Пра тое, якіх поспехаў чакаюць педагогі Валожынскага раёна ў 2023/2024 навучальным годзе і чаго ўжо ўдалося дасягнуць, карэспандэнту “Настаўніцкай газеты” расказвае начальнік упраўлення па адукацыі, спорце і турызме Валожынскага райвыканкама Таццяна Крыкало.
— У Валожынскім раёне працуюць 27 устаноў адукацыі, сярод якіх 15 — агульнай сярэдняй адукацыі, — расказвае Таццяна Мікалаеўна. — Мы нядрэнна падрыхтаваліся да новага навучальнага года. На гэтыя мэты было накіравана больш за 1,3 млн рублёў з абласнога і мясцовага бюджэтаў, праведзены рамонтныя работы, набыты сучасныя сродкі навучання. За мінулыя гады за кошт сродкаў рэспубліканскага бюджэту 6 устаноў агульнай сярэдняй адукацыі раёна атрымалі 12 сучасных кабінетаў — фізікі, хіміі, біялогіі, працоўнага навучання. Цяпер ажыццяўляецца пастаўка кабінетаў працоўнага навучання ў Багданаўскую і Пяршайскую сярэднія школы. Адкрыты новыя рэсурсныя цэнтры: STEM-цэнтр у гімназіі № 1 Валожына, цэнтр па прадмеце “Працоўнае навучанне. Абслуговая праца” ў сярэдняй школе № 1 Валожына, цэнтры “Мы — беларусы” і “Азбука бяспекі” ў Дашкольным цэнтры развіцця дзіцяці г.п.Івянец.
У 2023/2024 навучальным годзе пачата рэалізацыя трох новых абласных педагагічных праектаў, разлічаных на тры гады. Так, у Ракаўскім дзіцячым садзе “Сонейка” Валожынскага раёна ўкараняюць сістэму фарміравання ўяўленняў дзяцей старэйшага дашкольнага ўзросту аб прадметах дэкаратыўна-прыкладнога мастацтва інтэрактыўнымі сродкамі. У раённым Цэнтры творчасці дзяцей і моладзі будзем фарміраваць ключавыя кампаненты функцыянальнай дасведчанасці навучэнцаў ва ўмовах кампетэнтнасна арыентаванага адукацыйнага асяроддзя, а ў раённым ЦКРНіР — сацыяльна-камунікатыўныя ўменні ў навучэнцаў з цяжкімі, множнымі парушэннямі ў фізічным і (або) псіхічным развіцці праз сумесную дзейнасць з аднагодкамі, якія развіваюцца тыпова.
— Як наладжана работа з маладымі спецыялістамі? Які працэнт замацавальнасці маладых кадраў?
— У раёне сёлета прыступілі да работы 15 маладых спецыялістаў, замацавальнасць маладых кадраў склала 72,4%. Дарэчы, сёлета мы выдалі 48 мэтавых накіраванняў нашым выпускнікам, з іх 13 — на педагагічныя спецыяльнасці.
Штогод у верасні мы сустракаемся з маладымі спецыялістамі, якія прыбылі на першае працоўнае месца, каб азнаёміць маладых калег з сістэмай сацыяльна-эканамічнай падтрымкі і стымулявання педагогаў, наладзіць эфектыўнае ўзаемадзеянне і супрацоўніцтва паміж маладымі спецыялістамі, педагагічнай грамадскасцю раёна і кіраўніцтвам. Таксама маладыя педагогі знаёмяцца з вопытам работы старэйшых калег, наведваюць заняткі настаўнікаў, якія творча працуюць, атрымліваюць кансультацыі.
— Кім і чым вы ганарыцеся ў Валожынскім раёне?
— У 2023 годзе тры адзінаццацікласнікі ўстаноў адукацыі раёна атрымалі стабальныя вынікі: два — на цэнтралізаваных экзаменах, адзін — на цэнтралізаваным тэсціраванні. Мне прыемна назваць іх імёны: Леанід Сухадольскі (гімназія № 1 Валожына, ЦЭ па рускай мове), Настасся Каваленка (Ракаўская сярэдняя школа, ЦЭ па беларускай мове) і Ксенія Жукоўская (сярэдняя школа № 1 Валожына, ЦТ па грамадазнаўстве). У заключным этапе Рэспубліканскай алімпіяды па вучэбным прадмеце “Працоўнае навучанне” стала пераможцай навучэнка сярэдняй школы № 1 Валожына Алена Рубан. Пераможцамі рэспубліканскага конкурсу работ даследчага характару (канферэнцыі) навучэнцаў па вучэбных прадметах названы Арцём Сікорскі (геаграфія, гімназія № 1 Валожына) і Віялета Сяўрук (гісторыя, Суднікоўская сярэдняя школа).
У раёне працуюць два настаўнікі-метадысты, тры педагогі ўдастоены звання “Выдатнік адукацыі Рэспублікі Беларусь”.
Валожынская зямля ўнікальная і цудоўная. Каб паказаць гэта ўсім, раённым Цэнтрам творчасці дзяцей і моладзі распрацаваны турыстычныя маршруты, самыя папулярныя з якіх — аграгарадок Ракаў і гарадскі пасёлак Івянец з іх славутасцямі, аграгарадкі Багданаў і Вішнева, дзе жыў і тварыў сусветна вядомы мастак Фердынанд Рушчыц. Бачыце, нам ёсць чым ганарыцца.
— Мы сустракаемся з вамі ў Тыдзень бацькоўскай любові, паміж Днём маці і Днём бацькі. Як у вас пабудавана ўзаемадзеянне з бацькамі навучэнцаў? Як яго можна палепшыць, на ваш погляд?
— Па маім перакананні, паспяховасць выхаваўчага працэсу залежыць ад таго, як складваюцца адносіны паміж педагогамі, навучэнцамі і бацькамі. Бацькі і педагогі — выхавальнікі адных і тых жа дзяцей, і вынік выхавання можа быць паспяховым толькі тады, калі настаўнікі і бацькі стануць саюзнікамі. Узаемадзеянне ўстаноў адукацыі з сем’ямі нашых вучняў накіравана на актыўнае ўключэнне бацькоў у адукацыйны працэс, у пазаўрочную дзейнасць, супрацоўніцтва з дзецьмі і педагогамі. У бягучым навучальным годзе ва ўстановах адукацыі працягвае сваю работу “Бацькоўскі ўніверсітэт”, створаны і дзейнічаюць бацькоўскія клубы: “Сям’я” ў сярэдняй школе № 2 Валожына і “Тата +” у сярэдняй школе № 1 Валожына.
— Што больш за ўсё хвалюе сёння начальніка ўпраўлення па адукацыі, спорце і турызме Валожынскага райвыканкама?
— Начальніка хвалююць абсалютна ўсе пытанні: ад дашкольнай адукацыі да выбару прафесіі выпускнікамі. Мне важна, каб кожнае дзіця знайшло сябе, не згубілася ў жыцці, атрымала прафесію, а можа, і вярнулася на работу ў раён. Хвалююць пытанні сацыяльна небяспечнага становішча дзяцей у сем’ях. Кожная праблемная сям’я патрабуе індывідуальнага падыходу, даводзіцца ва ўсё ўнікаць, старанна разбірацца ў кожнай канкрэтнай сітуацыі. У наступным годзе ў Валожыне пройдуць абласныя “Дажынкі”, таму зараз пад маім кантролем рамонтныя работы фасадаў устаноў адукацыі, добраўпарадкаванне тэрыторыі. Хочацца прыняць гасцей годна, каб мерапрыемства ім запомнілася і спадабалася. Як педагога мяне, несумненна, хвалюе пытанне якасці адукацыі, у тым ліку арганізацыі і правядзення цэнтралізаваных экзаменаў. Хочацца, каб усё прайшло дакладна і зладжана, бо ад гэтага залежыць будучыня нашых дзяцей.
Наталля КАСТЭНКА
Фота аўтара
