Як прымусіць ідэю працаваць? Спачатку трэба знайсці людзей, якія яе зразумеюць і прымуць. А пасля можна прыступаць да рэалізацыі. Мы запусцілі новы праект: на партале “Педагагічнай прэсы” з’явілася рубрыка “Клуб “Крыштальны журавель”.
Ідэя ўзнікла падчас пасяджэння клуба “Крыштальны журавель”. Некалькі тыдняў яна проста сядзела ў галаве, а пасля была агучана ў кабінеце дырэктара Выдавецкага дома “Педагагічная прэса”. Яе падтрымалі і кіраўнік, і яго першы намеснік. Мы натхніліся і запрасілі на сустрэчу старшыню і членаў клуба, каб абмеркаваць дэталі новага сумеснага праекта, сэнс якога ў метадычным суправаджэнні педагогаў.
Тады мы дамовіліся, што ў новай рубрыцы з’явяцца ўрокі, майстар-класы, сцэнарыі мерапрыемстваў членаў клуба. Так мы зможам не толькі папулярызаваць дзейнасць клуба, але і стаць платформай для абмену перадавым педагагічным вопытам. Метадычныя матэрыялы заўсёды запатрабаваны ў педагагічнай грамадскасці. А такіх мэтраў, якія ўваходзяць у клуб, вывучаюцца ў першую чаргу. Гэтыя педагогі заўсёды на перадавой, яны першыя апрабуюць новыя методыкі і тэхналогіі, распрацоўваюць свае падыходы да іх рэалізацыі, а затым вучаць сваіх калег.
“Такі фармат узаемадзеяння пашырыць прафесійныя магчымасці даўніх членаў клуба і паслужыць стымулам для тых, хто да нас далучыўся нядаўна. Абмен педагагічным вопытам неабходны ўсім прадстаўнікам настаўніцкай грамадскасці, бо гэта заўсёды крок наперад у рэалізацыі прафесійных задум і агульнай справе па павышэнні якасці адукацыі нашых вучняў”, — адзначыў тады старшыня клуба настаўнік інфарматыкі Лошніцкай раённай гімназіі Барысаўскага раёна Іван Якіменка.
А цяпер мы з гонарам паведамляем, што ідэя запрацавала! І калі вы клінеце на партале nastgaz.by на “Клуб “Крыштальны журавель”, то знойдзеце арыгінальныя распрацоўкі прызнаных мэтраў айчыннай методыкі.
Напрыклад, праект настаўніцы пачатковых класаў намесніка дырэктара па вучэбнай рабоце гімназіі № 1 Оршы Святланы Емяльянавай-Раманоўскай, якая прадставіла пазакласнае мерапрыемства з выкарыстаннем прыёмаў мнематэхнікі.
Або міжпрадметны, насычаны і дынамічны ўрок па інфарматыцы для 9 класа, які распрацавалі настаўніцы інфарматыкі Вольга Счасновіч (Варатынская сярэдняя школа Бабруйскага раёна) і Святлана Пузіноўская (сярэдняя школа № 4 Дзяржынска).
Алена Гарбар, класны кіраўнік 5 класа сярэдняй школы № 42 Мінска, дзеліцца інтэрактыўнымі метадамі для работы з дзіцячым калектывам. А настаўніца інфарматыкі сярэдняй школы № 7 Калінкавіч Вольга Афанасьева дае майстар-клас “Выкарыстанне сродкаў візуалізацыі на ўроках інфарматыкі для развіцця інфармацыйна аналітычных уменняў вучняў”.
Падчас планавання дзейнасці клуба “Крыштальны журавель” на 2024 год была агучана скразная тэма “Удасканаленне прафесійнай кампетэнтнасці настаўніка па пытаннях развіцця і выхавання асобы навучэнца”, у межах якой настаўнікі працуюць над вырашэннем праблемных педагагічных сітуацый, а мы чакаем актуальных распрацовак, парад і прапаноў, каб сфарміраваць новую метадычную скарбонку.
