Пераможца V Рэспубліканскага конкурсу прафесійнага майстэрства “ProfSkills Belarus — 2023” Кірыл Вашкель пайшоў па слядах бацькі і цяпер працуе ў ААТ “Будаўнік”, дзе і ўдасканальвае сваё майстэрства. Падрабязнасці — у матэрыяле карэспандэнта “Настаўніцкай газеты”.
— Тата працаваў мулярам, затым брыгадзірам і прарабам. Ён прапанаваў і мне звязаць сваю будучыню з будаўніцтвам. Мне было гэта дастаткова цікава, таму я паступіў у Ашмянскі дзяржаўны аграрна-эканамічны каледж, — успамінае малады спецыяліст.
На другім курсе Кірылу прапанавалі паўдзельнічаць у спаборніцтвах па цагляным муры. А ўжо на трэцім курсе ён прыняў удзел у абласным і рэспубліканскім этапах конкурсу ProfSkills.
— Першапачаткова мы не ведалі, якая задача будзе пастаўлена перад удзельнікамі. Толькі на месцы нам далі малюнак, па якім трэба было выкласці мур. Падрыхтоўка доўжылася каля двух месяцаў, а сам конкурс праходзіў тры дні, — расказвае хлопец.
Кірыл заставаўся пасля вучобы і нават на канікулах прыходзіў павышаць узровень свайго майстэрства.
— Без дапамогі майго настаўніка Івана Іванавіча мне было не перамагчы. Ён заўсёды падтрымліваў і падказваў, — адзначае юны муляр.
Свайго падапечнага педагог Ашмянскага дзяржаўнага аграрна-эканамічнага каледжа Іван Ляшчэвіч хваліць:
— У лютым на базе каледжа мы правялі абласны этап ProfSkills, каб вызначыць, хто варты прадстаўляць Гродзенскую вобласць на V Рэспубліканскім конкурсе прафесійнага майстэрства. Я рыхтаваў двух удзельнікаў — Кірыла Вашкеля і Максіма Шарая. Максім, які вучыўся на другім курсе, меў менш вопыту. У Кірыла не ўсё адразу атрымлівалася, але дзякуючы вялікаму жаданню і ўпартасці ён даводзіў работу да выдатнага выніку.
Папярэдняе заданне было прадастаўлена з наступным змяненнем у 30%. Работа аказалася складанай: стаяла задача выкласці тры кругі і так іх размясціць, каб змясцілася пэўная колькасць цаглінак.
— Метадам проб і памылак знайшлі дакладны варыянт. Кірылу ўласцівы ўседлівасць, працавітасць і ўпэўненасць у справе. Хачу выказаць асаблівую падзяку бацькам Кірыла. Яны заўсёды цікавіліся яго вучобай. А сам хлопец заўсёды займаў лідарскія пазіцыі, штосьці падказваў сваім аднакурснікам. Нядзіўна, што ён быў выбраны ўдзельнікам ProfSkills і годна прадставіў Гродзенскую вобласць на конкурсе. Муляр — гэта старажытная, запатрабаваная прафесія. Кожная сям’я хоча жыць у сваім доме. Многія мараць пра машыну, якой патрэбны гараж. Таму будаўніцтва ва ўсе часы актуальнае. Будучы мулярам, заўсёды можна зарабіць, а калі дабавіць кваліфікацыю, то ва ўсіх адносінах спецыяліст будзе нарасхват, — пракаменціраваў Іван Іванавіч.
Пры працаўладкаванні на прадпрыемства “Будаўнік” Кірыла падтрымалі аднаразовай выплатай у памеры тарыфу па трэцім разрадзе.
— Мне падабаецца працаваць, калектыў добры, старэйшыя таварышы заўсёды дапамагаюць. За мной замацавалі калегу Эдварда Кузьміцкага. Дзякуючы яму, я хутка ўвайшоў у рабочы працэс. У непрацоўны час з калегамі ходзім на мерапрыемствы. Напрыклад, такое прафесійнае свята, як Дзень будаўніка, адзначалі з брыгадай на сумеснай імпрэзе, дзе, дарэчы, наша прадпрыемства пасвячала маладых спецыялістаў у работнікі. У тым ліку і мяне, — дзеліцца муляр.
Юнака пакуль цалкам задавальняе яго заработная плата, але ён гаворыць, што ёсць куды расці:
— Калі атрымаю вышэйшы разрад, аплата працы павысіцца. З нецярпеннем чакаю новы будаўнічы аб’ект, дзе буду выкладваць мур. Калі пачну там працаваць, мяне перавядуць на работу па чацвёртым разрадзе.
Кірыл ніколі не задумваўся пра пераезд. Хлопец прывязаны да малой радзімы.
— Тут утульна і спакойна. Я шмат часу праводжу з сям’ёй. А маё хобі — спорт. Асабліва люблю валейбол і футбол. На трэніроўках па-сапраўднаму адпачываю. Такі прыклад падаў мне бацька. Раней і мама займалася валейболам, нават гуляла за свой калектыў ад паштовага аддзялення. У летні час займаемся пляжным валейболам ля возера. У нас сфарміравана прафесійная каманда, і мы спаборнічаем з іншымі прадпрыемствамі. Зімой люблю станавіцца на лыжы, прадстаўляў Ашмяны сёлета на абласных спаборніцтвах па лыжах, — падагульняе малады спецыяліст.
Настасся ЧАРКАНАВА
Фота аўтара
