З развіццём лічбавай эканомікі адчуваецца востры попыт на ІТ-спецыялістаў. Сусветную тэндэнцыю ўлічвае айчынная сістэма адукацыі: у школах актыўна ствараюцца STEM/STEAM/STREM-класы і цэнтры, якія дазваляюць ахапіць інавацыйным навучаннем як мага больш дзяцей.
Адзін з такіх цэнтраў ужо 3 гады дзейнічае ў сярэдняй школе № 10 Пінска, адной з пераможцаў рэспубліканскага конкурсу “Хачу вучыцца ў STEM-класе!”.
— STEM — адзін з галоўных трэндаў у сусветнай адукацыі, што ўяўляе сабой інтэграваны падыход да навучання, у рамках якога акадэмічныя навукова-тэхнічныя канцэпцыі вывучаюцца ў кантэксце рэальнага жыцця, — расказвае намеснік дырэктара па вучэбнай рабоце С.А.Жук. — Мэта такога падыходу — стварэнне ўстойлівых сувязей паміж школай і грамадствам для развіцця STEM-дасведчанасці і канкурэнтаздольнасці ў сусветнай эканоміцы. STEAM аб’ядноўвае навуку, тэхналогіі, інжынерыю, мастацтва і матэматыку, а STREM — навуку, тэхналогіі, робататэхніку, інжынерыю і матэматыку.
Перавагі STEАM-адукацыі ў тым, што інтэграванае навучанне праходзіць па тэмах, а не па прадметах, навукова-тэхнічныя веды бяруцца з рэальнага жыцця, у дзяцей развіваюцца крытычнае мысленне, цікавасць да тэхнічных дысцыплін, камунікацыйныя навыкі і навыкі каманднай работы, фарміруецца ўпэўненасць у сваіх сілах, павышаецца матывацыя да тэхнічнай творчасці праз розныя віды дзейнасці з улікам узроставых і індывідуальных здольнасцей. Акрамя таго, STEAM-адукацыя адыгрывае важную ролю ў прафарыентацыі і падрыхтоўцы школьнікаў да тэхналагічных інавацый.
— Сённяшнім вучням давядзецца працаваць па прафесіях, якіх пакуль няма, выкарыстоўваць тэхналогіі, якія пакуль не створаны, вырашаць задачы, пра якія мы можам толькі здагадвацца. Таму школьная адукацыя павінна адпавядаць мэтам апераджальнага развіцця, — адзначае С.А.Жук.
Дзеці, якія вучацца па праграме STEAM-адукацыі, акрамя фізікі і матэматыкі, займаюцца робататэхнікай, праграмаваннем, канструяваннем, прататыпаваннем, мадэляваннем і інш. На гуртковых і факультатыўных занятках выкарыстоўваецца спецыяльнае лабараторнае і вучэбнае абсталяванне: 3D-прынтары, сродкі візуалізацыі і інш. Практыкуюцца хакатоны, алімпіяды, конкурсы і інш.
— Задача нашага STEAM-цэнтра — дапамагчы эфектыўна выкарыстоўваць атрыманыя веды з прыродазнаўчых навук, тэхналогій, інжынерыі, матэматыкі і мастацтва шляхам праектнага навучання ў галіне адукацыйнай і спартыўнай робататэхнікі, Scratch-праграмавання, журналістыкі, прататыпавання, — гаворыць С.А.Жук. — У цэнтры працуюць 7 выкладчыкаў, якія вядуць 10 груп па 10 чалавек у кожнай з ліку вучняў 1—9 класаў. Выхаванцы STEAM-цэнтра “Спаборніцкая робататэхніка” — актыўныя ўдзельнікі абласных і рэспубліканскіх конкурсаў інавацыйнай і тэхнічнай творчасці, пастаянныя пераможцы і прызёры абласнога турніру “Робафэст” у катэгорыях “Кегельрынг” і “Лабірынт”, а таксама рэспубліканскага Кубка па адукацыйнай робататэхніцы ў катэгорыях “Рух па лініі”, “Робасумо”, “Робарэйс” і “Кіруемы робафутбол”. У рамках прафарыентацыйнай работы школьнікі сустракаюцца са спецыялістамі ІТ-кампаній.
Па словах С.А.Жук, STEM-падыход ва ўстанове ўкараняецца пакуль на базавым узроўні, які ўяўляе сабой асобныя ўрокі і вучэбную праграму на стыку навук. Але школа імкнецца арганізоўваць праблемныя тыдні, што могуць неўзабаве замяніць прадметныя тыдні, дазволіўшы педагогам-прадметнікам канцэнтраваць увагу на пэўных праблемах і, дзякуючы кааперацыі, паспяхова вырашаць іх.
Сяргей ГРЫШКЕВІЧ.
Фота Алега ІГНАТОВІЧА.
