Факультэт міжнародных адносін БДУ ў 2024/2025 навучальным годзе пачне рыхтаваць міжнароднікаў-лагістаў і канфліктолагаў. Набор на ўнікальныя для Беларусі профілі будзе ажыццяўляцца на І ступені вышэйшай адукацыі, прычым як на бюджэтнай, так і на платнай форме навучання, паведамляе карэспандэнт “Настаўніцкай газеты”.
— Адкрыццё спецыяльнасці “Міжнародная лагістыка” абумоўлена ўзрастаннем глабальнага гандлю і пашырэннем міжнародных бізнес-аперацый з арыентацыяй на Усход. У сувязі з гэтым сёння ўсё больш узрастае патрэба дзяржавы ў кваліфікаваных кадрах у галіне кіравання ланцужкамі паставак, забеспячэння эфектыўнасці і бяспекі транспарціроўкі тавараў, а таксама падтрымання канкурэнтаздольнасці беларускай эканомікі на сусветным рынку, — адзначыў рэктар БДУ Андрэй Кароль.
Вучэбны план новай спецыяльнасці будзе ўключаць сацыяльна-гуманітарны і мытна-лагістычны модулі. Яны ў сваю чаргу прадугледжваюць вывучэнне асноў эканамічнай бяспекі, экспартна-арыентаванай эканомікі і міжнароднага супрацоўніцтва. Да таго ж будучыя міжнароднікі-лагісты будуць вывучаць дзве замежныя мовы, што забяспечыць выпускнікам глыбокае разуменне патрэбнасцей міжнародных партнёраў і лепшае ўзаемадзеянне з імі.
Пры падачы дакументаў на “Міжнародную лагістыку” абітурыентам трэба будзе прадаставіць сертыфікаты ЦЭ/ЦТ па матэматыцы, замежнай і рускай (беларускай) мовах.
Пасля заканчэння навучання выпускнікі атрымаюць кваліфікацыю “спецыяліст па міжнароднай лагістыцы”. Яны змогуць працаваць на прадпрыемствах лагістычнай і транспартна-экспедытарскай сферы, транспартна-лагістычных цэнтрах, складскіх комплексах і тэрміналах, прадпрыемствах, што ажыццяўляюць знешнеэканамічную дзейнасць, структурных і падведамасных установах транспартна-лагістычнай накіраванасці міністэрстваў і ведамстваў.
— Спецыяльнасць “Міжнародная канфлікталогія” накіравана на вырашэнне важнейшых задач інтэрнацыянальнага ўзаемадзеяння, што асабліва актуальна ў сучасных умовах глабальных сутыкненняў і выклікаў. Студэнты навучацца рэгуляваць канфлікты з дапамогай медыятыўных тэхналогій, падтрымліваць мір і парадак з дапамогай перагавораў і пасрэдніцтва, а таксама атрымаюць навыкі дыпламатыі, неабходныя для захавання нацыянальнай і ваеннай бяспекі. Акрамя таго, навучэнцы асвояць асноўныя аспекты гуманітарнай дзейнасці па аказанні дапамогі бежанцам і імігрантам. А таму і такія спецыялісты будуць вывучаць дзве замежныя мовы, — паведаміў Андрэй Дзмітрыевіч.
Для паступлення на “Міжнародную канфлікталогію” неабходна здаць ЦЭ або ЦТ па грамадазнаўстве, замежнай і рускай (беларускай) мовах.
Выпускнікам прысвояць кваліфікацыю “канфліктолаг-міжнароднік”, што дазволіць ім працаваць у органах дзяржаўнага кіравання, урадавых арганізацыях, профільных ведамствах і міністэрствах.
Працягласць навучання па абедзвюх спецыяльнасцях складае чатыры гады. Таксама разглядаецца магчымасць мэтавага набору, для якога прадугледжаны асобны ўнутраны экзамен.
Яшчэ адна новая спецыяльнасць БДУ — “Краіназнаўства і перакладчыцкая дзейнасць” — адкрыецца на факультэце геаграфіі і геаінфарматыкі. Да гэтага часу спецыялістаў такога напрамку не рыхтавалі ў беларускіх УВА.
— Сёння айчынным арганізацыям неабходны канкурэнтныя і ўніверсальныя супрацоўнікі з комплекснымі ведамі ў галіне эканамічных, палітычных, сацыякультурных, этнічных асаблівасцей розных краін, а таксама з валоданнем замежнай мовай і навыкамі як у педагагічнай, так і ў вытворчай дзейнасці, — сказаў рэктар БДУ.
Па яго словах, перавага новай спецыяльнасці — у міждысцыплінарнасці. Рыхтаваць студэнтаў будуць выкладчыкі адразу двух факультэтаў: сацыякультурных камунікацый і геаграфіі і геаінфарматыкі. Вучэбны працэс будзе ўключаць фундаментальную падрыхтоўку па лінгвістычных, у прыватнасці, перакладчыцкіх, фізіка-геаграфічных, экалагічных, метадычных дысцыплінах.
— Зараз грамадству асабліва патрэбны спецыялісты з веданнем англійскай мовы. Яе асваенне забяспечыць географам больш глыбокае і поўнае разуменне глабальных праблем, такіх як змяненне клімату, сусветныя канфлікты, дэмаграфічныя змяненні, а таксама дазволіць лепш разумець і аналізаваць інфармацыю з міжнародных крыніц, — патлумачыў Андрэй Кароль.
Абітурыентам, якія вырашаць паступаць на “Краіназнаўства і перакладчыцкую дзейнасць” давядзецца здаць ЦЭ або ЦТ па геаграфіі, матэматыцы, рускай (беларускай) мове.
Затым ім прыйдзецца вучыцца 4,5 года. Пасля заканчэння ўніверсітэта атрымаюць трайную кваліфікацыю “географ. Выкладчык. Перакладчык”. Дзякуючы гэтаму, змогуць працаваць у якасці настаўнікаў, перакладчыкаў у профільных арганізацыях і на вытворчасці, у турыстычных, рэкламных і IT-кампаніях, адукацыйных і даследчых арганізацыях.
Нагадаем, за апошнія пяць гадоў у БДУ адкрыты такія новыя спецыяльнасці, як “Геатэхналогіі турызму і экскурсійная дзейнасць”, “Біяінжынерыя і біяінфарматыка”, “Эканамічная бяспека”, “Рэгіёназнаўства”, “Кібербяспека” і “Дзяржаўны аўдыт”.
Вольга АНТОНЕНКАВА
