Навучэнцы гімназіі № 1 Слуцка прынялі ўдзел у XXX Усерасійскім адкрытым конкурсе юнацкіх даследчых работ імя У.І. Вярнадскага і ў VII Усерасійскім конкурсе даследчых работ навучэнцаў «Сцежкай адкрыццяў У.І. Вярнадскага», паведамляе карэспандэнт «Настаўніцкай газеты».
Навучэнцы гімназіі № 1 Слуцка вызначыліся адразу ў некалькіх намінацыях.
— Работа вучаніцы 9-га класа Аліны Гурскай «Фізіка і астраномія» і работа навучэнкі 11-га класа Паліны Казлоўскай у секцыі «Хімія» адзначаны дыпломамі лаўрэатаў, — расказала дырэктар установы адукацыі Алена Міронава. — Дзяўчат да конкурсу рыхтавалі настаўніца фізікі Таццяна Максіменка і настаўніца біялогіі Ганна Мартышэнка.
Акрамя гэтага, работа навучэнца 5-га класа Уладзіслава Тарасенкі і навучэнца 7-га класа Арцёма Нядзелькі адзначаны дыпломамі I ступені. Іх да конкурсу таксама рыхтавала Т. Максіменка.
— Вельмі прыемна, што наша настаўніца фізікі прадставіла вопыт сваёй работы ў метадычнай секцыі педагогаў па тэме «Арганізацыя даследчай дзейнасці па касмічнай тэматыцы» і атрымала рэкамендацыю для выдання ў навукова-метадычным часопісе «Даследчык/Researcher» Маскоўскага дзяржаўнага педагагічнага ўніверсітэта, — з гордасцю адзначыла А. Міронава.
Наталля САХНО
