Планы на новы навучальны год настаўнікі паўночнага рэгіёна абмеркавалі на традыцыйнай жнівеньскай нарадзе, паведамляе карэспандэнт “Настаўніцкай газеты”.
“Выхаваць патрыёта можа толькі патрыёт” — гэтыя словы кіраўніка дзяржавы сталі лейтматывам абласной канферэнцыі работнікаў адукацыі і навукі. У ходзе дэталёвага абмеркавання актуальных пытанняў развіцця рэгіянальнай сістэмы адукацыі, дасягненняў, праблем і пастаўленых перад педагагічнай грамадскасцю задач асаблівая ўвага была ўдзелена фарміраванню ў маладога пакалення каштоўнасцей беларускага народа як асновы міру і стварэння.
— Мы нацэлены на выхаванне асобы, якая ўмее шанаваць мір, незалежнасць, суверэнітэт, памнажаць створаныя папярэднімі пакаленнямі каштоўнасці. На гэта накіравана наша праца і выбудаваная сістэма мерапрыемстваў, — падкрэсліў начальнік галоўнага ўпраўлення па адукацыі Віцебскага аблвыканкама Дзмітрый Хома. — У адукацыйным працэсе актыўна і прадумана выкарыстоўваюцца матэрыялы, якія фарміруюць устойлівае перакананне важнасці захавання гістарычнай праўды. На базе абласнога інстытута развіцця адукацыі ва ўзаемадзеянні з кадэцкімі вучылішчамі, ваенна-патрыятычнымі клубамі і класамі пачаў работу рэсурсны цэнтр па ваенна-патрыятычным выхаванні, што дасць магчымасць удасканальваць метадалагічныя асновы падрыхтоўкі педагогаў, іх прафесійнае майстэрства, сістэматызаваць і трансліраваць назапашаны вопыт. З новага навучальнага года ваенна-патрыятычныя класы павінны быць адкрыты ў кожнай установе адукацыі.
Перад пачаткам пленарнага пасяджэння працавалі інтэрактыўныя выставачныя пляцоўкі, дзе быў прадстаўлены эфектыўны вопыт устаноў адукацыі рэгіёна: метадычныя распрацоўкі і праекты, творчыя работы, майстар-класы педагогаў, майстроў вытворчага навучання, навучэнцаў.
На Віцебшчыне першы званок прагучаў для больш як 11,9 тысячы першакласнікаў, усяго за парты ў 311 установах агульнай сярэдняй адукацыі селі каля 117 тысяч навучэнцаў. На падрыхтоўку ўстаноў адукацыі да новага навучальнага года, правядзенне рамонтаў было выдзелена звыш 56 мільёнаў рублёў з абласнога бюджэту.
Для арганізацыі падвозу навучэнцаў у сельскай мясцовасці задзейнічаюць каля 9 тысяч аўтобусаў, у тым ліку 25 школьных аўтобусаў МАЗ, набытых на сродкі абласнога бюджэту. Сімвалічны ключ ад іх старшыня Віцебскага аблвыканкама Аляксандр Субоцін урачыста перадаў кіраўніку абласнога цэнтра па забеспячэнні дзейнасці арганізацый сістэмы адукацыі Алене Тарэлкінай. Акрамя таго, удзельнікаў канферэнцыі запрасілі азнаёміцца з узорамі новых аўтобусаў на пляцоўку перад канцэртнай залай “Віцебск”, дзе праходзіў вялікі жнівеньскі педсавет. Як паведаміў Дзмітрый Хома, у найбліжэйшай перспектыве прыбудзе яшчэ 20 адзінак аўтатранспарту, у тым ліку 14 з пад’ёмнікамі для перавозкі дзяцей з інваліднасцю.
За дзейсную прафарыентацыйную работу, накіраваную на тое, каб выпускнікі сярэдніх школ выбіралі запатрабаваныя педагагічныя спецыяльнасці ў рэгіянальных УВА, памочнік Прэзідэнта Рэспублікі Беларусь — інспектар па Віцебскай вобласці Ігар Брыло ўручыў грашовыя сертыфікаты на ўмацаванне матэрыяльна-тэхнічнай базы ўстаноў адукацыі: на 10 тысяч рублёў — упраўленню па адукацыі Бешанковіцкага райвыканкама, на 15 000 рублёў — аддзелу па адукацыі Талачынскага райвыканкама і аддзелу па адукацыі, спорце і турызме адміністрацыі Чыгуначнага раёна Віцебска, на 50 000 рублёў — аддзелу па адукацыі адміністрацыі Першамайскага раёна Віцебска.
Працоўны ўклад і дасягненні лепшых педагогаў вобласці былі адзначаны ганаровымі граматамі абласнога выканаўчага камітэта і абласнога Савета дэпутатаў, падзякамі старшыні аблвыканкама.
Нагрудны знак Міністэрства адукацыі Рэспублікі Беларусь “Выдатнік адукацыі” атрымалі настаўніца чарчэння, айчыннай і сусветнай мастацкай культуры гімназіі № 8 Віцебска Ірына Вярцёлка, настаўніца фізікі гімназіі № 5 Віцебска імя І.І.Люднікава Ніка Цішчанка, настаўніца пачатковых класаў сярэдняй школы № 2 Наваполацка імя Я.А.Трапезнікавай Ірына Цюкала і настаўнік працоўнага навучання сярэдняй школы № 13 Оршы Леанід Фінкін. Ганаровай граматай Міністэрства адукацыі Рэспублікі Беларусь узнагароджаны настаўніца гісторыі і грамадазнаўства гімназіі № 1 Віцебска імя Ж.І.Алфёрава Ганна Жукава, педагог-псіхолаг сярэдняй школы № 2 г.п.Шаркаўшчына імя Героя Савецкага Саюза Р.С.Кудрына Валянціна Рубацкая, намеснік дырэктара па вучэбнай рабоце мёрскай сярэдняй школы № 3 імя Героя Савецкага Саюза А.А.Томкі Ірына Ханецкая, выхавальніца дашкольнай адукацыі дзіцячага сада № 111 Віцебска “Буслік” Ірына Лук’яненка, загадчыца спецыяльнага дзіцячага сада № 25 Віцебска “Крынічка” Ала Сакалова.
Таццяна БОНДАРАВА
Фота аўтара і БелТА
