Ключавой задачай сучаснай навучальнай установы з’яўляецца фарміраванне ў душы кожнага дзіцяці высокіх маральных прынцыпаў і правільных жыццёвых арыенціраў. Такога меркавання прытрымліваецца дырэктар Добраўскай сярэдняй школы Горацкага раёна Марына Блахіна. Падрабязнасці — у матэрыяле карэспандэнта “Настаўніцкай газеты”.
Школу ў вёсцы Добрая Марына Валер’еўна ўзначаліла крыху больш за год назад. Да таго моманту была намеснікам дырэктара па вучэбна-выхаваўчай рабоце. Заўсёды ўдзяляла ўвагу духоўна-маральнаму выхаванню навучэнцаў. Дзякуючы яе намаганням, установа стала рэгіянальным рэсурсным цэнтрам па гэтым напрамку дзейнасці, тут паспяхова рэалізуюцца адпаведныя інавацыйныя праекты.
— У цяперашніх рэаліях, якія характарызуюцца глабалізацыяй, лічбавізацыяй і размываннем традыцыйных каштоўнасцей, місія ўстановы адукацыі выходзіць далёка за межы перадачы ведаў. Школа становіцца цэнтрам кансалідацыі грамадства, падмуркам для станаўлення гарманічнай, маральна сталай асобы, здольнай супрацьстаяць выклікам часу. Настаўнік павінен не проста вучыць, але і выхоўваць, фарміраваць у дзяцей ідэалы дабра, міласэрнасці, спагадлівасці.
Каб дасягнуць гэтай мэты, мы зрабілі духоўнае выхаванне абавязковым кампанентам адукацыйнага працэсу. Маральным зместам прасякнуты ўсе кірункі школьнага жыцця: урокі, перапынкі, пазаўрочныя мерапрыемствы. Плённае супрацоўніцтва наладзілі з Беларускай Праваслаўнай Царквой. Часты госць у нас — благачынны Горацкай акругі Магілёўскай епархіі, настаяцель храма іконы Божай Маці “Спарыцельніца хлябоў”, іерэй Мікіта Храмянкоў. Ён праводзіць з вучнямі духоўныя гутаркі, дае ім значныя настаўленні. На рэгулярнай аснове арганізуем для дзяцей заняткі факультатыву “Асновы духоўна-маральнай культуры і патрыятызму” і ўрокі праваслаўя.
Цесна працуем з бацькамі. Імкнёмся да таго, каб у выхаваўчай рабоце мамы і таты былі нашымі саюзнікамі і паплечнікамі. У фармаце круглых сталоў і камунікатыўных пляцовак павышаем псіхолага-педагагічныя кампетэнцыі бацькоў, знаёмім іх з праваслаўнымі традыцыямі.
Створаная ў школе сістэма духоўна-маральнага выхавання неаднаразова даказвала сваю эфектыўнасць. Асабліва ганарымся перамогай у рэспубліканскім конкурсе “Выхаваць чалавека”, прысвечаным памяці Героя Беларусі мітрапаліта Філарэта. Шмат ёсць і іншых дасягненняў, і наш педагагічны калектыў не стаіць на месцы. Перакананы: да традыцыйных форм выхаваўчай работы неабходна дабаўляць інавацыйныя. З моладдзю трэба размаўляць на яе мове, выкарыстоўваць перадавыя інфармацыйныя тэхналогіі, адаптаваць традыцыі да лічбавага асяроддзя. У гэтым плане ўжо робім першыя крокі: скарыстоўваем інтэрактыўныя анлайн-платформы для арганізацыі дыскусій, форумаў, адкрытых дыялогаў і рэалізацыі сацыяльных праектаў.
Спрабуюць свае сілы і самі навучэнцы. Юнакі і дзяўчаты займаюцца валанцёрствам, праводзяць гісторыка-культурныя даследаванні, здымаюць відэаролікі і ставяць тэатралізаваныя пастаноўкі на праваслаўную тэматыку. Гэтыя звычайныя справы ненадакучліва пераводзяць выхаванне з пасіўнага слухання ў актыўнае дзеянне.
Сёння важна не даваць гатовыя адказы, а вучыць дзяцей самастойна думаць, аналізаваць, адстойваць уласныя погляды. Толькі аб’ядноўваючы мудрасць мінулага і энергію будучыні, мы зможам выхаваць пакаленне, якое будзе інтэлектуальна развітым, духоўна багатым, маральна ўстойлівым і гатовым да стваральнай працы на карысць роднай краіны.
Ганна СІНЬКЕВІЧ
Фота аўтара
