Падчас бягучай прыёмнай кампаніі на ўзровень сярэдняй спецыяльнай адукацыі ў каледжы Міншчыны будуць прыняты больш чым 3000 чалавек. З іх 2657 будуць вучыцца на бюджэце, а 355 выпускнікоў школ прымуць на платную форму навучання, паведамляе карэспандэнт “Настаўніцкай газеты”.
“За кошт сродкаў бюджэту адноўлены прыём на некаторыя спецыяльнасці дзённай формы навучання, якія прапануюць у Барысаве і Нясвіжы”, — звярнуў увагу начальнік галоўнага ўпраўлення па адукацыі Мінаблвыканкама Мікалай Башко.
Для таго каб задаволіць патрэбы ўстаноў адукацыі цэнтральнага рэгіёна ў педагагічных кадрах, кантрольныя лічбы прыёму па профілі “Педагогіка” за кошт сродкаў бюджэту на дзённую форму таксама будуць павялічаны.
“На Міншчыне адчуваецца ў тым ліку недахоп майстроў вытворчага навучання, — звярнуў увагу Мікалай Башко. — Каб вырашыць гэтую праблему, Капыльскі дзяржаўны каледж на “Тэхнічнае абслугоўванне і рамонт сельскагаспадарчай тэхнікі (педагагічная дзейнасць)” прыме 30 выпускнікоў школ, а ў Вілейскім дзяржаўным каледжы на адпаведную спецыяльнасць будуць залічаны 25 чалавек”.
На ўзровень ПТА ў каледжы Мінскай вобласці сёлета паступяць больш як 3400 навучэнцаў. У адпаведнасці з заяўкамі і дагаворамі аб узаемадзеянні ў дзевяці ўстановах адукацыі і ў Чэрвеньскім будаўнічым каледжы плануецца аднавіць навучанне па многіх напрамках. Так, Жодзінскі дзяржаўны каледж будзе набіраць на спецыялізацыю “Каваль на молатах і прэсах”, Чэрвеньскі дзяржаўны каледж пачне навучанне па кірунку “Аператар камп’ютарнай графікі”, Капыльскі дзяржаўны каледж прапануе паступаць на электраманцёра ахоўна-пажарнай сігналізацыі, Маладзечанскі дзяржаўны каледж — на аператара швейнага абсталявання, а ў Салігорскім дзяржаўным каледжы можна будзе атрымаць спецыяльнасць “Слесар па абслугоўванні і рамонце газавыкарыстоўваючага абсталявання”.
Мастацкі профіль
У Нясвіжскі дзяржаўны каледж імя Якуба Коласа можна пайсці вучыцца на спецыяльнасці “Навучанне замежнай мове (нямецкая)” і “Дызайн (графічны)”.
Дырэктар установы адукацыі Алена Жураўлёва расказала, што спецыяльнасць “Дызайн (графічны)” няновая: набор на яе вядзецца кожныя два гады.
“Першапачаткова кіраваліся тым, што на “Дызайн (графічны)” будзем прымаць згодна з запатрабаванасцю з боку заказчыкаў кадраў, — тлумачыць Алена Васільеўна. — Пасля атрымалася так, што некаторы час патрэбы ў адпаведных спецыялістах не было, таму прыём па названым напрамку не вёўся. Сёння час патрабуе аднавіць прыём будучых дызайнераў. Зараз мы выпускаем 4 курс, а значыць, ужо вельмі хутка будучыя спецыялісты паедуць на свае першыя працоўныя месцы. Таксама ў нас ёсць будучыя дызайнеры, якія скончылі 3 курс, перайшлі на апошні год навучання”.
Абітурыенты, якія аддадуць перавагу “Дызайну (графічнаму)”, будуць здаваць малюнак, жывапіс і кампазіцыю. Таксама конкурсныя выпрабаванні чакаюць тых, хто паступае на “Фізічную культуру”.
Пасля заканчэння каледжа выпускнікі з дыпломам дызайнера змогуць выкладаць у школе маляванне, весці мастацкія гурткі або працаваць у цэнтрах творчасці.
На спецыяльнасць “Навучанне замежнай мове (нямецкая)” сёлета адноўлены набор. Апошнім часам прыём на яе вёўся кожныя 2—3 гады. Па словах А.Жураўлёвай, заказчыкі кадраў загадзя падалі заяўкі на падрыхтоўку будучых выкладчыкаў.
“У адрозненне ад англійскай, запатрабаванасць у настаўніках нямецкай не вельмі высокая, — тлумачыць дырэктар установы. — Думалі, што з часам прыйдзецца адмовіцца ад падрыхтоўкі па напрамку “Навучанне замежнай мове (нямецкая)”, але нам паступілі заяўкі ад работадаўцаў. Такім чынам, у гэтым годзе набяром адну падгрупу па профілі “Навучанне замежнай мове (нямецкая)”. Заказчыкамі кадраў выступаюць самі ўстановы адукацыі, якім неабходны адпаведныя спецыялісты”.
Што тычыцца ўступных экзаменаў, то іх у Нясвіжскім дзяржаўным каледжы імя Якуба Коласа здаюць толькі тыя абітурыенты, якія паступаюць на “Дызайн (графічны)” і “Фізічную культуру”. Школьнікі, якія выбіраюць такія спецыяльнасці, як “Навучанне замежнай мове (англійская, нямецкая)”, “Пачатковая адукацыя”, “Дашкольная адукацыя”, залічваюцца без уступных іспытаў па конкурсе дакумента аб адукацыі.
Заканамерны крок
Сёлета аддзяленне швейных прафесій, цырульніцкага мастацтва і дэкаратыўнай касметыкі Барысаўскага дзяржаўнага каледжа папоўнілася кваліфікацыяй “тэрмаапрацоўшчык”.
“Мы будзем набіраць абітурыентаў на спецыяльнасць “Стварэнне швейных вырабаў”, па якой яны атрымаюць дзве кваліфікацыі: “швачка 4-га разраду” і “тэрмаапрацоўшчык швейных вырабаў 4-га разраду”, — расказвае дырэктар Барысаўскага дзяржаўнага каледжа Марына Несцярэнка.
Тое, што спецыяльнасць “Стварэнне швейных вырабаў” дапоўнілася яшчэ адной кваліфікацыяй, — заканамерны крок. Сёння гэты прафесійны напрамак запатрабаваны эканомікай, а значыць, яго трэба развіваць. Асноўнымі заказчыкамі кадраў у БДК з’яўляюцца буйныя беларускія прадпрыемствы, такія як Mark Formelle, “Світанак”, Eliz і інш.
На ўзроўні ПТА на аснове агульнай базавай адукацыі сёлета ў каледж будуць залічаны 435 чалавек, а на аснове агульнай сярэдняй адукацыі — 60.
“Да нас ва ўстанову прыязджаюць вучыцца з многіх раёнаў Мінскай вобласці, — працягвае М.Несцярэнка. — Усім, хто мае патрэбу, прадастаўляецца месца ў інтэрнаце. Іх у нас чатыры. Аддзяленне педагагічных прафесій, а таксама аддзяленне прафесій лясной, сельскай гаспадаркі і садова-паркавага будаўніцтва маюць свае інтэрнаты. Для астатніх аддзяленняў выдзелены яшчэ два інтэрнаты, прычым у адным жывуць хлопцы, а ў другім — дзяўчаты”.
Для паступлення амаль на ўсе спецыяльнасці, у тым ліку ўзроўню сярэдняй спецыяльнай адукацыі, дастаткова вытрымаць конкурс сярэдняга бала дакумента аб адукацыі. Выключэнне складае спецыяльнасць “Мастак-мадэльер”. Для тых, хто яе выбірае, прадугледжаны асобны іспыт — малюнак.
Тым выпускнікам школ, хто разглядае варыянт завочнай формы навучання, прапаноўваецца некалькі запатрабаваных эканомікай прафесій, у тым ліку адноўленая спецыяльнасць “Вытворчасць прадукцыі і арганізацыя грамадскага харчавання”.
“Сёлета на завочную бюджэтную форму атрымання адукацыі набіраем на дзве спецыяльнасці: “Гандлёвае абслугоўванне” і “Вытворчасць прадукцыі і арганізацыя грамадскага харчавання”, — працягвае дырэктар. — Акрамя гэтага, на ўзроўні ПТА адноўлены прыём па кваліфікацыі “аператар персанальных электронна-вылічальных машын 5-га разраду”. Такія групы мы набіраем кожныя тры гады. Яшчэ ў каледжы адноўлены прыём па кваліфікацыі “слесар-рамонтнік 4-га разраду” ў інтэграцыі з электраманцёрам ахоўна-пажарнай сігналізацыі. Раней набіралі выключна групу слесараў механазборачных работ і групу электраманцёраў ахоўна-пажарнай сігналізацыі, а сёлета зрабілі такую камбінацыю”.
У пераліку спецыяльнасцей Барысаўскага дзяржаўнага каледжа з’явіўся напрамак “Цырульніцкае мастацтва і дэкаратыўная касметыка”.
Незалежна ад выбранага напрамку ўсе выпускнікі каледжа забяспечваюцца гарантаваным першым працоўным месцам. Значна, што яшчэ падчас вучобы будучыя спецыялісты могуць зарэкамендаваць сябе на высокім узроўні і знайсці работадаўцаў.
“Па спецыяльнасцях, звязаных з грамадскім харчаваннем, выпускнікі могуць працаваць у шматлікіх арганізацыях. Напрыклад, кухары вельмі запатрабаваны і патрэбны паўсюль, — працягвае Марына Уладзіміраўна. — У гэтым пераліку школы, дзіцячыя сады, а таксама такая буйная арганізацыя, як “Веста-Барысаў” і інш.”
Пацвярджэннем таго, што каледж дае добрую базу для прафесійнага самаўдасканалення і развіцця, з’яўляюцца дасягненні навучэнца аддзялення грамадскага харчавання Івана Бурдыкі, які занесены ў банк даных адоранай моладзі і ў хуткім часе пойдзе працаваць у “Прэзідэнт-атэль”. Іван — адзін з лепшых навучэнцаў каледжаў Мінскай вобласці, пераможца V Рэспубліканскага конкурсу прафесійнага майстэрства навучэнцаў устаноў прафесійнай адукацыі па кампетэнцыях “Кулінарнае мастацтва” і “Хлебапячэнне”.
“Наш таленавіты Іван зрабіў партфоліа і разаслаў яго на самыя прэстыжныя прадпрыемствы, — расказвае аб прафесійным шляху лепшага пачынаючага кухара М.Несцярэнка. — Усе былі гатовы забраць нашага выпускніка, але Іван аддаў перавагу “Прэзідэнт-атэлю”, куды ён накіруецца па размеркаванні”.
Па словах дырэктара, грамадскае харчаванне — адно з найбольш папулярных аддзяленняў, на якое паступаюць дзеці з дастаткова высокім балам атэстата, як і на кваліфікацыі “слесар па рамонце аўтамабіляў”, “вадзіцель катэгорыі С”, “слесар па рамонце сельскагаспадарчых машын і абсталявання 3-га разраду” і “трактарыст-машыніст сельскагаспадарчай вытворчасці катэгорый С і Е”.
Наталля САХНО
Фота Алега ІГНАТОВІЧА
