Навучэнцы і педагогі гімназіі № 4 Віцебска стварылі адукацыйны партал па энергаэфектыўнасці “ЭнергаСвет”.
Ідэя тэматычнага інтэрнэт-рэсурсу нарадзілася ў мінулым маі, калі мы разам з калегамі — намеснікамі дырэктара і кіраўніком установы адукацыі Ірынай Сірвуціс аналізавалі вынікі дзейнасці калектыву за навучальны год. Параіліся і прыйшлі да высновы: назапашаны гімназіяй адметны матэрыял, уключаючы грунтоўны метадычны складнік, дазваляе выбудаваць адзіную інфармацыйную прастору ў засваенні тэарэтычнай базы, атрыманні практычных навыкаў і вопыту вучэбна-метадычнай работы ў галіне энергазберажэння.
Так нарадзіўся наш новы адукацыйны партал па энергаэфектыўнасці “ЭнергаСвет”, нацэлены на фарміраванне і сістэматызацыю метадычных і практычных матэрыялаў, канцэнтрацыю і трансляцыю перадавога вопыту ў галіне рацыянальнага энерга- і рэсурсаспажывання.
“ЭнергаСвет” прызначаны для шырокага кола карыстальнікаў. Раздзел “Пра партал” знаёміць з гімназіяй, мэтамі і задачамі адукацыйнага інтэрнэт-рэсурсу, структурай сайта. Дашкольнікі, наведаўшы “ЭнергаГульнявую”, змогуць праз квізы, віктарыны, квесты, пазлы, рэбусы і крыжаванкі засвойваць правілы энергазберажэння. З дапамогай “ЭнергаФарбаў” азнаёмяцца з алфавітам-размалёўкай па энергазберажэнні. На старонцы “ЭнергаСлова” мы прапануем пачытаць аўтарскія казкі па энергаэфектыўнасці.
Школьнікам партал дапаможа паглыбіцца ў культуру энергаспажывання і развіць творчы патэнцыял. Тэматычная палітра дастаткова шырокая. Так, раздзел “ЭнергаМузей” са сваімі старонкамі “Мінулае”, “Сучаснасць” і “Будучыня” раскажа пра энергію, гісторыю ўзнікнення першых і найбольш буйных электрастанцый Беларусі і свету, электрычнасць, энергетыкаў і энергаэфектыўнасць, асвоеныя крыніцы энергіі і энергію будучыні.
А ў раздзеле “ЭнергаМастацтва” сабраны творчыя праекты. Прычым не толькі навучэнцаў і педагагічных работнікаў гімназіі, але і — па выбары нашых рэдактараў — найцікавейшыя з тых, якія знаходзяцца ў свабодным доступе. У прыватнасці, падраздзел “ЭнергаМайстэрня” прапануе вялікую колькасць творчых ідэй па выкарыстанні другасных матэрыяльных рэсурсаў.
Старонкі “ЭнергаЧасопіс” і “ЭнергаГазета” падзеляцца аб’яднанымі агульнай тэматыкай энерга- і рэсурсазберажэння навінамі аб жыцці гімназіі, інфармацыяй пра самыя значныя падзеі, якія адбыліся ў раёне і вобласці ў гэтай сферы. Напрыклад, 22 снежня 2023 года, менавіта ў Дзень энергетыка, на базе нашай гімназіі завяршыўся адкрыты адукацыйны форум з міжнародным удзелам “ЭнергаПогляд”. Мерапрыемства мы арганізавалі пры падтрымцы аддзела па адукацыі Віцебскага гарвыканкама, аддзела па адукацыі, спорце і турызме адміністрацыі Чыгуначнага раёна абласнога цэнтра, абласнога ўпраўлення па наглядзе за рацыянальным выкарыстаннем паліўна-энергетычных рэсурсаў, гарадской і раённай інспекцый прыродных рэсурсаў і аховы навакольнага асяроддзя. На працягу трох тыдняў у форуме прынялі ўдзел 547 школьнікаў, гімназістаў і навучэнцаў 1 і 2 курсаў каледжаў з 30 устаноў адукацыі Беларусі і Расіі.
Упэўнена, сваіх прыхільнікаў знойдуць і старонкі “ЭнергаКіназала”, “ЭнергаГумар”.
У раздзеле “ЭнергаКанферэнцыя” акцэнт зроблены на праектна-даследчай дзейнасці. У сваю чаргу, “ЭнергаПрафесія” раскрые спіс прафесій, звязаных з энергазберажэннем і энергаэфектыўнасцю. Педагагічным работнікам будзе асабліва карысным раздзел “ЭнергаВеды”, дзе прадстаўлены заканадаўчыя акты Рэспублікі Беларусь, матэрыялы з вопыту работы гімназіі (распрацоўкі вучэбных заняткаў, майстар-класаў, пазакласных мерапрыемстваў, палажэнні канферэнцый, форумаў, сцэнарыі свят). Гэты раздзел у тым ліку ўключае падраздзелы “ЭнергаЗакон”, “ЭнергаУрок”, “ЭнергаМерапрыемства”, “ЭнергаДыялог”.
Таццяна ДАРГЕЛЬ,
намеснік дырэктара па вучэбнай рабоце
гімназіі № 4 Віцебска
