29 і 30 лістапада ў краіне ўпершыню будзе праведзена Нацыянальнае даследаванне якасці адукацыі, у якім прымуць удзел каля 20 тысяч дзесяцікласнікаў і першакурснікаў каледжаў, паведамляе карэспандэнт “Настаўніцкай газеты”.
”Гэта прыблізна пятая частка ўсіх навучэнцаў названага ўзросту. Устаноўленая колькасць удзельнікаў дазволіць нам даведацца, як у старшакласнікаў, за плячыма якіх ужо ёсць базавая адукацыя, сфарміравана функцыянальная адукаванасць. Больш за тое, мы зможам атрымаць пэўную карціну па рэгіёнах”, — адзначыла загадчыца сектара суправаджэння Нацыянальнага даследавання якасці адукацыі і міжнародных даследаванняў якасці адукацыі НІА Марыя Гарбунова.
Акрамя гістарычнай значнасці, такое даследаванне — унікальны шанс для маладых людзей праверыць свае сілы. Для іх гэта як асабістае спаборніцтва, якое дазволіць высветліць, наколькі хутка яны здольны канцэнтравацца на розных тыпах заданняў, пераключаць увагу, правільна размяркоўваць час, матываваць сябе на праверку ўнесеных адказаў, перш чым націснуць кнопку “завяршыць”.
“Кожнаму вучню — удзельніку даследавання будзе прапанавана некалькі серый заданняў. Камусьці камп’ютар размяркуе заданні па чытацкай і матэматычнай адукаванасці, камусьці — па прыродазнаўчанавуковай і фінансавай. Варта адзначыць, што фармат заданняў не зусім прывычны для дзяцей, але ў гэтым і “соль” праверкі функцыянальнай адукаванасці, якая заключаецца ў здольнасці чалавека знаходзіць аптымальныя спосабы вырашэння жыццёвых задач у знаёмых і незнаёмых сітуацыях”, — расказала Марыя Барысаўна.
Спецыяліст Нацыянальнага інстытута адукацыі патлумачыла, што ўсе заданні па кожным відзе адукаванасці згрупаваны ў блокі — вучэбныя сітуацыі.
“Як правіла, вучэбная сітуацыя ўключае сем ці восем заданняў, аб’яднаных агульнай тэмай (праблемай). Такая тэма (праблема) можа тычыцца самых розных сфер чалавечага жыцця: асабістай, сямейнай, грамадскай, адукацыйнай, навуковай, прафесійнай.
Па змесце заданні кожнага варыянта вельмі адрозніваюцца. Галоўнае, што іх аб’ядноўвае, — гэта накіраванасць на праверку пэўных уменняў:
— знаходзіць інфармацыю ў прадстаўленых тэкстах;
— фармуляваць праблему (задачу) (у тым ліку на мове навукі);
— інтэрпрэтаваць і ацэньваць інфармацыю;
— выкарыстоўваць інфармацыю для вырашэння канкрэтных практычных задач.
Напрыклад, па чытацкай адукаванасці могуць быць заданні, у якіх навучэнцам будзе прапанавана вызначыць прычыны пэўных падзей (у апоры на інфармацыю, прадстаўленую ў тэксце), прывесці доказы ў абарону пэўнай пазіцыі, прад’явіць і аргументаваць уласны пункт гледжання.
Пры праверцы матэматычнай адукаванасці старшакласнікам можа быць прапанавана выбраць патрэбную формулу для правядзення разлікаў, спрагназаваць развіццё апісаных у задачы працэсаў, правесці супастаўленне даных, прадстаўленых у табліцы і на дыяграме, і г.д.
Варыянтам задання па прыродазнаўчанавуковай адукаванасці можа быць ацэнка ўплыву апісаных працэсаў на экалагічную сітуацыю ў свеце (або асобным кантыненце), аналіз метадаў навуковага даследавання, якія дазволілі навукоўцам зрабіць тыя ці іншыя высновы.
У заданнях па фінансавай адукаванасці навучэнцам можа быць прапанавана паразважаць аб правільных сцвярджэннях у дачыненні да набыцця пэўнага тавару ў зададзеных умовах або ў якіх сітуацыях фінансавыя ўкладанні могуць быць больш рызыкоўнымі, а ў якіх — менш”, — зазначыла М.Б.Гарбунова.
Вольга ДУБОЎСКАЯ
Фота з архіва рэдакцыі выкарыстоўваецца ў якасці ілюстрацыі
