Цырымонія ўзнагароджання прайшла з удзелам міністра адукацыі Андрэя Іванца і рэктара Акадэміі адукацыі Ірыны Старавойтавай, стаўшы кульмінацыйнай падзеяй рэспубліканскага семінара “Практычнае прымяненне тэхналогіі “Штучны інтэлект” для павышэння якасці адукацыйнага працэсу”, паведамляе карэспандэнт “Настаўніцкай газеты”.
Удзельнікамі семінара сталі фіналісты конкурсу метадычных распрацовак з выкарыстаннем тэхналогій штучнага інтэлекту. Для ўсіх зацікаўленых быў праведзены метадычны практыкум, у рамках якога члены рэспубліканскай творчай групы па выкарыстанні тэхналогій штучнага інтэлекту ў адукацыйным працэсе правялі майстар-класы і азнаёмілі з практычнымі кейсамі прымянення штучнага інтэлекту.
У конкурсе метадычных распрацовак з выкарыстаннем тэхналогій штучнага інтэлекту прынялі ўдзел больш за 400 педагагічных работнікаў устаноў агульнай сярэдняй, спецыяльнай, дадатковай адукацыі дзяцей і
моладзі; метадыстаў ІРА, раённых (гарадскіх) вучэбна-метадычных кабінетаў (цэнтраў).
Для ўдзелу ў конкурсе было заяўлена 415 работ. Конкурсныя матэрыялы прадстаўляліся ў трох намінацыях:
— распрацоўка ўрока з прымяненнем тэхналогій штучнага інтэлекту;
— распрацоўка пазакласнага мерапрыемства з прымяненнем тэхналогій штучнага інтэлекту;
— метадычны матэрыял па выкарыстанні тэхналогій штучнага інтэлекту ў адукацыйным працэсе: метадычны дапаможнік, рэкамендацыі, распрацоўка майстар-класа.
На першым этапе кожная работа ацэньвалася двума экспертамі ў адпаведнасці з распрацаванымі крытэрыямі, сярод якіх:
— абгрунтаванасць і мэтазгоднасць прымянення тэхналогій штучнага інтэлекту;
— адпаведнасць сучасным тэндэнцыям развіцця адукацыі;
— арыгінальнасць ідэі;
— уклад у дасягненне адукацыйных вынікаў;
— адпаведнасць распрацаваных заняткаў/мерапрыемства заяўленай мэце і задачам;
— магчымасць практычнага прымянення распрацоўкі ў адукацыйным працэсе з улікам наяўных рэсурсаў.
Работы фіналістаў конкурсу размешчаны на нацыянальным адукацыйным партале.
Фінальным этапам сустрэчы стала размова міністра адукацыі з педагагічнымі работнікамі аб перспектывах укаранення тэхналогій штучнага інтэлекту ў адукацыйны працэс, магчымасцях і рызыках. Як было заўважана, беларускія педагогі вельмі ўдумліва і метадычна абгрунтавана падыходзяць да выкарыстання тэхналогій ШІ.
Дыпломы І ступені атрымалі:
Вольга Лукша, намеснік дырэктара па вучэбнай рабоце Браслаўскай гімназіі імя І.М.Валчкова за майстар-клас “AI да урок! или Использование ИИ для подготовки и проведения учебного занятия по иностранному языку” (метадычны матэрыял па выкарыстанні тэхналогій штучнага інтэлекту ў адукацыйным працэсе);
Ганна Завадская, настаўніца інфарматыкі Новасамацевіцкай сярэдняй школы Касцюковіцкага раёна за пазакласнае мерапрыемства “Воіны-інтэрнацыяналісты — выпускнікі Самацевіцкай школы” (распрацоўка пазакласнага мерапрыемства з прымяненнем тэхналогій штучнага інтэлекту);
Анжаліка Маладцова і Софія Адамава, настаўніцы пачатковых класаў сярэдняй школы № 175 Мінска і сталічнай гімназіі № 10 імя двойчы Героя Савецкага саюза П.Я.Галавачова за ўрок рускай літаратуры ў 3 класе “Л.Н.Толстой “Акула”, “Мудрый старик”.
Вольга ДУБОЎСКАЯ
Фота БелТА
