Раскрыць творчы патэнцыял педагогаў, вывучыць іх вопыт, убачыць яго каштоўнасць для калег, наладзіць цеснае супрацоўніцтва паміж усімі ўдзельнікамі адукацыйнага працэсу — галоўныя арыенціры любой метадычнай службы, у тым ліку і нашага ясляўсада.
У 2018/2019 навучальным годзе ва ўстанове прайшоў першы тэматычны тыдзень, які захапіў літаральна ўсіх. З таго часу тэматычныя тыдні сталі традыцыйнымі. Сёння яны не абмяжоўваюцца толькі метадычнай работай з кадрамі, іх тэматыка ахоплівае ўвесь адукацыйны працэс.
Асноўная мэта падобных тыдняў — максімальна пагрузіць усіх удзельнікаў у пэўную тэму, якая аб’ядноўвае іх у разнастайнай дзейнасці. У адпаведнасці з ёй падбіраецца і змест. Абавязковая ўмова — эмацыянальна-вобразная форма раскрыцця тэмы кожнага дня.
“Дакранаючыся да сваіх вытокаў” — так гучала тэма аднаго з тыдняў. У першы дзень, які меў назву “Што? Дзе? Калі на жабінкаўскай зямлі?”, педагогі праводзілі з дзецьмі гутаркі пра Жабінку, яе гісторыю і прыроду. У гэты ж дзень прайшоў тэст “Пазнай месца ў Жабінцы”. У Viber-чаце былі размешчаны скажоныя фотаздымкі з выявамі розных мясцін роднага горада, якія патрабавалася пазнаць на працягу адной гадзіны.
Другі дзень “Мне выпала шчасце тут нарадзіцца” быў прысвечаны дзіцячай выяўленчай творчасці. Малышы малявалі ў розных тэхніках любімыя мясціны малой радзімы. Педагогі рыхтавалі творчыя праекты “Люблю цябе, куток мой мілы”. Эмацыянальныя відэаролікі былі напоўнены задушэўнымі фотаздымкамі і прэзентацыямі, а аповеды, вершы і песні пра родны куток выпраменьвалі цеплыню і шчырую любоў. За 2 гадзіны ўдзельнікі “пабывалі” ў розных населеных пунктах Брэстчыны і нават Расіі.
У трэці дзень “Карагод гульняў” дзеці гулялі ў розныя гульні, якія знаёмілі іх з рознымі мясцінамі. А педагогаў чакалі адкрытыя заняткі “Падарожжа па родным горадзе” ў групе інтэграванага навучання і выхавання. Завяршыўся дзень падвядзеннем вынікаў конкурсу дыдактычных гульняў “Мая малая радзіма”, які паказаў, як можна класічныя дыдактычныя гульні зрабіць эфектыўным сродкам знаёмства з родным горадам.
У чацвёрты дзень “Мова родная, мова модная” дзеці чыталі вершы беларускіх паэтаў. Старэйшыя дашкольнікі ўдзельнічалі ў віктарыне “Знаўцы роднага слова”, а педагогі — у моўным квесце.
У пяты дзень “Сёння ў нашай хаце свята” старэйшыя малышы запрасілі малодшых на музычную забаву “Восеньскі кірмаш”. Дзеці вучыліся гасціннасці ў інсцэніроўках “Збіраемся ў госці”, а педагогі частавалі калег стравамі сямейнай кухні.
На працягу тыдня ва ўсіх групах працавала фотавыстава “Мой родны кут, табой любуюся”, у стварэнні якой былі задзейнічаны і бацькі.
Не менш цікавым атрымаўся і другі тыдзень — “Человек природе друг, пусть узнают все вокруг!”. “Кніжчына бальніца”, арганізаваная ў Дзень экалагічнай кнігі, дазволіла прывесці ў парадак кніжныя куткі ў групах.
Кніжны фрымаркет “ВО!круг книг” аб’яднаў педагогаў і бацькоў і дапамог знайсці “непатрэбным” кнігам новых чытачоў і сяброў. У рамках Дня экалагічнай гульні прайшла акцыя “Экакропелька”, прысвечаная захаванню водных рэсурсаў. Многіх парадавалі аплікацыйныя калажы “Зямля — наш агульны дом” з прыроднага матэрыялу, а таксама выстава малюнкаў “Мой любімы хатні гадаванец”. Педагогі распрацавалі экалагічныя пашпарты груп, якія атрымаліся вельмі разнастайнымі, змястоўнымі і шматфункцыянальнымі. А вынікам работы творчага калектыву выхавальнікаў стала распрацоўка сцэнарыя квеста для старэйшых дашкольнікаў “Выратуем нашу Зямлю”.
Тэматычныя тыдні павышаюць прафесійную кампетэнтнасць педагогаў, дапамагаюць іх самарэалізацыі, раскрываюць творчы патэнцыял.
Вольга БЫКАВА,
намеснік загадчыка па асноўнай дзейнасці ясляў-сада № 1 Жабінкі.
