Падведзены вынікі рэспубліканскай выставы-конкурсу дзіцячай творчасці “Арх-Навацыя-2022”. Адабраць найлепшыя з трох соцень жывапісных і графічных малюнкаў, калажаў, архітэктурных макетаў, мастацкіх фатаграфій, відэаролікаў было няпроста. Дзіцячыя фантазіі і мары на архітэктурную тэматыку ўвасобіліся ў фарбах, мастацкіх творах з паперы, кардону, гофракардону, пластыку, запалак і зубачыстак. Каб разгледзець усе творы-пераможцы, спатрэбіцца не адзін дзень.
Калі ажываюць малюнкі
У намінацыі “Жывапіс” перамогу атрымала 17гадовая Вікторыя Герасімава за работу “Стары Бабруйск”.
На трох малюнках дзяўчыны, выкананых у змешанай тэхніцы з прымяненнем акварэлі і пастэлі, нібы ажываюць ціхія ўтульныя вулачкі і панадворкі старога горада з цаглянымі кварталамі дыхтоўнай цаглянай забудовы — спадчынай перыяду дарэвалюцыйнага каменнага будаўніцтва.
— Работы выконваліся акварэллю з натуры, калі мы з некалькімі групамі выхаванцаў адправіліся на пленэр зрабіць эцюдныя замалёўкі гарадскога пейзажу, — расказвае пра гісторыю стварэння малюнкаў Ядвіга Жураўлёва, педагог дадатковай адукацыі студыі выяўленчага мастацтва “Палітра” Цэнтра дадатковай адукацыі дзяцей і моладзі Бабруйска, дзе Вікторыя займаецца з 9 гадоў. — Фокус увагі юных жывапісцаў быў засяроджаны на яркіх архітэктурных аб’ектах і элементах гістарычнай часткі горада. Сярод іх — яўрэйскі квартал, Бабруйская крэпасць, касцёл.
***
Будаўніцтва ў шэсць рук
На конкурсе “Арх-Навацыя-2022” Лідскі квартал атрымаў новае жыццё дзякуючы юным краязнаўцам з Гродна.
Самы маштабны архітэктурны макет пад назвай “Ансамбль. Рыначная плошча і школьны двор г.Ліды (1940 г.)” прынёс 1-е месца Мацвею Мікшалю, Раману Кічынскаму, Яраміру Леванене, выхаванцам краязнаўчай школы “Прысак” Цэнтра творчасці дзяцей і моладзі “Прамень” Гродна. Праект больш чым з 30 (!) будынкаў уразіў журы не толькі памерам, але і мастацка-гістарычнай каштоўнасцю, дакладнасцю выканання.
На першапачатковым этапе педагог дадатковай адукацыі Ігар Лапеха з дапамогай калег-краязнаўцаў з Ліды і супрацоўнікаў мясцовага музея сабраў неабходную для рэканструкцыі інфармацыю: адшукаў старыя фатаграфіі, план забудовы.
***
Газеты, нажніцы, папера…
Сярод лепшых работ у намінацыі “Калаж” — чорнабелая вулачка Траецкага прадмесця Вікторыі Хацілоўскай.
Вікторыя займаецца ў аб’яднанні па інтарэсах “Акварэлька” Жлобінскага гарадскога цэнтра творчасці дзяцей і моладзі “Эўрыка”, якім 14 гадоў кіруе Тамара Емяльяненка. Дарэчы, для педагога гэты конкурс стаў вельмі ўраджайным. Акрамя дыплома I ступені, яе выхаванцы прывезлі яшчэ тры дыпломы II ступені: два — за работы ў намінацыі “Стрыт-арт” і адзін — у намінацыі “Графіка”.
— Калаж, які паказвае адну з вулачак Траецкага прадмесця ў Мінску, ствараўся няпроста, — раскрывае сакрэты творчага працэсу педагог. — Складанасць была ў тым, што мы вырашылі выкарыстоўваць толькі выразкі з чорна-белых газет, не дадаючы іншых колераў.
Падрабязней пра работы пераможцаў – у матэрыяле Марыны Куняўскай у нумары ад 13 снежня 2022 года.
