Прэм’ер-міністр Беларусі Андрэй Кабякоў у час рэспубліканскай дабрачыннай акцыі “Нашы дзеці” ўручыў навагоднія падарункі вучням Маладзечанскай спецыяльнай агульнаадукацыйнай школы-інтэрната.
Андрэй Кабякоў павіншаваў выхаванцаў і педагогаў з надыходзячым 2018 годам і Калядамі, пажадаў ім усяго самага добрага і радаснага. “Для таго каб вашы мары рэалізаваліся, трэба ўсім упарта працаваць і перш за ўсё добра вучыцца. Таму хачу пажадаць вам у новым годзе, каб вы вучыліся толькі на выдатныя ацэнкі і каб усё задуманае вамі заўсёды здзяйснялася. Жадаю, каб кожны з вас адчуваў сябе шчаслівым у новым годзе”, — падкрэсліў прэм’ер.
Ён нагадаў, што ў школе ў дзяцей ёсць добрыя прыклады для пераймання: з 1990 па 2008 год 14 выпускнікоў школы-інтэрната сталі выдатнымі спартсменамі, з іх 12 — чэмпіёнамі і прызёрамі Параалімпійскіх гульняў, у тым ліку Васіль Шапцібой і Дзмітрый Салей. “Гэта тыя хлопцы, якія даказалі, што яны могуць дасягнуць самых вялікіх вяршынь у свеце. Упэўнены, што ў кожнага з вас ёсць такая магчымасць”, — сказаў Андрэй Кабякоў.
Новы год — гэта заўсёды падвядзенне вынікаў, магчымасць паглядзець, як былі рэалізаваны планы, адзначыў кіраўнік урада. У гэтым годзе ў Беларусі былі адкрыты дзве новыя школы і 13 дзіцячых садоў. “Мы стараемся ўдзяляць як мага больш увагі вам, дзецям, каб вам у вашых школах і дзіцячых садах жылося лёгка і камфортна”, — дадаў Андрэй Кабякоў.
У час навагодняга віншавання вучні атрымалі інтэрактыўную мультымедыйную дошку, спартыўны інвентар і салодкія падарункі.
Дырэктар школы-інтэрната Наталля Глінская расказала, што дзеці старанна рыхтаваліся да прыезду гасцей. “Кожны дзень рэпеціравалі па некалькі гадзін, яны вельмі хацелі зрабіць уражанне на нашага прэм’ер-міністра. Для нас вялікі гонар прыняць такога госця на навагоднім свяце, — адзначыла яна. — І другі важны аспект — гэта, вядома, падарункі. Дзеці з нецярпеннем чакалі падарункі, для іх гэта быў вялікі сюрпрыз”.
Андрэй Кабякоў азнаёміўся з матэрыяльна-тэхнічнай базай школы-інтэрната, умовамі для навучання, выхавання і пражывання вучняў. Прэм’ер з цеплынёй паразмаўляў з дзецьмі ў час чаяпіцця. Вучні школы-інтэрната падарылі кіраўніку ўрада карціну-аплікацыю, зробленую сваімі рукамі.
У мерапрыемстве таксама прынялі ўдзел першы намеснік старшыні Мінскага абласнога выканаўчага камітэта Ігар Макар і старшыня Маладзечанскага райвыканкама Аляксандр Яхнавец.
Маладзечанская спецыяльная агульнаадукацыйная школа-інтэрнат функцыянуе з 1 жніўня 1964 года. Установа з’яўляецца абласным рэсурсным цэнтрам спецыяльнай адукацыі па метадычным забеспячэнні адукацыйнага працэсу дзяцей з парушэннямі зроку Мінскай вобласці. Цяпер у школе-інтэрнаце вучацца 104 дзіцяці, з іх 27 дзеці-сіроты і дзеці, якія засталіся без апекі бацькоў, 72 дзіцяці-інваліды. З 2012 года 10 навучэнцаў заахвочаны спецыяльным фондам прэзідэнта па сацыяльнай падтрымцы таленавітай моладзі і студэнтаў.
Рэспубліканская дабрачынная акцыя “Нашы дзеці” праходзіць у Беларусі з 11 снежня па 10 студзеня.
Па матэрыялах БелТА.
Фота Аксаны МАНЧУК, БелТА.
