Уступнай кампаніі адведзены яшчэ цэлы месяц, а некаторыя ўстановы прафесійнай адукацыі сталіцы ў прыёме выходзяць на фініш. Сярод іх Мінскі дзяржаўны механіка-тэхналагічны каледж, паведамляе карэспандэнт “Настаўніцкай газеты”.
Калі трапляеш ва ўстанову, то прыемна ўражвае ўпарадкаваная тэрыторыя каледжа. У самім будынку зроблены рамонт з прымяненнем сучасных будаўнічых матэрыялаў і тэхналогій, адрамантаваны актавая і спартыўная залы. У холе каледжа размешчаны стэнды з фотаілюстрацыямі і інфармацыяй аб гісторыі і сучаснай дзейнасці навучальнай установы. Адным словам, усё падрыхтавана да таго, каб гасцінна сустрэць навучэнцаў у новым навучальным годзе. Для многіх ён будзе першым. Каля памяшкання з надпісам “Прыёмная камісія” яе сакратар, намеснік дырэктара каледжа па вытворчым навучанні Яўген Віктаравіч Мархонаў, размаўляе з падлеткамі, якія прыехалі паступаць з іншых рэгіёнаў. Некаторыя са сваімі сябрамі, а нехта і з бацькамі.
— У нас вучыцца шмат іншагародніх, — адзначыў Яўген Віктаравіч. — Для іх у нас ёсць добраўпарадкаваны інтэрнат, дзе створаны камфортныя ўмовы для пражывання і адпачынку, ёсць сталовая, спартыўная база з трэнажорнай залай.
Іншагароднія падлеткі не па чутках ведаюць пра каледж. На працягу ўсяго навучальнага года выкладчыкі, майстры вытворчага навучання ездзяць па школах і расказваюць пра каледж, умовы навучання і выхавання, пра асаблівасці прафесій механіка-тэхналагічнага профілю. Спецыяльна створаная агітбрыгада прадстаўляе выпускнікам школ тэатралізаваную праграму, дзе ў забаўляльнай форме дэманструе перавагі рабочай прафесіі. Штомесяц у каледжы праводзіцца дзень адкрытых дзвярэй, куды запрашаюць выпускнікоў школ, іх бацькоў, прадстаўнікоў прадпрыемстваў. Арганізоўваюцца экскурсіі па каледжы і на вытворчасць.
У каледж на ўзровень ПТА будзе прынята 192 чалавекі, з іх пасля 9 класаў — 140, пасля сярэдняй школы — 52. На ўзровень ССА прымуць 50 чалавек на дзённае навучанне і 30 на завочнае.
Як паведаміў Яўген Мархонаў, падлеткі могуць паступаць як на ўзровень ПТА, так і ССА. На ўзроўні прафесійна-тэхнічнай адукацыі на базе 9 класаў набор праходзіць на кулінара мучных вырабаў, кухара, абвальшчыка мяса, слесара-зборшчыка бытавой тэхнікі, машыніста халадзільных установак. Найбольшы конкурс (1,5 чалавека на месца) назіраецца на кулінара мучных вырабаў. На базе сярэдняй адукацыі на ўзроўні ПТА можна атрымаць спецыяльнасць апаратчыка шырокага профілю вытворчасці хіміка-фармацэўтычных прэпаратаў. Вучэбныя групы камплектуюцца паспяхова. На ўзроўні сярэдняй спецыяльнай адукацыі прыём ажыццяўляецца па 2 спецыяльнасцях на базе 9 класаў: “Тэхнік-тэхнолаг”, “Майстар вытворчага навучання (вытворчасць прадукцыі і арганізацыя грамадскага харчавання, педагагічная дзейнасць)”. Сёлета конкурс па ёй складае 1,2 чалавека на месца. Спецыяльнасць “Тэхнік-механік (тэхнічная эксплуатацыя нізкатэмпературнай тэхнікі)” вельмі запатрабавана ў розных галінах эканомікі. Практычныя навыкі па ёй навучэнцы набываюць у цэнтры кампетэнцый, які існуе ў каледжы ўжо амаль 10 гадоў. Ён мае выдатную сучасную базу. Цэнтр выкарыстоўваецца не толькі для падрыхтоўкі машыністаў халадзільных установак, але і для павышэння кваліфікацыі спецыялістаў гэтай сферы. Па гэтай спецыяльнасці выпускнікі працаўладкоўваюцца ў СТАА “МИДЕА-ГОРИЗОНТ”, кампанію “Атлант”, спартыўныя комплексы “Чыжоўка-Арэна” і “Мінск-Арэна”, на мясакамбінаты і інш. Многія навучэнцы маюць дамоўленасці з гэтымі прадпрыемствамі па мэтавай падрыхтоўцы. Такая падрыхтоўка вядзецца і па іншых спецыяльнасцях.
Ала КЛЮЙКО
Фота прадастаўлена каледжам
