Прывіццё дзецям адданасці Айчыне, гордасці за сваю краіну і народ лічыць галоўным у сваёй рабоце кіраўнік па ваенна-патрыятычным выхаванні сярэдняй школы № 40 Магілёва Віталь Хадановіч. Падрабязнасці – у матэрыяле карэспандэнта “Настаўніцкай газеты”.
Са сферай адукацыі і педагогікай Віталь Алегавіч звязаны амаль два з паловай дзесяцігоддзі. Доўгі час ён выкладаў геаграфію, пэўны перыяд быў намеснікам дырэктара. Новы раздзел у яго прафесійнай біяграфіі адкрыла ўвядзенне пасады кіраўніка па ваенна-патрыятычным выхаванні.
— Калі прапанавалі папрацаваць у гэтым кірунку, пагадзіўся не разважаючы. Я перакананы, што настаўніку неабходна як вучыць, так і выхоўваць. У свядомасці моладзі павінны быць не навязаныя звонку, а нашы, традыцыйныя культурныя каштоўнасці. Ваенруку трэба канцэнтраваць сваю дзейнасць менавіта на гэтым. Дапрызыўная падрыхтоўка, знаёмства з вайсковай службай першачарговыя. Але важней навучыць дзяцей любіць Радзіму, — упэўнены Віталь Хадановіч.
Фарміраваць у вучняў патрыятычныя пачуцці Віталь Алегавіч пачынае з моманту іх прыходу ў школу. Выхаваўчай работай ахоплівае дзяцей з 1 па 11 клас. Ён рэгулярна ладзіць для школьнікаў урокі памяці і мужнасці, тэматычныя дыскусіі, круглыя сталы, дыялогавыя пляцоўкі, кіналекторыі.
— Пры правядзенні мерапрыемстваў рэгулярна выкарыстоўваю прынцып “роўны вучыць роўнага”. Старэйшыя навучэнцы падтрымліваюць малодшых, дзеляцца вопытам. Такая пераемнасць вельмі патрэбна, бо малышы стараюцца браць са старшакласнікаў прыклад, — паведаміў Віталь Хадановіч.
Па яго меркаванні, ключавое значэнне ў патрыятычным выхаванні адыгрывае і ўзаемадзеянне з бацькамі, бо часта дзіця капіруе тое, што трансліруецца ў сям’і.
— Выхаванне патрыёта — складаны працэс, у які павінны быць раўнацэнна ўцягнуты сям’я і школа. Па гэтай прычыне заўсёды знаходжуся ў цеснай сувязі з бацькамі, тлумачу, што ў станаўленні дзіцячай асобы мы з імі паплечнікі. Згуртаванасць прыносіць адпаведныя вынікі: для навучэнцаў любоў да Радзімы не проста словы. Яны з цікавасцю вывучаюць гісторыю роднага краю, ушаноўваюць подзвігі герояў Вялікай Айчыннай вайны. Хлопцы і дзяўчаты актыўна ўдзельнічаюць у нясенні Вахты Памяці ля Вечнага агню. Для іх гэта прывілей і ганаровы рытуал, — расказаў Віталь Алегавіч.
На пастаяннай аснове сумесна з класнымі кіраўнікамі Віталь Хадановіч арганізоўвае для вучняў экскурсіі. Гэта паездкі па памятных мясцінах і прафарыентацыйныя выезды. Школьнікі наведалі мноства мемарыялаў, пабывалі ў шэрагу вайсковых часцей і падраздзяленняў сілавых структур.
— Падчас экскурсій падлеткі наглядна знаёмяцца з армейскімі буднямі. Многіх убачанае натхняе на выбар прафесіі. Але самае галоўнае, што навучэнцы пачынаюць разумець значнасць міру і спакою на роднай зямлі. Асабліва выразна яны ўсведамляюць гэта ля помнікаў ахвярам генацыду ці манументаў баявой славы, — заўважыў Віталь Алегавіч.
Акрамя ваенна-патрыятычнага выхавання, Віталь Хадановіч па-ранейшаму настаўнічае — выкладае навучэнцам асновы бяспекі жыццядзейнасці. Да таго ж педагог прымае ўдзел у дзейнасці савета прафілактыкі школы, вялікую ўвагу ўдзяляе падрыхтоўцы дзяцей да конкурсаў і спаборніцтваў.
— Мае вучні неаднаразова станавіліся пераможцамі гарадскіх этапаў вядомых патрыятычных гульняў “Зарнічка” і “Арляня”. Нямала ў вучняў і іншых поспехаў. Але для мяне каштоўна тое, што школьны парог навучэнцы пераступаюць дастойнымі грамадзянамі з правільнымі жыццёвымі арыенцірамі, — падкрэсліў Віталь Алегавіч.
Свае прафесійныя прынцыпы Віталь Хадановіч надоечы прадставіў на абласным этапе рэспубліканскага конкурсу прафесійнага майстэрства сярод кіраўнікоў па ваенна-патрыятычным выхаванні. Пры істотнай канкурэнцыі ён стаў пераможцам.
— Гэтае дасягненне — заслуга ўсёй школы. Гадаваць дзяцей патрыётамі імкнецца ўвесь наш педагагічны калектыў, — запэўніў Віталь Алегавіч. — Дасягаць пастаўленых мэт дазваляюць агульная ўцягнутасць і адзіныя падыходы да выхавання.
Ганна СІНЬКЕВІЧ
Фота аўтара
