Фестываль педагагічных класаў “Вектар поспеху” прайшоў у Мінску і аб’яднаў 51 установу адукацыі сталіцы, 23 установы адукацыі рэгіёнаў нашай краіны, а таксама 4 установы адукацыі Расійскай Федэрацыі, паведамляе карэспандэнт “Настаўніцкай газеты”.
Заснавальнікамі фестывалю выступаюць камітэт па адукацыі Мінгарвыканкама і Мінскі гарадскі інстытут развіцця адукацыі, а пляцоўкай для яго правядзення з’яўляецца сярэдняя школа № 155 Мінска.
— Па ініцыятыве нашай школы ўжо сёмы год запар праходзіць фестываль педагагічных класаў. Яго мэта — падтрымка і прыцягненне ўвагі вучняў да педагагічнай прафесіі, павышэнне яе прэстыжу, садзейнічанне ўсвядомленаму прафесійнаму выбару навучэнцаў. Сёлета ў конкурсных выпрабаваннях фестывалю прыняла ўдзел рэкордная колькасць педкласаўцаў — звыш 800 чалавек, гэта амаль у два разы больш, чым летась, — адзначыла дырэктар сярэдняй школы № 155 Мінска Алена Гіль.
Расійскую Федэрацыю на мерапрыемстве прадстаўлялі навучэнцы педагагічных класаў сярэдніх агульнаадукацыйных школ №№ 175, 55, 85 і гімназіі № 61 Екацярынбурга.
Удзел расійскіх школьнікаў у мерапрыемстве стаў магчымым дзякуючы пагадненню аб супрацоўніцтве ў сферы адукацыі паміж адміністрацыяй Маскоўскага раёна Мінска і Ленінскага раёна Екацярынбурга.
Дарэчы, візіт беларускай дэлегацыі ў Екацярынбург адбыўся падчас вясенніх канікул.
Педкласаўцам неабходна было прайсці праз некалькі конкурсных выпрабаванняў: напісаць эсэ “Мая прафесійная будучыня”, прадставіць лепшае партфоліа будучага педагога “Я — педагог”, прарэкламаваць свой педагагічны клас (анлайн-батл на вызначэнне лепшага педкласа). Конкурс “Першыя крокі да педагагічнай прафесіі” праходзіў дыстанцыйна і складаўся з двух тураў: анлайн-тэсціравання па праграме факультатыўнага курса “Уводзіны ў педагагічную прафесію” (“Знаўцы Prof.by”) і прадстаўлення відэазапісу фрагмента вучэбных заняткаў (“Педагагічныя пробы”). Ярка, дынамічна, крэатыўна на сцэне былі прадстаўлены візітоўкі 44 каманд устаноў адукацыі, дзе дзейнічаюць педкласы.
Незабыўныя ўражанні ў экспертаў пакінулі і работы гасцей з Расіі, у прыватнасці, эсэ навучэнкі сярэдняй агульнаадукацыйнай школы № 85 Екацярынбурга Марыі Скулкінай пра ролю настаўніка ў грамадстве і форма падачы матэрыялу ў партфоліа.
Ва ўрачыстай цырымоніі закрыцця фестывалю, якое прайшло на базе Цэнтра дадатковай адукацыі дзяцей і моладзі “Ранак”, прыняла ўдзел старшыня камітэта па адукацыі Мінгарвыканкама Марына Ільіна. Яна ўручыла пераможцам фестывалю дыпломы і каштоўныя падарункі.
Па выніках грамадскага галасавання лепшымі ў намінацыі “Педклас — гэта клас!” сталі педагагічныя класы сярэдняй школы № 203 Мінска (1-е месца), сярэдняй школы № 30 Мінска (2-е месца), сярэдняй школы № 6 Мінска (3-е месца).
Для ўдзельнікаў і гасцей мерапрыемства была арганізавана выстава напрацовак устаноў адукацыі сталіцы па рэалізацыі педагагічнай прафілізацыі. Цэнтр развіцця педагагічнай адукацыі БДПУ сумесна з членамі студэнцкага клуба выпускнікоў педагагічных класаў “ПРОФіль+” прэзентавалі матэрыялы па дзейнасці педкласаў і адказалі на пытанні будучых абітурыентаў аб асаблівасцях паступлення ва ўніверсітэт.
У межах фестывалю адбыўся метадычны семінар “Шляхі павышэння матывацыі навучэнцаў педагагічных класаў да атрымання прафесіі педагога“ для настаўнікаў, якія працуюць у профільных класах педагагічнай накіраванасці. Навучэнцы педкласаў і педагогі ўстаноў адукацыі сталіцы прадэманстравалі эфектыўныя метады і практыкі, накіраваныя на павышэнне цікавасці і матывацыі навучэнцаў да педагагічнай прафесіі.
Вопытам работы ў напрамку педагагічнай прафілізацыі падзяліліся і расійскія педагогі. Яны расказалі, што ў Екацярынбургу ўкаранілі інавацыйны падыход да вырашэння праблемы дэфіцыту настаўнікаў, адкрыўшы педагагічныя класы для прыцягнення моладзі ў сферу адукацыі. З 2019 года 18 школ горада прапаноўваюць спецыялізаваныя праграмы навучання, якія ўжо прынеслі першы плён. Структура праграмы ўключае два блокі: асновы педагогікі і псіхалогіі для 8—9 класаў і спецыялізаванае вывучэнне методык выкладання для 10—11 класаў. Праграма падтрымліваецца Свярдлоўскім педагагічным каледжам і Уральскім педагагічным універсітэтам. Удзел у педагагічных класах не абмежаваны традыцыйнымі заняткамі. Вучні паглыбляюцца ў свет педагогікі праз майстар-класы, вучэбныя лагеры і конкурсы. Дзякуючы гэтаму вопыту, каля 80% выпускнікоў педагагічных класаў працягнулі навучанне па педагагічных спецыяльнасцях, а многія ўжо вярнуліся ў школы як выкладчыкі. Дэпартамент адукацыі Екацярынбурга плануе пашырэнне праграмы, увядзенне новых дысцыплін і мерапрыемстваў.
Удзельнікі семінара праявілі высокую актыўнасць і зацікаўленасць, абмяняліся эфектыўным вопытам прафесійнай дзейнасці.
Наталля КАЛЯДЗІЧ
