Педагогі Аляксандр Мікалаевіч і Алена Уладзіміраўна Ляшкевіч з Высокаўскай сярэдняй школы Камянецкага раёна заўсёды разам: і дома, і на рабоце. І зусім не дакучаюць адно аднаму, бо аб’яднаны любімай прафесіяй. Падрабязнасці – у матэрыяле карэспандэнта “Настаўніцкай газеты”.
Ён — настаўнік матэматыкі і інфарматыкі, яна — настаўніца беларускай мовы і літаратуры. Розныя не толькі ў прадметах выкладання, але і па характары: ён спакойны і негаваркі, яна эмацыянальная і гаварлівая. Класічны саюз фізіка і лірыка.
Аляксандр Мікалаевіч захапляўся матэматыкай са школьных гадоў. Калі надышоў час выбіраць прафесію, не раздумваючы, вырашыў паступаць на матэматычны факультэт БрДУ імя А.С.Пушкіна. Пасля яго заканчэння вярнуўся на малую радзіму, дзе 12 гадоў працаваў у Воўчынскай сярэдняй школе, а потым з жонкай, якую сустрэў там, перайшоў у Высокаўскую сярэднюю школу, што некалі скончыў. Тут ён уцягнуўся ў алімпіядны рух і навукова-даследчую дзейнасць з вучнямі.
“Галоўнае — не стаяць на месцы”, — любіць паўтараць Аляксандр Мікалаевіч. І даказвае гэта штодзённай працай, вынікам якой з’яўляюцца шматлікія перамогі выхаванцаў у прадметных алімпіядах, навукова-практычных канферэнцыях, конкурсах і турнірах рознага ўзроўню.
Педагог павышае вучэбную матывацыю дзяцей уласным прыкладам і практычнымі сродкамі. Вельмі дапамагае ў гэтым школьны STEM-цэнтр, адкрыты 3 гады назад. Пад кіраўніцтвам настаўніка вучні 2—11 класаў займаюцца 3D-мадэляваннем, робататэхнікай, Scratch-праграмаваннем і распрацоўкай беспілотных лятальных апаратаў. Уменні і навыкі, атрыманыя ў школе, дзеці замацоўваюць і пашыраюць у Нацыянальным дзіцячым тэхнапарку. Поспехі выхаванцаў, некаторыя з якіх з’яўляюцца стыпендыятамі спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў, акрыляюць і натхняюць Аляксандра Мікалаевіча працаваць яшчэ лепш.
На рахунку педагога і школьнікаў шмат цікавых праектаў: аўтаномны аўтамабіль а-ля “Тэсла”, разумнае смеццевае вядро, робарука, робат-футбаліст, дыягнастычныя сістэмы аналізу гукаў сэрцабіцця і дыябетычнай рэцінапатыі. Ідэі для творчага пошуку Аляксандр Мікалаевіч бярэ з жыцця і на дасягнутым не спыняецца: кожны праект адкрывае дарогу да новага.
Не адстае ад мужа і Алена Уладзіміраўна, якая любіць абмеркаваць з ім яго і свае ідэі, каб дапамагчы адно аднаму ў іх рэалізацыі. У творчым тандэме працаваць куды больш цікава і вынікова.
Алена Уладзіміраўна таксама родам з Камянеччыны. Выпускніца тагачаснага Баранавіцкага педвучылішча і БДПУ.
Павышаць матывацыю вучняў да прадмета настаўніцы дапамагаюць алімпіяды і навукова-даследчая дзейнасць. Пад кіраўніцтвам педагога вучні аналізуюць моўныя асаблівасці і робяць параўнальныя характарыстыкі мастацкіх твораў беларускіх пісьменнікаў, што дазваляе глыбей асэнсаваць іх.
Здольных дзяцей Алена Уладзіміраўна адбірае ў 5—6 класах і мэтанакіравана працуе з імі. Вучні выконваюць алімпіядныя заданні, атрымліваюць даследчыя заданні на лета, удзельнічаюць у творчых конкурсах…
У рабоце педагог аддае перавагу праектнай дзейнасці і ІКТ, дзякуючы якім лепш засвойваецца вучэбны матэрыял. З дапамогай мужа Алена Уладзіміраўна асвоіла Scratch-праграмаванне, якім займаецца з малодшымі школьнікамі. На аснове літаратурных твораў дзеці ствараюць гульні, віктарыны, анімацыю…
Асаблівая гордасць — 2 мабільныя дадаткі — вучэбныя трэнажоры “Вывучай мову.by” і “Вывучай фанетыку.by”, якія дапамагаюць разабрацца ў марфеміцы і фанетыцы, праверыць і замацаваць веды, падрыхтавацца да цэнтралізаванага тэсціравання.
А каб вучні не забывалі народную культуру і традыцыі, Алена Уладзіміраўна ладзіць тэатралізаваныя пастаноўкі на аснове мясцовага фальклору.
Дружнай педагагічнай сям’і няма калі сумаваць. Аляксандр Мікалаевіч і Алена Уладзіміраўна выдатна разумеюць адно аднаго, бо знаходзяцца, як самі кажуць, на адной хвалі, у тым ліку з вучнямі і трыма ўласнымі дзецьмі, якія разам з бацькамі штодзень ходзяць у адну школу. Гэта таксама да многага абавязвае і прымушае трымаць высокую планку прафесіяналізму. І з такой задачай педагогі паспяхова спраўляюцца.
— Аляксандр Мікалаевіч і Алена Уладзіміраўна Ляшкевіч — адметныя педагогі з уласным настаўніцкім почыркам, — гаворыць дырэктар Высокаўскай сярэдняй школы Валянціна Патрабенка. — Яны шчыра любяць дзяцей, радуюцца іх поспехам, гараць любімай справай і літаральна фантаніруюць ідэямі. Мы ганарымся, што ў нашай установе працуе таленавітая педагагічная сям’я, якая паказвае добры прафесійны прыклад моладзі.
Сяргей ГРЫШКЕВІЧ
