Вада ў Тумельскай крыніцы, што каля вёскі Заброддзе Смалявіцкага раёна, паводзіць сябе як жывая, кажуць мясцовыя жыхары. Падрабязнасці – у матэрыяле карэспандэнта “Настаўніцкай газеты”.
Крыніца з характарам: узровень вады тут то падымаецца, то, наадварот, плытчэе, але струмень б’е нязменна ўжо сотні гадоў, а можа, і больш. Вада вельмі халодная, нават у гарачым жніўні чысцюткая, цудатворная. У 2018 годзе крыніцу асвяцілі ў гонар іконы Божай Маці “Жываносная крыніца”. А закрытую купель, якую тут жа і пабудавалі, — у гонар святога Архістратыга Міхаіла, які, як і Багародзіца, вылечвае ад розных хвароб, адводзіць ад людзей бяду.
— Ачышчае гэтая вада ўсіх і звонку, і знутры, — гаворыць Аляксандр, які прыйшоў сюды з вялікімі бутлямі. — Толькі яе і п’ём. Можа прастаяць гады і застацца чыстай, ніколі не цвіце.
— Кажуць, вучоныя праводзілі яе аналіз, — дадае Наталля, якая прыехала да крыніцы з мужам з Жодзіна, — і высветлілі, што ў ёй знаходзіцца шмат іонаў серабра. Такая вада дапамагае пазбавіцца ад інфекцый, лечыць захворванні страўнікава-кішачнага тракту. Ёсць інфармацыя, што ў ёй знаходзілі нават золата і фтор. Вельмі яна карысная, рэгулярна бываем тут.
І сапраўды, не спыняецца сюды паток машын, асабліва на выхадныя. Людзі набіраюць ваду, акунаюцца ў купель. Дарэчы, назва Тумельская пайшла ад мясцовага ўрочышча Тумель, якое калісьці тут было. Урочышча і вадзянога млына даўно ўжо няма (ён існаваў да сярэдзіны 60-х гадоў, яшчэ нават можна пабачыць рэшткі яго фундамента), а чыстая вада не перастае радаваць людзей. Зараз крыніца мае статус гідралагічнага помніка прыроды мясцовага значэння. Менавіта сюды больш за 100 гадоў назад любіў прыходзіць адпачыць Якуб Колас, які нейкі час выкладаў у школе непадалёк, натхняўся беларускай прыродай. Ды і як не натхніцца?! Побач з крыніцай — маляўнічая затока ракі Уша (левы бераг) са старымі дрэвамі, навіслымі над вадой: краявіды, як у чароўнай казцы.
Пабудавалі паблізу крыніцы і паркоўку, а таксама альтанку, каб людзі адпачывалі і крыху затрымліваліся тут. А хтосьці нават пакінуў каля вады маленькі кубачак, каб кожны мог напіцца жывой вады.
Лізавета МІЦКЕВІЧ
Фота аўтара
