Раённае свята, прысвечанае Дню настаўніка, прайшло ў Оршы, паведамляе карэспандэнт “Настаўніцкай газеты”.
Перад урачыстасцю дырэктар Выдавецкага дома “Педагагічная прэса” Кацярына Дубінская наведала сярэднюю школу № 12 Оршы. Дырэктар установы Алена Кудраўцава прэзентавала першы ў краіне прафарыентацыйны клас “Прафклас. Профіклас”, які быў створаны пры падтрымцы Федэрацыі прафсаюзаў Беларусі, і расказала аб прынцыпах яго работы. У кабінеце прадстаўлены стэнды, прысвечаныя навучальным установам, прадпрыемствам Віцебскай вобласці.
У школе дзейнічаюць два профільныя класы — чыгуначны і аграрны. Навучэнцы, якія яшчэ не вызначыліся з будучай спецыяльнасцю, могуць у прафкласе прайсці тэсціраванне і зразумець, якая прафесія ім падыходзіць больш за ўсё.
Урачыстая частка мерапрыемства, прысвечанага Дню настаўніка, пачалася з прыемнай падзеі. Кацярына Дубінская ўручыла начальніку ўпраўлення па адукацыі Аршанскага райвыканкама Андрэю Загурскаму падзяку за плённае супрацоўніцтва з выданнямі “Педагагічнай прэсы”.
Акрамя гэтага, памятны прыз атрымала дырэктар сярэдняй школы № 7 Оршы Таццяна Кузьмянкова.
Звяртаючыся да педагогаў, Кацярына Дубінская адзначыла, што любоў да настаўніка не павінна заканчвацца святамі, настаўніку трэба кланяцца кожны дзень. Як ганаровы госць дырэктар Выдавецкага дома “Педагагічная прэса” ўручыла лепшым педагогам Оршы ганаровыя граматы Віцебскага аблвыканкама за шматгадовую працу ў сістэме адукацыі Віцебшчыны і асабісты ўклад у навучанне падрастаючага пакалення.
У сваю чаргу Андрэй Загурскі падкрэсліў, што сёння нішто не заменіць думаючага і творчага настаўніка:
“Вынікі, якія ў нас ёсць па ўсіх напрамках у адукацыі, — гэта дзякуючы нашым педагогам. Яны выхавалі не адно пакаленне. Жадаю ўсім здароўя і поспехаў у нялёгкай, але вельмі важнай працы”.
Начальнік раённага ўпраўлення нагадаў, што сёлета лаўрэатамі ІІ ступені рэспубліканскага конкурсу прафесійнага майстэрства “Настаўнік года” сталі настаўніца сярэдняй школы № 3 імя У.Караткевіча Вольга Сіняўская і настаўніца гімназіі № 1 імя Г.Сямёнава Аксана Шукаловіч. Сёлета 15 навучэнцаў устаноў адукацыі Оршы атрымалі 100 балаў падчас здачы цэнтралізаванага экзамену і тэсціравання.
“Сярод мноства прафесій настаўнік заўсёды быў і будзе на першым месцы, — заўважыў Андрэй Загурскі. — Няма ніводнага чалавека, які б не помніў свайго настаўніка. Гледзячы на нашых навучэнцаў і іх дасягненні, заўсёды думаю пра тое, якія ў нас таленавітыя педагогі і што нам з імі пашанцавала”.
Падчас свята за шматгадовую працу ў сістэме адукацыі, высокае прафесійнае майстэрства і асабісты ўклад у развіццё і выхаванне падрастаючага пакалення Ганаровай граматай Адміністрацыі Прэзідэнта быў узнагароджаны настаўнік геаграфіі сярэдняй школы № 2 Оршы імя Б.Хігрына Віктар Жукоўскі.
Наталля САХНО
Фота аўтара
