Настаўнік інфарматыкі і матэматыкі Віталь Цішкевіч і настаўніца гісторыі Вікторыя Лукша з Віцьеўскай сярэдняй школы Хойніцкага раёна прапануюць вучням развіваць функцыянальную адукаванасць з дапамогай створанага імі мабільнага дадатку “Фокус”.
Цяпер матэматычную, чытацкую, прыродазнаўчанавуковую, фінансавую адукаванасць школьнікі з задавальненнем развіваюць, выконваючы тэматычныя тэставыя заданні.
— Нам важна, каб тое, чаму мы вучым, знаходзіла практычнае прымяненне за межамі ўрока — тады ў вучняў з’яўляецца цікавасць, а затым бачны рэальныя вынікі навучання. У гэтым і сэнс функцыянальнай адукаванасці — здольнасць чалавека выкарыстоўваць атрыманыя ў школе веды, уменні і навыкі для вырашэння жыццёвых задач, — адзначылі настаўнікі.
Мабільны дадатак ствараўся ў межах праекта “Разумныя дапаможнікі”. У ім аб’яднана ўзаемадзеянне навучэнца, педагога і адміністрацыі навучальнай установы. На першых этапах работы над дадаткам вывучалася матывацыя, а дакладней, дэматывацыя прадстаўнікоў усіх трох груп. Дзеці, жывучы ў лічбавым асяроддзі, адзначалі адсутнасць прагрэсу ў сваім навучанні, гаварылі, што не разумеюць яго канчатковай мэты.
У настаўнікаў фокус зрушваўся на праверкі, справаздачы, размовы з бацькамі, падрыхтоку да ўрокаў, адсутнасць часу. Як вынік — няма поўнай карціны ўзроўню навучанасці класа.
Адміністрацыю заўсёды хвалюе якасць навучання, тэрміны здачы дакументаў і наяўнасць несвоечасовых рашэнняў.
Маладыя педагогі дадаткам “Фокус” стварылі для дзіцяці ўмовы для атрымання бачнай мэты, хуткай зваротнай сувязі і росту. Для настаўніка — зручны спосаб даваць заданні і хутка атрымліваць вынікі, для школы і раёна — магчымасць мець адзіную карціну.
Пры стварэнні дадатку маладыя настаўнікі звярнуліся да інструментаў штучнага інтэлекту. “Фокус” выкарыстоўвае выключна зацверджаныя Міністэрствам адукацыі рэсурсы — педагог можа адразу раздрукоўваць і працаваць афлайн. У ім ёсць кейсы, тэсты і проста заданні, якія могуць развіваць чытацкую, матэматычную, фінансавую, лічбавую, грамадзянскую, прыродазнаўчанавуковую кампетэнцыі.
Дзеці з задавальненнем у пазаўрочны час вывучаюць самыя выгадныя тарыфы на мабільную сувязь, вучацца браць крэдыт, разлічвацца за электрычнасць, развіваюць свае навігацыйныя навыкі, распрацоўваючы кароткія шляхі з урокаў на гурткі. Узровень іх навучанасці фіксуецца ў аналітычнай інфармацыі, якую пры неабходнасці можна хутка атрымаць.
Асобна размешчаны гатовыя ўрокі па фінансавай адукаванасці, раздатачны матэрыял для выкарыстання на занятках, ёсць папкі “Работа з бацькамі” (з памяткамі, рэкамендацыямі), “Методыкі і тэхналогіі” (з гатовымі кейсамі), “Пазаўрочная дзейнасць” (з гатовымі праектамі і не толькі).
Дадатак запусцілі восенню мінулага года. Як паказвае час і колькасць зарэгістраваных удзельнікаў, ён стаў папулярным. Па словах дырэктара Віцьеўскай сярэдняй школы Веры Сцішанок, ініцыятывы маладых настаўнікаў заўсёды знаходзяць водгук у калектыве, бо за імі — будучыня педагогікі.
Вольга ДУБОЎСКАЯ
Фота Алега ІГНАТОВІЧА
