Карэспандэнт “Настаўніцкай газеты” наведала Пухавіцкі раён Мінскай вобласці, дзе знаходзіцца геаграфічны цэнтр Беларусі, і пагаварыла з кіраўніком мясцовага ўпраўлення па адукацыі, спорце і турызме Сяргеем Вінаградам.
Размова ішла пра якасць сістэмы адукацыі раёна, патрабаванні часу, патрыятычнае выхаванне і новыя праекты.
— Мы робім усё, каб узровень адукацыі нашага раёна адпавядаў яго геаграфічнаму становішчу: стараемся быць у самым цэнтры падзей і сучасных тэндэнцый, — гаворыць Сяргей Міхайлавіч, які, дарэчы, заняў сваю пасаду менш чым год назад, але мае вялікі педагагічны вопыт.
У свой час С.М.Вінаград атрымаў спецыяльнасць настаўніка пачатковых класаў у Баранавіцкім дзяржаўным вышэйшым педагагічным каледжы, які быў папярэднікам БарДУ. Працаваў сацыяльным педагогам, потым настаўнікам і адначасова дырэктарам у Гарадзішчанскай сярэдняй школе імя М.А.Скіпара. Затым кіраваў упраўленнем па адукацыі, спорце і турызме Баранавіцкага раёна Брэсцкай вобласці, а зараз — Пухавіцкага раёна Мінскай вобласці.
— У кіраўніцкай дзейнасці мне вельмі дапамагае ўласны настаўніцкі вопыт, — прызнаецца Сяргей Міхайлавіч. — Скажу так: калі б блізка не працаваў з дзецьмі і іх бацькамі, не ведаў бы вясковай педагогікі, то на маёй цяперашняй пасадзе мне было б значна цяжэй.
У жыцці Сяргей Вінаград прытрымліваецца наступнага прынцыпу: хто не ведае свайго мінулага — не мае будучыні.
— Шмат увагі ўдзяляем патрыятычнаму выхаванню школьнікаў: прывіваем дзецям любоў да Радзімы ўжо з першага школьнага звяна, — расказвае ён. — У Пухавіцкім раёне шмат слаўных гістарычных месцаў, якія выклікаюць гордасць і пра якія трэба ім гаварыць. Вялікі дзякуй нашай 5-й асобнай брыгадзе спецыяльнага назначэння, якая, можна сказаць, узяла на сябе шэфства над школьнікамі раёна ў плане патрыятычнага выхавання. Шмат мерапрыемстваў на школьным і раённым узроўні ў нас ужо запланавана да Дня абаронцы Айчыны. Лічу, што менавіта школа — самае першае звяно ў патрыятычным выхаванні дзяцей. Свой школьны музей, урокі “Чалавек і свет” у пачатковых класах — менавіта гэта дзеці запомняць на ўсё жыццё.
Захаванне традыцый у раёне спалучаецца з інавацыямі.
— Мы стварылі рабочую групу з ліку настаўнікаў, гісторыкаў Пухавіцкага раёна, якія будуць збіраць інфармацыю пра ўстановы адукацыі, што існавалі тут у розныя эпохі, але якіх ужо няма, — расказвае Сяргей Вінаград. — Будзем шукаць звесткі пра іх кіраўнікоў, розныя ўспаміны, фотаздымкі. У планах — стварыць мемарыяльны комплекс, прысвечаны гэтым установам, каб людзі, якія некалі іх скончылі, маглі прыехаць і пакланіцца памяці сваіх педагогаў. Тэхналогіі сёння даюць шмат магчымасцей: можна ажыўляць фотаздымкі, з дапамогай камп’ютарнай графікі візуалізаваць падзеі. Пры гэтым вялікіх грошай на гэта не патрабуецца, але тыя пазітыўныя эмоцыі, якія людзі ў выніку атрымаюць, дарагога вартыя.
У нашым раёне захаваўся цесны сімбіёз адукацыі і спорту. На аднаўленне спартыўных аб’ектаў (спартыўных залаў, пляцовак, стадыёнаў) з бюджэту выдзяляюцца значныя сродкі. Так, у гэтым годзе запланавана будаўніцтва стадыёна пры сярэдняй школе № 3 Мар’інай Горкі, дзе яго раней не было.
Яшчэ адзін цікавы праект на базе раёна створаны для будучых сацыяльных педагогаў. Пачнецца ён з навукова-практычнага семінара “Сацыяльна-педагагічная і псіхалагічная падтрымка паспяховасці асобы ва ўмовах сучасных выклікаў”. Ідэя праекта — дапамагчы маладым спецыялістам, выпускнікам УВА, удасканаліць свае веды, а педагогам даць магчымасць абмяняцца вопытам. Яшчэ адна важная мэта — прыцягнуць маладых спецыялістаў у раён, зацікавіць іх перспектывай работы на Пухавіччыне.
— Я сам па прафесіі сацыяльны педагог, — гаворыць Сяргей Вінаград. — Ведаю, якая гэта няпростая, эмацыянальна напружаная праца, у тым ліку з дзецьмі, якія знаходзяцца ў сацыяльна небяспечным становішчы, з дзецьмі-правапарушальнікамі. Мы звязаліся з кафедрай педагогікі і сацыяльных дысцыплін Баранавіцкага дзяржаўнага ўніверсітэта, і яе спецыялісты пагадзіліся аказваць нам дапамогу. З часам будзем прыцягваць да праекта і іншыя УВА. Сам праект плануецца рэалізоўваць у нашым раёне: з універсітэтаў будуць прыязджаць каманды выкладчыкаў і выпускнікоў. Педагогі будуць праводзіць майстар-класы, чытаць лекцыі для калег, а маладыя спецыялісты — працаваць з дзецьмі. На люты ў нас ужо запланаваны форум-тэатр “Вы нічога не разумееце!”, сацыяльна-псіхалагічны трэнінг “Мір. Дружба. Жвачка”, трэнінг “Урокі скалалажання”.
Упраўленне па адукацыі, спорце і турызме таксама плануе распрацаваць шэраг праектаў на тэму геаграфічнага цэнтра Беларусі, якія стануць брэндавымі для Пухавіччыны.
Лізавета МІЦКЕВІЧ
Фота аўтара
