Настаўніца гісторыі сярэдняй школы № 3 Астраўца Юлія Гаваноўская стала лаўрэатам прэміі “Паспяховы старт”. Падрабязнасці – у матэрыяле карэспандэнта “Настаўніцкай газеты”.
Малады педагог чацвёрты год працуе ў родным Астраўцы, дзе некалі вучылася ў гімназіі № 1, адкуль адправілася па мэтавым накіраванні на вучобу ў БДПУ. Адвучыўшыся па спецыяльнасці “Гісторыя і сусветная мастацкая культура”, вярнулася на малую радзіму.
Дырэктар сярэдняй школы № 3 Астраўца Людміла Станіславаўна Сасноўская задаволена работай педагога:
— Юлія Віктараўна — перспектыўны малады спецыяліст, творчы, з цікавымі крэатыўнымі ідэямі. Яна прыняла актыўны ўдзел у афармленні рэкрэацыі чацвёртага паверха школы ў выглядзе адкрытых музейных экспазіцый. Размешчаную тут выставу па генацыдзе беларускага народа ў гады Вялікай Айчыннай вайны наведаў Генеральны пракурор Рэспублікі Беларусь Андрэй Іванавіч Швед. Менавіта Юлія Гаваноўская праводзіла для яго экскурсію. Дарэчы, яна склала і экскурсіі па кожнай лакацыі. Таксама педагог вядзе аб’яднанне па інтарэсах гістарычнай накіраванасці.
Як расказала сама Юлія Віктараўна, першапачаткова хацела стаць псіхолагам і старанна рыхтавалася да здачы ЦТ па гісторыі Беларусі і біялогіі. Але настолькі захапілася гісторыяй, што перадумала і вырашыла стаць настаўніцай. Хацелася быць для навучэнцаў такім педагогам, як яе любімая настаўніца англійскай мовы Наталля Назараўна Ляшчэўская. Дарэчы, у той дзень, як Ю.В.Гаваноўская ў Гродне атрымлівала прэмію “Паспяховы старт”, Наталля Назараўна была адзначана нагрудным знакам Міністэрства адукацыі Рэспублікі Беларусь “Выдатнік адукацыі”.
Яшчэ падчас вучобы ва ўніверсітэце Юлія Гаваноўская марыла хутчэй трапіць у клас у якасці настаўніцы. Таму на апошнім курсе пачала працаваць у адной з мінскіх школ.
— Калі пасля заканчэння ўніверсітэта прыехала ў Астравец, мне прапанавалі работу ў новай школе № 3, — успамінае Юлія Віктараўна. — Пазнаёмілася з дырэктарам, паглядзела школу, мне спадабалася. Адчула, што мяне тут ужо чакалі, вельмі цёпла сустрэлі, ніколі ніхто не адмовіў у парадзе. У нашай школе работа проста кіпіць. Адміністрацыя падтрымлівае любую ініцыятыву.
Малады спецыяліст вырашыла сама абсталяваць працоўнае месца. Прыйшла са сваімі ідэямі да дырэктара, атрымала адабрэнне і фінансаванне на рэалізацыю задум. Так у класе з’явіліся шпалеры з гістарычнымі асобамі, інфармацыйныя стэнды, адзін з якіх распрацавала Юлія Віктараўна.
— Працаваць з дзецьмі вельмі падабаецца, яны заўсёды розныя, крэатыўныя, творчыя, любяць незвычайныя заданні, — дзеліцца педагог. — Нават на традыцыйным уроку, калі трэба раскрыць сур’ёзную тэму, стараюся падаць матэрыял цікава, з прыкладамі. У нашай школе ёсць праектары, інтэрактыўныя дошкі, усё гэта патрэбна падчас заняткаў. Люблю выкарыстоўваць методыку дэбатаў, калі дзеці адстойваюць свой пункт гледжання. Дзякуючы гэтаму, яны вучацца не толькі выказваць свае думкі, але і слухаць іншых. Альбо прапаноўваю методыку даміно, калі трэба суаднесці дату і гістарычную падзею.
Дзецям цікава працаваць у групах. А каб яны не проста займаліся з суседам, прымяняю метад гузікаў. У непразрысты пакет складваю гузікі рознага колеру. Хлопчыкі і дзяўчынкі цягнуць іх і рассаджваюцца за парты па колеры. Гэта трэба для таго, каб яны навучыліся працаваць з усімі ў класе. Дзеці любяць такія інтэрактыўныя формы работы. Ды і я сама пастаянна зараджаюся ад іх пазітывам, добрым настроем і нават нешта новае ад іх даведваюся. Стараюся быць з імі на адной хвалі, яны таксама імкнуцца прапаноўваць цікавыя заданні. Калі разумееш сваіх вучняў, то і яны цягнуцца да цябе.
Ю.В.Гаваноўская займаецца з алімпіяднікамі. Летась яе вучань Іван Шышкевіч атрымаў дыплом ІІІ ступені на абласным этапе алімпіяды па гісторыі. Педагог прызнаецца, што ёй цікава працаваць з матываванымі дзецьмі. У скарбонцы дасягненняў настаўніка і яе вучняў — дыплом II ступені на абласной канферэнцыі “Край Гарадзенскі”, дыплом III ступені на раённай навукова-практычнай канферэнцыі “Шлях да поспеху”, дыплом II ступені на міжнародным конкурсе “Школьны музей” у рамках мерапрыемстваў Асацыяцыі школ Расіі і Беларусі.
На маё пытанне, ці адчувае педагог, што перамога ў конкурсе “Паспяховы старт” не выпадковая, Юлія Гаваноўская адказала:
— Старт у прафесіі паспяховы, калі бачыш вынікі сваіх вучняў. Гэта не толькі дыпломы і перамогі на конкурсах, але і калі яны прыходзяць на ўрок і гавораць: “Юлія Віктараўна, вы так расказваеце, што ўсё адразу запамінаецца, не трэба нават дома падручнік адкрываць”. І ты разумееш, што недарэмна тут працуеш. Гэта і ёсць складнікі паспяховага старту.
Даведка
Прэмія “Паспяховы старт” заснавана Гродзенскімі абласнымі арганізацыямі Беларускага прафесійнага саюза работнікаў адукацыі і навукі і РГА “Белая Русь” у 2019 годзе. За гэты час яе лаўрэатамі сталі 29 маладых педагогаў Гродзеншчыны.
Ірына АНІКЕВІЧ
Фота з архіва суразмоўніцы
