Прыгажосць навакольнай рэчаіснасці, прырода роднага краю і праваслаўныя біблейскія сюжэты — усё гэта знаходзіць адлюстраванне ў карцінах педагога дадатковай адукацыі Цэнтра дзіцячай творчасці Мсціслава Людмілы Палеевай. Падрабязнасці – у матэрыяле карэспандэнта “Настаўніцкай газеты”.
Людміла Уладзіміраўна ўжо амаль трыццаць гадоў кіруе ансамблем сучаснага танца “Канфеці”. Зараз пад яе кіраўніцтвам у ім займаюцца больш за сто выхаванцаў ва ўзросце ад 3 да 17 гадоў. Шэсць дзён на тыдзень педагог прывівае хлопчыкам і дзяўчынкам элементарныя музычныя і харэаграфічныя навыкі, вучыць танцавальным асновам і імправізацыі, рытму і сцэнічнай культуры. Пасля работы Людміла Палеева таксама цалкам захоплена творчасцю, любую свабодную хвіліну яна прысвячае свайму хобі — стварэнню карцін у тэхніцы алмазнай мазаікі.
— Творчасць для мяне даўно стала ладам жыцця. Раней была поўнасцю захоплена харэаграфіяй, а нядаўна да яе дабавілася яшчэ і рукадзелле. Неяк наведала выставу дэкаратыўна-прыкладнога мастацтва, убачыла там работы ў тэхніцы алмазнай мазаікі, прайшла майстар-клас — і гэтая справа запала ў сэрца, — паведаміла Людміла Уладзіміраўна.
Алмазнай мазаіцы Людміла Палеева прысвячае амаль увесь свабодны час. На першых работах яна паказвала навакольную прыгажосць, адлюстроўвала на карцінах цудоўныя кветкі, прасторы роднай Мсціслаўшчыны.
— Пасля ўзнікла ўсвядомленае імкненне стварыць ікону Божай Маці. Я веруючы чалавек, таму са сваім жаданнем пайшла ў храм, папрасіла благаславення ў святара. Пасля гэтага рукі быццам самі пачалі тварыць, — расказала Людміла Уладзіміраўна.
Менавіта работа над іконамі найбольш натхняе педагога. Людміла Палеева стварае выявы святых, адлюстроўвае біблейскія падзеі.
— Саджуся за работу звычайна па вечарах і абавязкова ў добрым настроі. За мазаікай магу правесці ад 2 да 5 гадзін запар. Ход часу ў літаральным сэнсе не заўважаю. Стварэнне абразоў прыносіць неверагоднае супакаенне. Забываюся аб усіх праблемах, адпачываю. Разважаю пра свае ўчынкі, малюся аб блізкіх, прашу, каб усе былі здаровыя і шчаслівыя. У гэтыя моманты самае светлае ў думках. Гэта як своеасаблівае духоўнае ачышчэнне, — адзначыла Людміла Уладзіміраўна.
Паводле яе слоў, на выраб адной іконы ідзе ад пары тыдняў да месяца. Праца вельмі карпатлівая. Неабходна выключная дакладнасць, каб не сказіць малюнак, кожны страз прымацаваць на сваё месца. Працэс стварэння складаны не толькі з-за дробных дэталей. Гэта яшчэ і вельмі адказна, бо абразы закліканы прыцягваць увагу чалавека да разважанняў аб сабе і сваёй душы, паказваць яму прыгажосць духоўную праз прыгажосць бачную.
Зараз ва ўласнай міні-калекцыі Людмілы Палеевай каля 20 карцін, выкананых у тэхніцы алмазнай мазаікі. Большасць з іх — абразы. Прычым кожны асвечаны ў храме, праз іх можна звяртацца з малітвай да Бога. Многія работы педагог дорыць сябрам і родным.
— Працуючы над стварэннем ікон, я стала глыбей разумець сутнасць праваслаўя. Гэта дапамагае ў выхаваўчай рабоце з вучнямі. На жыццёвых прыкладах імкнуся прывіваць дзецям маральныя каштоўнасці, вучыць іх верыць у сілу праўды, любові і дабрыні, — падкрэсліла педагог.
Ганна СІНЬКЕВІЧ
Фота аўтара