Круглы стол “Чысціня слова — чысціня душы” адбыўся ў Савеце Рэспублікі.
—Па ініцыятыве Беларускай Праваслаўнай Царквы мы праводзім мерапрыемства, прысвечанае чысціні слова. Вядома, можна было б сказаць, што гэтая праблема не так востра стаіць перад грамадствам, але тым не менш мае месца быць. Тое, як людзі ладзяць зносіны паміж сабой, наколькі ўмеюць па-добраму адносіцца адно да аднаго, выказваючы гэта словамі, вельмі важна. Гэта характарызуе культуру паводзін, узровень развіцця нашага грамадства, — сказала Старшыня Савета Рэспублікі Наталля Качанава. — Падзеі мінулага года паказалі, што ў шэрагу момантаў знікала культура паводзін, парушаліся чалавечыя нормы. Было страшна, калі людзі пераставалі разумець, што і як яны гавораць.
У мерапрыемстве прынялі ўдзел кіраўнікі міністэрстваў і ведамстваў, члены Савета Рэспублікі, прадстаўнікі грамадскіх арганізацый.
— Для грамадскасці тут вялікае поле дзейнасці. Не пачнём займацца праблемай брыдкай гаворкі комплексна — нічога не атрымаецца. А гэта тычыцца непасрэдна развіцця грамадства, нашай культуры, паводзін, у цэлым пытання сапраўднага патрыятызму, — падкрэсліла спікер, звяртаючыся да ўдзельнікаў.
— Сёння мы звяртаем сваю ўвагу на культуру мовы сучаснага чалавека, на тое, каб брыдкае слова не прысутнічала ў нашым грамадстве. Слова Божае нам гаворыць аб тым, што за кожнае, нават пустое слова, чалавек павінен даць адказ потым, пасля заканчэння свайго жыцця, тым больш калі слова нясе нешта нядобрае.
У наш час даводзіцца іншым разам чуць на вуліцы, у грамадскіх месцах тыя словы, якія нясуць у сабе негатыў, — і задумваешся над тым, што гэта значыць у маштабах усёй краіны. На мой погляд, гэтае пытанне трэба вырашаць сумесна розным дзяржаўным структурам, грамадскім арганізацыям, — звярнуў увагу Мітрапаліт Мінскі і Заслаўскі Веньямін, Патрыяршы Экзарх усяе Беларусі.
Па выніках абмеркавання Міністэрству адукацыі рэкамендавана прапрацаваць магчымасць укаранення курса “Культура мовы і моўны этыкет” ва ўсіх установах адукацыі. Таксама рэкамендавана ўвесці тэмы па прафілактыцы ненарматыўнай лексікі ў падлеткавым асяроддзі ў праграму факультатыву “Асновы духоўна-маральнай культуры і патрыятызму” для вучняў 7—8 класаў. Акрамя таго, агучана прапанова стварыць банк метадычных матэрыялаў па эстэтычным выхаванні вучняў у медыятэцы Рэспубліканскага рэсурснага цэнтра па духоўна-маральным выхаванні вучняў, а таксама ўключыць у тэматычныя мерапрыемствы ў рамках адукацыйнага праекта “ШАГ” тэмы па эстэтыцы зносін у маладзёжным асяроддзі.
Па матэрыялах БелТА
падрыхтавала Кацярына РУМЯНЦАВА.
