Не толькі сфарміраваць трывалыя веды, але і дапамагчы вучням знайсці жыццёвы шлях. Да гэтага імкнецца на сваіх уроках настаўніца біялогіі гімназіі Быхава Настасся Адамчанка. Падрабязнасці — у матэрыяле карэспандэнта “Настаўніцкай газеты”.
— На педагагічную прафесію мяне натхніла бабуля. Яна таксама выкладала біялогію і стала для мяне моцным матывацыйным арыенцірам, — падзялілася Настасся Генадзеўна.
Свае заняткі Настасся Адамчанка будуе з упорам на асобасна арыентаваны падыход. Яна стараецца заўважыць індывідуальнасць кожнага дзіцяці і з усімі знайсці паразуменне.
— Атмасфера ў класе, узаемаадносіны настаўніка і вучняў шмат у чым уплываюць на эфектыўнасць навучання, — пераканана Настасся Генадзеўна.
Яшчэ адным фактарам вучэбнай паспяховасці Настасся Адамчанка лічыць цікавасць дзяцей да прадмета. Яе ўрокі максімальна практыка-арыентаваныя і наглядныя.
— Зрабіць біялогію лёгкай для дзіцячага ўспрымання атрымліваецца праз набліжэнне навукі да рэчаіснасці. Адна справа — агучыць сухую тэорыю па падручніку, а зусім іншая — прывесці даступныя прыклады. Разам з вучнямі выконваем эксперыменты з вырошчваннем раслін, падрабязна разглядаем звычкі і асаблівасці жывёл. Інтэрактыўна вывучаем і тэмы, звязаныя з арганізмам чалавека: вымяраем адно аднаму пульс, ціск, тэмпературу, вучымся накладваць шыны, як пры пераломах. Калі звычайныя заняткі ператвараюцца ў практыка-арыентаваныя, біялогія становіцца простай і цікавай. Складаны на першы погляд прадмет захапляе навучэнцаў, — адзначыла Настасся Генадзеўна.
Падчас урокаў настаўніца шырока выкарыстоўвае ІКТ і візуалізацыю. Аб’ёмныя тэарэтычныя звесткі яна даносіць праз аўтарскую інфаграфіку, прэзентацыі, відэаролікі.
— Для лепшага запамінання вучнямі вялікай колькасці паняццяў ужываю мнеманічныя прыёмы, метад трыміно, воблака слоў, кластары, схемы, логіка-сэнсавыя ланцужкі, — паведаміла Настасся Адамчанка.
У ліку прыярытэтаў Настассі Генадзеўны — падтрымка адораных навучэнцаў. Здольных хлопчыкаў і дзяўчынак настаўніца далучае да алімпіяднага руху, навукова-даследчай дзейнасці.
— Сумесна з дзецьмі распрацоўваем праекты практычнага характару. Выявілі, з якіх кветак пчолы даюць самы смачны мёд, якую агратэхніку варта прымяняць для павышэння ўраджайнасці пры вырошчванні гарбузоў, склалі турыстычны маршрут па славутасцях Быхаўскага раёна. Усе даследчыя работы былі адзначаны шэрагам пераможных дыпломаў, у тым ліку рэспубліканскага ўзроўню, — расказала настаўніца.
Вялікую ўвагу Н.Г.Адамчанка ўдзяляе выхаванню вучняў. Для яе важна прывіць дзецям экалагічную культуру, навучыць іх клапаціцца пра навакольнае асяроддзе і сваё здароўе, сфарміраваць маральныя якасці. Асаблівае значэнне настаўніца надае прафарыентацыі навучэнцаў.
— Мне неабыякавы лёс дзяцей. Хочацца, каб яны знайшлі сваё месца ў грамадстве. Таму ўсяляк падтрымліваю тых, хто выбірае біялогію за аснову будучай прафесіі. Вяду факультатыў па падрыхтоўцы да цэнтралізаваных экзамену і тэсціравання. Калі патрэбна, займаюся з вучнямі дадаткова, — заўважыла педагог. — Працуем шмат і карпатліва, таму і паказчыкі адпаведныя: на ЦЭ і ЦТ навучэнцы набіраюць высокія балы. Сёлета быў нават стабальны сертыфікат. Але самае галоўнае, што ажыццяўляюцца вучнёўскія мары. Не страчваю сувязі з выпускнікамі. Прыемна назіраць за тым, як яны становяцца ўрачамі, ветэрынарамі, педагогамі.
Настасся Генадзеўна мае вышэйшую кваліфікацыйную катэгорыю і званне “Лепшы па прафесіі”, за плённую працу неаднойчы ўзнагароджвалася ганаровымі граматамі Міністэрства адукацыі і мясцовых выканаўчых улад. У планах настаўніцы — працягваць развіццё ў прафесіі.
Ганна СІНЬКЕВІЧ
Фота аўтара
