Прарэктары беларускіх і расійскіх універсітэтаў дамовіліся на палях міжнароднай навукова-практычнай канферэнцыі СНД у Маскве аб правядзенні сумесных мерапрыемстваў патрыятычнай і культурнай накіраванасці. Падрабязнасці – у матэрыяле карэспандэнта “Настаўніцкай газеты”.
Паездка ў Маскву была ініцыіравана цэнтрам міжнародных сувязей Міністэрства адукацыі Беларусі, які займаецца міжнароднай дзейнасцю ўжо больш за 30 гадоў.
Пачалася наша міні-вандроўка па краіне-суседцы з наведвання Смаленскага дзяржаўнага ўніверсітэта. Там наша дэлегацыя сустрэлася з прарэктарам па выхаваўчай і сацыяльнай рабоце УВА Дзянісам Уладзіміравічам Мацвеенкавым і начальнікам упраўлення па пазавучэбнай рабоце Кірылам Уладзіміравічам Кузняцовым. Дзякуючы ім, галоўная мэта візіту — азнаямленне з актуальнымі напрамкамі выхаваўчай дзейнасці — была дасягнута.
— Такія сустрэчы неабходны, бо на іх можна абмяняцца вопытам, агучыць і пачуць сапраўды эфектыўныя і дзейсныя спосабы работы з моладдзю. Гэта пашырае гарызонты, робіць узаемадзеянне дзвюх краін у сферы адукацыі яшчэ больш глыбокім, — адзначыў Дзяніс Уладзіміравіч.
Яшчэ ў СмалДУ таксама былі абмеркаваны асаблівасці вучэбнага працэсу ва ўстановах вышэйшай адукацыі Беларусі і Расіі, дзейнасць інстытутаў куратарства, навучанне замежных студэнтаў, фарміраванне лічбаў прыёму і мэтавае навучанне.
— У нашым універсітэце вучыцца каля 5 тысяч студэнтаў па больш як 80 адукацыйных праграмах. Вочная бюджэтная і платная формы навучання складаюць прыкладна 50 на 50. Замежных грамадзян зараз займаецца ў нас няшмат. Затое для іх прадугледжана міністэрскае кватаванне, і такія студэнты на працягу ўсяго навучання атрымліваюць стыпендыю, нават калі дрэнна здаюць сесію. Што тычыцца мэтавікаў, то яны пасля заканчэння ўніверсітэта адпрацоўваюць усяго толькі тры гады, — паведаміў Д.У.Мацвеенкаў.
У сваю чаргу ў час сустрэчы з прарэктарам па пытаннях маладзёжнай палітыкі МІРЭА — РТУ Рыгорам Валер’евічам Петушковым прадстаўнікі беларускіх УВА зрабілі акцэнт на перспектыўных напрамках супрацоўніцтва ў галіне выхаваўчай работы.
— Давайце заплануем якое-небудзь сумеснае значнае мерапрыемства на наступны год па выхаваўчай тэматыцы. Напрыклад, прафесійна-метадычную або навукова-практычную канферэнцыю для прарэктараў і супрацоўнікаў упраўленняў па выхаваўчай рабоце ўніверсітэтаў дзвюх краін. Акрамя таго, можна далучыць нашых студэнтаў да вялікіх падзей: святкаванне 80-годдзя вызвалення Беларусі і Вялікай Перамогі, — прапанаваў Рыгор Валер’евіч.
Безумоўна, калегі не змаглі абысці і іншыя аспекты вышэйшай адукацыі. Адказваючы на пытанні беларусаў, Р.В.Петушкоў расказаў, што ў сямі інстытутах МІРЭА на дзённай форме атрымання адукацыі вучыцца амаль 32 тысячы студэнтаў. Толькі сёлета тут набралі каля 10 тысяч першакурснікаў. Конкурс часам даходзіў да 8 чалавек на месца, а сярэдні прахадны бал склаў 250. Топ самых папулярных спецыяльнасцей узначальвае “Праграмная інжынерыя”. Адпаведна і вядучыя навуковыя напрамкі звязаны з ІТ, а таксама прыборабудаваннем, радыётэхнікай, электронікай і хімічнымі тэхналогіямі.
— У нас 70% бюджэтнікаў і 30% платнікаў. Абітурыенты добра ведаюць МІРЭА і ідуць да нас не толькі па прафесію, але і па актыўную пазавучэбную дзейнасць. Праблем з працаўладкаваннем у нашых выпускнікоў няма. Работадаўцы з задавальненнем іх бяруць, але ўсё ж закон аб першым працоўным месцы, як у Беларусі, нашай краіне неабходны, — падкрэсліў прарэктар МІРЭА.
У завяршэнні гэтай сустрэчы прарэктар па выхаваўчай рабоце БДЭУ Сяргей Скрыба нагадаў, што сёння асабліва важна накіроўваць студэнцкую моладзь і дапамагаць выбіраць правільныя арыенціры і мэты ў жыцці.
— З расійскімі калегамі мы знайшлі шмат пунктаў судакранання, убачылі падабенства і адрозненне нашых выхаваўчых праграм. Але ва ўсіх нас адна агульная мэта — сфарміраваць правільныя каштоўнасці ў нашай моладзі, выхаваць грамадзяніна, патрыёта, чалавека з актыўнай жыццёвай пазіцыяй. Таму важным вынікам нашай паездкі сталі дамоўленасці наконт магчымасці правядзення сумесных мерапрыемстваў, распрацоўка агульных праектаў патрыятычнай і культурнай накіраванасці. Асабліва гэта актуальна напярэдадні важных дзяржаўных свят і дат, — дадаў Сяргей Іванавіч.
Дарэчы, нашай дэлегацыі ўдалося зазірнуць у Цэнтральны ваенна-патрыятычны парк культуры і адпачынку Узброеных Сіл Расіі “Патрыёт”. Ён усіх нас уразіў сваімі неверагоднымі маштабамі. На 5,5 тысячы гектараў размешчаны не толькі музейныя і выставачныя павільёны, але і партызанская вёска, шматфункцыянальны агнявы цэнтр, цэнтр ваенна-тактычных гульняў, конна-спартыўны комплекс, студыя ваенных мастакоў, трэніровачны хуткасны спуск, храм Георгія Перамаганосца, зона рэканструкцыі гістарычных падзей і многае іншае. На тэрыторыі парку таксама размешчана гасцініца, таму што для дэталёвага азнаямлення з усімі аб’ектамі музейнага комплексу неабходны не адзін дзень. Дарэчы, прыемна было чуць ад расійскіх калег, што першымі ў гэтай справе — стварэнні грунтоўнага музейнага комплексу, прысвечанага ВАВ, — былі беларусы.
Падводзячы вынікі нашай невялікай паездкі, прарэктар па выхаваўчай рабоце БрДТУ Наталля Ялавая сказала, што, на жаль, міжнародных канферэнцый, прысвечаных маладзёжнай палітыцы, выхаванню моладзі, ідэалагічнай рабоце, зусім няшмат.
— Тэма выхавання сапраўды вельмі актуальная сёння. Усіх нас хвалюе, як працаваць з моладдзю, як выхаваць сапраўднага грамадзяніна, як узаемадзейнічаць з маладымі людзьмі ў рамках зменлівых геапалітычных падзей, якія формы і метады выхаваўчай работы сёння найбольш актуальныя. На ўсёй прасторы СНД пытанням станаўлення і развіцця асобы ўдзяляецца асаблівая ўвага. Падзяліцца сваімі даследаваннямі, сваім вопытам і вынікамі, падыскутаваць аб розных аспектах выхаваўчага працэсу — асноўны пасыл усёй нашай паездкі. Спадзяюся, што такіх сустрэч будзе больш, — выказала надзею Н.П.Ялавая.
Вольга АНТОНЕНКАВА
Фота аўтара
