук новых эфектыўных прыёмаў навучання, сістэматызуе назапашаныя метадычныя матэрыялы”, — расказала Ганна Вячаславаўна.
Затым яна падсумавала, абазначыўшы кірункі дзейнасці свайго кабінета:
арганізацыйна-аналітычны (планаванне работы i яе аналіз);
інфармацыйна-рэсурсны (развіццё i ўдасканаленне інфармацыйна-адукацыйнай прасторы кабінета);
інфармацыйна-метадычны (удасканаленне прафесійна-педагагічнай культуры педагогаў i ix прадметна-метадычнай падрыхтоўкі).
Інфарматызацыі вучэбнага працэсу ў сярэдняй школе № 1 Ліды надаюць вялікае значэнне. У навучальнай установе назапашаны адпаведны вопыт, прычым паспяховы. Дарэчы, зайсці ў анлайн-школу праз сайт навучальнай установы можа кожны жадаючы.
Праваднік у гісторыю
Душа кабінета — у музейнай экспазіцыі.
“Экспанаты, якія мы сабралі для музейнага кутка (ручнікі, коўдры, карціны, дываны, прадметы гардэробу) актыўна выкарыстоўваем як ва ўрочнай, так і ў пазакласнай дзейнасці. Чым не заданне: звярніце ўвагу на вышыўкі, якія прадстаўлены ў экспазіцыі, і складзіце тэкст-апісанне. Або: апішыце ручнікі, звярнуўшы ўвагу на гісторыю і месца іх стварэння. Экспанаты станавіліся і прадметам даследавання (тыя ж ручнікі). Дарэчы, гэтая работа заняла 2-е месца ў раённым конкурсе даследчых работ навучэнцаў.
Стварэнне экспазіцыі стала магчымым дзякуючы руплівасці і намаганням педагогаў і вучняў. Збіралася яна не адзін год. І працягвае папаўняцца: нядаўна адна з вучаніц прынесла 2 суконныя спадніцы. У вёсцы іх хацелі спаліць, але дзяўчына здолела пераканаць сваякоў у каштоўнасці знойдзеных рэчаў. Гэты выпадак, дарэчы, яскрава сведчыць пра тое, што моладзь паважае і імкнецца берагчы прадметы нашай культурнай спадчыны”, — зазначыла Ганна Вячаславаўна.
Прадметы даўніны з’яўляюцца правадніком у гісторыю нашай краіны, напаўняюць кабінет аўтэнтыкай. Створаная экспазіцыя “Вышыўка i ткацтва” дапамагае далучаць навучэнцаў да нацыянальнай культуры i традыцый, прымушае iх з гордасцю глядзець на тое, як жылі ix продкі, спрыяе фарміраванню патрыятычных пачуццяў.
“Прадстаўленую выставу каменціруюць вучні-экскурсаводы. Экспанаты актыўна выкарыстоў-
ваюцца ў якасці наглядных сродкаў на ўроках. Акрамя таго, яны натхняюць на этнаграфічныя экспедыцыі, творчыя сустрэчы. 3 мэтай павышэння эфектыўнасці работы ў гэтым кірунку праводзяцца семінары-практыкумы, дні адкрытых дзвярэй. Такая арганізацыя пазакласнай дзейнасці ў кабінеце — своеасаблівы выхад са штодзённасці, яна садзейнічае павышэнню матывацыі да прадмета, развіццю творчых здольнасцей навучэнцаў”, — лічыць настаўніца.
Арганізуецца ў кабінеце i даследчая дзейнасць. Інфармацыйна-рэсурсны напрамак з’яўляецца добрай падтрымкай у гэтай дзейнасці. У скарбонцы лепшых даследчых работ тыя, што сталі пераможцамі ў раённых конкурсах, канферэнцыях даследчага характару. У кабінеце сабрана багатая калекцыя метадычнай і вучэбнай літаратуры, якая дапамагае рыхтавацца да ўрокаў, класных гадзін, алімпіяды па беларускай мове і літаратуры. Вучэбная прастора павышае эфектыўнасць работы ў гэтым кірунку: колькасць прызавых месцаў з кожным годам павялічваецца.
Шмат увагі ўдзяляецца трансляцыі вопыту дзейнасці кабінета. Яго гаспадыня рэгулярна выступае на раённых, абласных i рэспубліканскіх семінарах. Пра сістэмнасць работы сведчаць і перамогі ў конкурсе прадметных кабінетаў: ён прызнаны лепшым і ў раёне, і ў вобласці.
Вольга ДУБОЎСКАЯ.
Фота Алега ІГНАТОВІЧА.
