Ігар ГРЭЧКА
Шчаслівы той мужчына, які працуе ў жаночым калектыве…
Cакавіцкае надвор’е надзвычай зменлівае. Што будзе заўтра (снег, дождж, сонца, моцны вецер або ўсё адразу), спрагназаваць складана. Аднак з упэўненасцю можна сказаць: 8 сакавіка на вуліцах беларускіх гарадоў і вёсак чакаецца рэзкае павелічэнне колькасці мужчын з букетамі кветак. Ружы, мімозы і, канечне, цюльпаны дабавяць у шэрыя колеры ранняй вясны яркія фарбы, а ў жаночыя сэрцы — цеплыню і пяшчоту. Бо што трэба жанчыне для простага шчасця? Мужчынская ўвага і клопат!
Калектыў “Настаўніцкай газеты” пераважна жаночы. Невыпадкова маё прафесійнае станаўленне (як і прафесійнае станаўленне большасці мужчын-педагогаў) праходзіла сярод жанчын. Добра помню іх парады пра тое, як размаўляць з аўтарамі, як браць інтэрв’ю, як паводзіць сябе ў камандзіроўках, нарэшце, як пісаць тэксты, каб іх з цікавасцю чыталі. За гэта вялікі дзякуй маім больш вопытным калегам і ў першую чаргу нашаму старэйшаму супрацоўніку Але Мікалаеўне Клюйко.
Прафесіяналізм журналістаў у многім залежыць ад прафесіяналізму кіраўніка. Вельмі важна, што галоўны рэдактар Кацярына Эдуардаўна Дубінская на ўласным прыкладзе паказвае калегам, што журналістыка — гэта не проста прафесія, гэта лад жыцця. Гэта пастаянныя камандзіроўкі, сустрэчы з людзьмі, гэта неабыякавасць да любой справы, за якую бярэшся, гэта, нарэшце, неабыякавасць да жыцця.
На нашым мужчынскім прафесійным шляху сустракаюцца розныя жанчыны. Кожная са сваім характарам, інтарэсамі, поглядам на жыццё, адметным унутраным светам. Кожная з іх непаўторная, але ўсіх беларускіх жанчын аб’ядноўвае адно вельмі важнае слова — неабыякавасць. Ім неабыякавы лёс сваёй краіны, сям’і, родных; неабыякава, што адбываецца на рабоце, як складваюцца адносіны з калегамі. Ініцыятыўныя, у пастаянным творчым пошуку, яны не лічацца ні з часам, ні з цяжкасцямі прафесіі. І як пры такім рытме жыцця журналісткі, настаўніцы знаходзяць час на сям’ю, хобі, а яшчэ час быць прыгожымі? Для нас, мужчын, гэта таямніца.
Працуючы ў жаночым калектыве, мужчына часта становіцца міжвольным сведкам размоў на розныя бытавыя тэмы. Хтосьці лічыць гэта мінусам. У мяне іншае меркаванне. Шмат цікавага і карыснага можна пачарпнуць з гэтых размоў, напрыклад, як выхоўваць дзяцей, якія ўзроставыя праблемы сыноў і дачок чакаюць бацькоў і як спраўляцца з гэтымі праблемамі, у якія гурткі лепш запісаць сваё дзіця, да якога доктара схадзіць на прыём. Але самае галоўнае, падчас гэтых размоў даведваешся, што хвалюе жанчын, і, адпаведна, ведаеш, як паводзіць сябе з імі ў той ці іншай сітуацыі. Як бачым, плюсоў работы ў жаночым калектыве шмат.
З надыходзячым святам, дарагія жанчыны! Няхай ваша жыццё будзе напоўнена душэўнай цеплынёй і шчырымі ўсмешкамі, а побач з асабістым шчасцем будуць прафесійныя поспехі. І няхай сярод вашых калег усё ж такі будзе больш мужчын!