Алесі Мазоль усяго толькі 26 гадоў, а яна ўжо не проста дыпламаваны спецыяліст і малады вучоны са званнем магістра. Сёння яна — старшыня савета маладых вучоных, асістэнт кафедры матэматычных метадаў у эканоміцы факультэта лічбавай эканомікі БДЭУ і даследчык, які дакладна ведае, як аптымізаваць пасевы і пашырыць знешні рынак спажыўцоў.
Шлях нашай гераіні да эканамічнай прафесіі пачаўся яшчэ ў школе, а дакладней, у сталічнай гімназіі № 33 (былой сярэдняй школе № 211).
З 5 па 8 клас яна захаплялася матэматыкай і актыўна ўдзельнічала ў індывідуальных і камандных алімпіядах. Аднак нечакана ў 9 класе яе зацікавіла праграмаванне. “Мне было вельмі цікава разабрацца ў нечым новым і нестандартным. Стаць удзельніцай алімпіяды па праграмаванні было падобна таму, як дзяўчыне “трапіць у армію”, бо там адны юнакі і да таго ж больш тэхнічна падкаваныя. Дзяўчат на алімпіядзе было вельмі мала, як і ў цэлым дзяўчат-праграмістаў, і гэты факт канчаткова паўплываў на мой прафесійны выбар. Я спынілася на спецыяльнасці, блізкай да праграмавання, у Беларускім дзяржаўным эканамічным універсітэце. Наконт факультэта і спецыяльнасці не сумнявалася ні хвіліны і ніякіх іншых варыянтаў нават не разглядала. Пасля конкурсу мяне залічылі на спецыяльнасць “Эканамічная кібернетыка (інфармацыйныя тэхналогіі ў эканоміцы)” факультэта менеджменту”, — расказала Алеся Мазоль.
Вучоба ва ўніверсітэце стала для яе па-сапраўднаму незабыўным часам. “Выкладчыкам асобны дзякуй не толькі за веды, якімі яны з намі дзяліліся, але і за тое, што навучылі нас знаходзіць выйсце са складаных сітуацый. Такім чынам мы, так бы мовіць, прайшлі добрую школу жыцця, — дадала яна. — Я актыўна ўдзельнічала ў навуковай дзейнасці і міжнародных канферэнцыях, публікавала свае работы, стала ўладальніцай стыпендыі імя Францыска Скарыны і стыпендыятам спецыяльнага фонду Прэзідэнта па сацыяльнай падтрымцы адораных навучэнцаў і студэнтаў. Скончыла магістратуру з прысваеннем звання магістра эканамічных навук, а затым і аспірантуру, маю дыплом даследчыка”.
Дарэчы, пасля заканчэння ўніверсітэта Алесі Аляксандраўне была прысвоена кваліфікацыя “кібернетык-эканаміст”. “Кібернетыка — гэта навука пра аптымальнае кіраванне сістэмамі. Таму эканамічная кібернетыка — аптымальныя суадносіны ведаў у галіне кіравання і эканомікі. Такі спецыяліст можа займаць кіруючыя пасады і працаваць у сферы аналітыкі, вырашаць бізнес-задачы з выкарыстаннем інфармацыйных тэхналогій і матэматычных мадэлей, знаходзіць заканамернасці і сувязі ў вялікіх аб’ёмах даных, рабіць прагнозы і прапаноўваць аптымальныя рашэнні”, — патлумачыла яна.
Зараз А.А.Мазоль узначальвае савет маладых вучоных БДЭУ. Для яе такая пасада вельмі адказная. Яна адзначыла, што іх савет створаны для папулярызацыі навукі сярод моладзі, фарміравання навуковай палітыкі і інтэграцыі навукі і адукацыі: “Наш савет матывуе студэнтаў займацца навуковай дзейнасцю, дапамагае развіваць іх навуковы і творчы патэнцыял, садзейнічае іх прафесійнаму росту і актыўнаму ўдзелу ў фундаментальных і прыкладных навуковых даследаваннях, міжнародных праграмах і праектах, канферэнцыях, семінарах і конкурсах. Акрамя таго, мы прадстаўляем інтарэсы маладых вучоных універсітэта на розных узроўнях і абараняем іх сацыяльныя правы”.
Мая методыка прадугледжвае прагноз паказчыкаў ураджайнасці асноўных сельскагаспадарчых культур нашай краіны з выкарыстаннем нейрасеткавых тэхналогій.
Свае навуковыя работы Алеся Мазоль прысвяціла праблемам прагназавання вытворчасці прадукцыі аграпрамысловага комплексу, што асабліва актуальна для сучаснага свету, для якога характэрны высокаканкурэнтныя рынкі, эканамічныя крызісы, зменлівыя ўмовы надвор’я і г.д.
“Неабходнасць наяўнасці ў менеджараў аграпрамысловых арганізацый разнастайных сродкаў кіравання актуалізавала выбар тэматыкі маёй работы і далейшую распрацоўку методыкі макраэканамічнага сярэднетэрміновага прагназавання аграпрамысловай вытворчасці нашай краіны. Мае даследаванні прысвечаны стварэнню комплексу эканоміка-матэматычных мадэлей абгрунтавання і распрацоўкі стратэгічных праграм развіцця АПК. Методыка прагназавання грунтуецца на выкарыстанні ўзаемазвязаных нейрасеткавых і аптымізацыйных мадэлей, што і дае вынікі з мінімальнымі хібамі. Праведзеныя мной даследаванні дазваляюць не толькі аптымізаваць пасевы розных культур у краіне, улічваючы розныя рызыкі, але і пашырыць знешні рынак спажыўцоў“, — акцэнтавала ўвагу даследчыца.
Па яе словах, у БДЭУ да навукі падыходзяць вельмі сур’ёзна, а маладым вучоным дапамагаюць рэалізаваць свой творчы і навуковы патэнцыял. Прафесарска-выкладчыцкі склад і савет маладых вучоных заўсёды дапамагаюць студэнтам не толькі ў падрыхтоўцы работ, але і ў арганізацыйных пытаннях. Акрамя таго, у нашым універсітэце студэнты могуць скончыць магістратуру і аспірантуру па эканамічных спецыяльнасцях з прысваеннем адпаведных навуковых ступеней. Таму магу з гордасцю заявіць: у БДЭУ створаны ўсе ўмовы для развіцця навуковай дзейнасці!” — рэзюмавала А.А.Мазоль.
Вольга АНТОНЕНКАВА.
Фота Алега ІГНАТОВІЧА.
