Бяспека знаходжання навучэнцаў ва ўстановах адукацыі, завяршэнне бягучага і падрыхтоўка да новага навучальнага года, работа з маладымі педагагічнымі кадрамі — гэтыя і шэраг іншых пытанняў сталі ключавымі на калегіі галоўнага ўпраўлення па адукацыі Магілёўскага аблвыканкама. Падрабязнасці — у матэрыяле карэспандэнта “Настаўніцкай газеты”.
Удзел у пасяджэнні прынялі начальнікі аддзелаў па адукацыі гар-, райвыканкамаў, загадчыкі цэнтраў па забеспячэнні фінансавай дзейнасці бюджэтных арганізацый. На ўсеагульнае абмеркаванне былі вынесены розныя напрамкі работы. Падрабязна гаварылі і аб значнасці своечасовага правядзення рамонтаў у навучальных установах.
Стан устаноў агульнай сярэдняй адукацыі і пералік неабходных мерапрыемстваў па падрыхтоўцы да наступнага навучальнага года былі вызначаны спецыяльнымі камісіямі яшчэ ў красавіку. На рамонтныя работы з абласнога бюджэту выдзелена 71,8 млн рублёў.
— У рэгіёне вядзецца будаўніцтва дзвюх школ у Магілёве і Асіповічах, дзіцячага дома сямейнага тыпу ў Крычаве, дзіцячага сада ў аграгарадку Палыкавічы Магілёўскага раёна. У летні перыяд запланаваны мадэрнізацыя 33 устаноў адукацыі, істотнае абнаўленне плоскасных спартыўных збудаванняў і асфальтавых пакрыццяў бегавых дарожак, рамонты дахаў, фасадаў, вучэбных памяшканняў. Паўсюдна будзе ажыццяўляцца замена драўляных аконных блокаў на сучасныя шклопакеты. Прадоўжацца перааснашчэнне харчаблокаў, закупка тэхналагічнага і халадзільнага абсталявання. Сёлета ў 14 установах будуць праведзены работы па стварэнні безбар’ернага асяроддзя, прадугледжана набыццё 21 школьнага аўтобуса, — расказала загадчык абласнога цэнтра па забеспячэнні дзейнасці ўстаноў адукацыі Ганна Сіманоўская.
Удзельнікам калегіі паведамілі, што да 1 жніўня ажыццяўленне вызначаных работ павінна выйсці на фінішную прамую. Да 20 жніўня абсалютна ўсе школы абавязаны атрымаць пашпарты гатоўнасці.
На пасяджэнні прааналізавалі праблемы і дасягненні сістэмы дашкольнай адукацыі. Зараз па вобласці функцыянуюць 318 дашкольных устаноў. Дзіцячыя сады наведваюць звыш 37 тысяч выхаванцаў. Ахоп складае 85% ад агульнай колькасці дзяцей. Праводзіцца мэтанакіраваная работа па аснашчэнні ўстаноў сродкамі навучання, гульнявым і надворным абсталяваннем, па ўкараненні перадавых методык і тэхналогій у адукацыйны працэс. Наладжанае медыка-педагагічнае ўзаемадзеянне дазваляе захоўваць стабільны паказчык па колькасці дзён, прапушчаных адным дзіцем па хваробе.
Аднак у станоўчай дынаміцы прысутнічаюць і негатыўныя моманты. Ёсць пэўныя недапрацоўкі, прычына якіх — недастатковы кантроль з боку кіраўнікоў на месцах.
— Асаблівую ўвагу трэба звярнуць на дысцыпліну ў працоўных калектывах. Любы работнік павінен дакладна ведаць службовыя абавязкі і ступень адказнасці за іх невыкананне. Абыякавасць да сваёй справы ў нашай сферы недапушчальная. Недахопы павінны стаць стымулам для ўдасканалення работы, — падкрэсліў начальнік галоўнага ўпраўлення па адукацыі Магілёўскага аблвыканкама Андрэй Заблоцкі.
Адметна, што на пасяджэнні калегіі былі дэталёва разгледжаны рэгіянальны комплекс дадатковых мер па падтрымцы маладых спецыялістаў, сацыялагічная ацэнка ўзроўню задаволенасці дашкольнай, агульнай сярэдняй, прафесійна-тэхнічнай і сярэдняй спецыяльнай адукацыяй. Як было адзначана, у цэлым паўсюдна работа наладжана эфектыўна. Але для падтрымання гэтых тэндэнцый яе трэба пастаянна паляпшаць. Павышэнне якасці адукацыі, бесперапынны кантроль за бяспекай жыццядзейнасці дзяцей — на гэта павінны быць скіраваны намаганні кожнага: ад кіраўніка да педагога.
Ганна СІНЬКЕВІЧ
Фота аўтара і pixabay.com
