Настаўніца матэматыкі Магілёўскага дзяржаўнага абласнога ліцэя № 1 Анжаліка Шапавалава ў прафесію прыйшла свядома. Аб педагогіцы яна марыла з дзяцінства і крок за крокам рухалася ў выбраным сэрцам напрамку. Падрабязнасці — у матэрыяле карэспандэнта “Настаўніцкай газеты”.
— Я заўсёды ведала, што пайду па жыцці толькі настаўніцкім шляхам, прычым выкладаць буду матэматыку. Чаму менавіта гэты прадмет? У мяне матэматычны склад розуму, лічбы неверагодна мяне прывабліваюць. Вялікі ўплыў аказалі таксама школьныя педагогі, якія і зараз з’яўляюцца для мяне прыкладам, — паведаміла Анжаліка Міхайлаўна.
Запаветны настаўніцкі дыплом Анжаліка Шапавалава атрымала ў МДУ імя А.А.Куляшова. Пасля скончыла там магістратуру і маладым педагогам прыйшла працаваць у першы абласны ліцэй.
— З той пары мінула ўжо дзевяць гадоў, але і цяпер дакладна памятаю пачатак працоўнай дзейнасці. Было шмат хваляванняў, часам не ўсё ўдавалася. У той перыяд мяне падтрымалі калегі і кіраўніцтва ліцэя. Дзякуючы іх парадам і метадычным падказкам, з прафесійным станаўленнем я справілася хутка і лёгка, — расказала Анжаліка Міхайлаўна.
Сёння Анжаліка Шапавалава — вопытная настаўніца з вышэйшай кваліфікацыйнай катэгорыяй. За амаль дзесяць гадоў плённай працы яна выбудавала свае алгарытмы паспяховага навучання. Педагог упэўнена: калі зацікавіць навучэнцаў і абудзіць іх пазнавальную актыўнасць, матэматыка стане простай і даступнай для ўспрымання.
— Матэматыка — складаная, але захапляльная навука. Калі настаўнік зможа выклікаць інтарэс дзяцей, цяжкасцей з засваеннем прадмета не ўзнікне. Імкнуся рознымі спосабамі паказаць вучням дзівосны свет формул і ўраўненняў. Прымяняю задачы, звязаныя з рэчаіснасцю. Гэта спрыяе разуменню навучэнцамі таго, што матэматыка паўсюль вакол нас, — патлумачыла Анжаліка Міхайлаўна.
На сваіх занятках Анжаліка Шапавалава шырока ўжывае інфармацыйна-камунікацыйныя тэхналогіі. Настаўніца распрацавала серыю аўтарскіх прэзентацый, якія візуальна раскрываюць тэмы па геаметрыі. У яе арсенале і тэхналогія крытычнага мыслення. Анжаліка Міхайлаўна стараецца, каб вучні на ўроках разважалі, дыскутавалі, аналізавалі, рабілі высновы і адстойвалі свой пункт гледжання.
— Не забываю і пра творчасць. Спрабую здзівіць дзяцей нестандартнымі формамі правядзення заняткаў. Неяк з дзесяцікласнікамі мы займаліся на вуліцы: клас падзяліўся на каманды, рашэнне задач пісалі крэйдай на асфальце. Такі ўрок запомніўся і падарыў вучням незабыўныя ўражанні, — расказала Анжаліка Шапавалава.
Вельмі значным яна лічыць індывідуальны падыход да навучэнцаў. Настаўніца пераканана: аднолькавых дзяцей не бывае, усе — унікальныя.
— Для кожнага вучня шукаю асаблівую траекторыю навучання з улікам яго здольнасцей. Бо аднаму дзіцяці для разумення тэмы дастаткова мінуты, а другому не хопіць і цэлых заняткаў. Па гэтай прычыне заданні рыхтую толькі дыферэнцыраваныя, а яшчэ часта ствараю сітуацыі поспеху для навучэнцаў. У сукупнасці гэта моцная матывацыя, — адзначыла педагог.
Па меркаванні Анжалікі Шапавалавай, важны аспект якаснай адукацыі — узаемадзеянне педагога з вучнямі.
Яна шмат гутарыць з дзецьмі, заўсёды гатова выслухаць іх і дапамагчы.
— Не вяду класнае кіраўніцтва, але выхаванню ўдзяляю вялікую ўвагу. Сустракаюся з дзецьмі ў пазаўрочны час, наведваю з імі мерапрыемствы, бываю на экскурсіях. У такія моманты мы душэўна гаворым пра жыццёвыя каштоўнасці, пра тое, якім павінен быць добры чалавек. Выкарыстоўваю і выхаваўчы патэнцыял заняткаў. Матэматыка — навука, якая прыводзіць у парадак розум, развівае працавітасць, мэтанакіраванасць, упартасць, акуратнасць. Рэгулярна нагадваю навучэнцам аб тым, што ў далейшым ім спатрэбяцца не толькі веды, але і навыкі, якія яны набываюць на ўроках, — падкрэсліла Анжаліка Міхайлаўна.
Выпрацаваная Анжалікай Шапавалавай сістэма выкладання прыносіць адпаведныя вынікі. Яе вучні дэманструюць высокую паспяховасць, бліскуча здаюць ЦТ і ЦЭ, пераможна выступаюць на заключным этапе Рэспубліканскай алімпіяды па матэматыцы.
Анжаліка Міхайлаўна паспявае не толькі выкладаць. Ужо некалькі гадоў яна працуе намеснікам дырэктара па вучэбнай рабоце, адказвае за арганізацыю адукацыйнага працэсу ва ўсім ліцэі.
— Пастаянна знаходжуся ў нейкіх клопатах і справах, але яны мне ў радасць. Штодня з задавальненнем іду на работу і ў іншай сферы сябе нават не ўяўляю. Педагогіка даўно стала прызваннем. Мяне неверагодна натхняюць нават маленькія дасягненні вучняў, — запэўніла Анжаліка Шапавалава. — У планах — працягваць прафесійнае самаразвіццё, каб яшчэ больш творча адкрываць навучэнцам таямніцы матэматычнага свету.
Ганна СІНЬКЕВІЧ
Фота аўтара
