Прадукцыйнай атрымалася рабочая паездка прадстаўніцтва Міністэрства адукацыі на чале з міністрам у Рэспубліку Экватарыяльная Гвінея, паведамляе карэспандэнт “Настаўніцкай газеты”.
У межах візіту прайшла сустрэча міністра адукацыі Рэспублікі Беларусь Андрэя Іванца з рэктарам і кіруючым складам Нацыянальнага ўніверсітэта Экватарыяльнай Гвінеі. Дэлегацыя наведала новы ўніверсітэцкі кампус, які знаходзіцца ў раёне аэрапорта. Будоўля — на этапе завяршэння.
У рамках перагавораў бакі абмеркавалі наступныя пытанні:
- падрыхтоўка кадраў у сферы медыцыны, бо ў Гвінеі ёсць праблема недахопу вузканакіраваных спецыялістаў у гэтай сферы;
- распрацоўка формулы навучання студэнтаў з Экватарыяльнай Гвінеі ў Беларусі, выпрацоўка патрабаванняў да вучэбных праграм пры прыёме студэнтаў-медыкаў для працягу навучання па медыцынскім профілі ў нашай краіне;
- магчымасць падпісання дагавораў аб міжуніверсітэцкім супрацоўніцтве.
Акрамя таго, міністр адукацыі Андрэй Іванец правёў рабочую сустрэчу з міністрам адукацыі, навукі, універсітэцкага і прафесійнага навучання Экватарыяльнай Гвінеі. Кіраўнікі ведамстваў абмеркавалі падрыхтоўку спецыялістаў для работы з дзецьмі з асаблівасцямі развіцця і прафесійных кадраў для развіцця інжынерыі і сельскай гаспадаркі.
У выніку Беларусь і Экватарыяльная Гвінея дамовіліся наладзіць супрацоўніцтва ў галіне падрыхтоўкі кадраў па некаторых спецыяльнасцях вышэйшай, прафесійна-тэхнічнай і сярэдняй спецыяльнай адукацыі.
У рамках афіцыйнага візіту міністра адукацыі Андрэя Іванца дасягнуты дамоўленасці аб падрыхтоўцы спецыялістаў у сферы медыцыны, прафесійных кадраў у галіне інжынерыі і сельскай гаспадаркі, аб павышэнні кваліфікацыі прафесарска-выкладчыцкага складу.
Дамоўленасць дасягнута на першым пасяджэнні рабочай групы па пытаннях супрацоўніцтва ў сферы адукацыі паміж Беларуссю і Экватарыяльнай Гвінеяй, якое прайшло ў Міністэрстве адукацыі, навукі, універсітэцкага і прафесійнага навучання Экватарыяльнай Гвінеі. У мерапрыемстве прынялі ўдзел першы намеснік міністра адукацыі Беларусі Аляксандр Бахановіч, прадстаўнікі БДТУ, БНТУ і БДУ. Ад Экватарыяльнай Гвінеі ўдзельнічалі прадстаўнікі міністэрства на чале з міністрам-дэлегатам Пурыфікасьён Бухара Ласакера.
Бакі будуць наладжваць супрацоўніцтва ў галіне падрыхтоўкі кадраў па інжынерных, інжынерна-тэхнічных, інжынерна-педагагічных, тэхналагічных, сельскагаспадарчых спецыяльнасцях вышэйшай адукацыі, па спецыяльнасцях прафесійна-тэхнічнай і сярэдняй спецыяльнай адукацыі, а таксама ў сферы навучання грамадзян рускай мове.
Беларусь і Экватарыяльная Гвінея будуць развіваць супрацоўніцтва і ў навукова-тэхнічнай сферы. Такія намеры былі пацверджаны падчас пасяджэння сумеснай беларуска-экватагвінейскай рабочай групы па супрацоўніцтве ў гэтай сферы. Яно прайшло пад кіраўніцтвам намесніка старшыні Дзяржаўнага камітэта па навуцы і тэхналогіях Беларусі Таццяны Сталяровай і Генеральнага сакратара Міністэрства транспарту, пошты і новых інфармацыйных і камунікацыйных тэхналогій Экватарыяльнай Гвінеі Хуана Карласа Абія Бітэа Рока.
Бакі абмеркавалі прыярытэтныя напрамкі ўзаемадзеяння на 2024—2025 гады, пытанні паставак высокатэхналагічнай навукаёмістай прадукцыі і супрацоўніцтва паміж навуковымі арганізацыямі, магчымасці ўдзелу ў навукова-тэхнічных мерапрыемствах і правядзення сумеснага беларуска-экватагвінейскага конкурсу навукова-тэхнічных праектаў.
Па матэрыялах сайта Мінадукацыі і БелТА
падрыхтавала Вольга ДУБОЎСКАЯ
Фота з Telegram-канала Мінадукацыі
