“Аб новых формах выкарыстання архіўных дакументаў у мэтах патрыятычнага выхавання моладзі Саюзнай дзяржавы Беларусі і Расіі” — тэма круглага стала, які прайшоў у Мінскім дзяржаўным каледжы лічбавых тэхналогій, паведамляе карэспандэнт “Настаўніцкай газеты”.
Удзельнікамі круглага стала сталі прадстаўнікі дэлегацыі Федэральнага архіўнага агенцтва Расійскай Федэрацыі, кіраўніцтва Дэпартамента па архівах і справаводстве Міністэрства юстыцыі Беларусі, кіраўніцтва архіўных устаноў рэспублікі.
Месца правядзення было выбрана невыпадкова. Менавіта каледж лічбавых тэхналогій стаў першым у нашай краіне, хто падпісаў афіцыйнае пагадненне аб супрацоўніцтве з архівам, у прыватнасці з Нацыянальным гістарычным архівам Рэспублікі Беларусь.
— За ўсю гісторыю існавання архіваў такога яшчэ не было. Мы распрацавалі вучэбную праграму, якая разлічана на 16 гадзін і ўнесена ў вучэбны план каледжа. Нашы супрацоўнікі ў адпаведнасці з гэтай праграмай будуць знаёміць навучэнцаў з архіўнымі дакументамі, асаблівасцямі работы архівістаў, праводзіць экскурсіі. Такога вопыту ў суседняй дзяржаве пакуль няма — нам ёсць чым падзяліцца, — падкрэсліла намеснік дырэктара Нацыянальнага гістарычнага архіва Беларусі Ірына Каўганава.
Акрамя таго, Нацыянальны гістарычны архіў наладзіў цеснае ўзаемадзеянне са сталічнай школай № 27, дзякуючы якому там пачаў дзейнічаць гурток для школьнікаў старшых класаў “Юны архівіст”.
— Супрацоўніцтва з архівам дапамагае ў правядзенні даследчай дзейнасці, садзейнічае фарміраванню светапогляду навучэнцаў, выхоўвае павагу да гістарычнага мінулага, — акцэнтавала ўвагу дырэктар установы адукацыі Марына Міхайлічэнка.
Сёння ўжо ёсць і іншыя прыклады такіх партнёрскіх узаемаадносін. Так, Нацыянальны архіў Рэспублікі Беларусь падпісаў пагадненне аб узаемадзеянні з сярэдняй школай № 62 Мінска.
— На працягу месяца ў нашай школе размяшчалася выстава, арганізаваная Нацыянальным архівам і прысвечаная тэме генацыду беларускага народа ў час Вялікай Айчыннай вайны. Супрацоўнікі архіва спачатку самі праводзілі экскурсіі, потым у іх перанялі эстафету вучні. У планах — правядзенне сумесных мерапрыемстваў, наведванне архіва і адкрыццё ва ўстанове адукацыі аб’яднання па інтарэсах, таму што дзеці праяўляюць вялікую зацікаўленасць у гэтым, — расказала дырэктар школы № 62 Ларыса Асановіч.
— Мы захоўваем унікальную дакументальную спадчыну аб гісторыі нашай краіны, таму рэгулярна запрашаем навучэнцаў на прэзентацыі, каб яны даведаліся як мага больш пра сваю Радзіму. Школьнікі шукаюць інфармацыю пра сваякоў, якія ваявалі, месцы, дзе нарадзіліся іх продкі, — паведаміў дырэктар Нацыянальнага архіва Рэспублікі Беларусь Андрэй Дземянюк.
Расійскім калегам былі прадстаўлены самыя значныя праекты беларускіх архіваў, сярод якіх “Партызаны Беларусі”, “Беларускія вёскі, спаленыя ў гады Вялікай Айчыннай вайны” і “Дакументальны летапіс Беларусі”.
Асаблівую цікавасць у прадстаўнікоў дэлегацыі Расійскай Федэрацыі выклікала тэма падрыхтоўкі каледжам кадраў і інклюзіўныя формы навучання, якія выкарыстоўваюцца ва ўстанове адукацыі.
— У нас працуюць тры татальна сляпыя выкладчыкі, якія рыхтуюць праграмістаў. Дарэчы, нашы будучыя праграмісты маюць магчымасць праходзіць практыку ў аддзелах Дэпартамента па архівах і справаводстве Міністэрства юстыцыі Беларусі, удзельнічаюць у распрацоўцы электронных прадуктаў для архіўнай галіны. А супрацоўнікі Нацыянальнага гістарычнага архіва — нашы частыя і вельмі чаканыя госці, — адзначыў дырэктар каледжа Георгій Козел.
Марына ЖДАНАВА
Фота аўтара
