Патрыяршы Экзарх усяе Беларусі Мітрапаліт Мінскі і Заслаўскі Веньямін сустрэўся з педагагічнай грамадскасцю Віцебшчыны. Акрамя прысутных у зале, у рэжыме анлайн-трансляцыі магчымасць абмеркаваць праблемы духоўна-маральнага выхавання навучэнцаў, задаць хвалюючыя пытанні атрымалі прадстаўнікі педагагічных калектываў і праваслаўнага духавенства ўсіх раёнаў паўночнага рэгіёна. Падрабязнасці – у матэрыяле карэспандэнта “Настаўніцкай газеты”.
— Добрую справу заўсёды лепш рабіць разам, — адзначыў кіраўнік Беларускай Праваслаўнай Царквы. — Пра гэта сведчыць шматвяковы вопыт — і хату ўсім мірам будавалі, і цяжкасці пераадольвалі. Сёння мы як ніколі дакладна ўсведамляем, якая высокая адказнасць ляжыць на ўсіх нас за будучыню нашай краіны, лёс народа з тысячагадовай гісторыяй, а значыць, і за выхаванне моладзі, яе маральную, сацыяльную і грамадзянскую сталасць. Гістарычна так склалася, што менавіта школа стала найважнейшым інстытутам перадачы вопыту пакаленняў, культурных традыцый, усяго таго, што робіць чалавека асобай, а людзей — народам. Таму праца педагога — прызванне, а лепш сказаць служэнне, нялёгкі крыж. Калі мы гаворым аб выхаванні добрага, патрыятычнага, высокамаральнага пакалення, то неабходна аб’яднаць намаганні.
Як расказала рэктар ВАІРА Вольга Лапацінская, ва ўстановах адукацыі вялікую ўвагу ўдзяляюць духоўна-маральнаму выхаванню падрастаючага пакалення. Інстытут выступае каардынатарам і выканаўцам многіх мерапрыемстваў у рамках Праграмы супрацоўніцтва паміж галоўным упраўленнем па адукацыі аблвыканкама і Віцебскай і Полацкай епархіямі Беларускай Праваслаўнай Царквы, у тым ліку праводзіць абласныя адукацыйныя Стрэчанскія чытанні, Кірыла-Мяфодзіеўскія адукацыйныя чытанні дзяцей і моладзі, Свята-Еўфрасіннеўскія педагагічныя чытанні, навукова-практычныя канферэнцыі, тэматычныя семінары і конкурсы, вынікова ўдзельнічае ў рэспубліканскіх праектах і мерапрыемствах.
— Усе мы разумеем, наколькі важны прыклад педагога ў выхаванні грамадзяніна і патрыёта сваёй краіны на аснове праваслаўных традыцый беларускага народа, — выказала меркаванне Вольга Лапацінская. — Неабходна сфарміраваць духоўны стрыжань дзяцей. Настаўнік уласным маральным выбарам, маральным абліччам становіцца ўзорам для сваіх вучняў і іх бацькоў.
Таксама Патрыяршы Экзарх усяе Беларусі Мітрапаліт Мінскі і Заслаўскі Веньямін наведаў ВДМУ, дзе абмеркаваў з рэктарам Аляксеем Чуканавым узаемадзеянне ўніверсітэта і Беларускай Праваслаўнай Царквы.
Таццяна БОНДАРАВА
Фота аўтара
