Сумесная гісторыя настаўнікаў фізікі і працоўнага навучання Аношкаўскай сярэдняй школы Нясвіжскага раёна Тамары і Віктара Ялковіч пачалася амаль 45 гадоў назад і працягвае папаўняцца значнымі падзеямі. Падрабязнасці – у матэрыяле карэспандэнта «Настаўніцкай газеты».
Пасля заканчэння сярэдняй школы № 2 Нясвіжа Тамара Адольфаўна паступіла ў Аршанскае педагагічнае вучылішча: у той год якраз набіралі эксперыментальную групу – залічвалі без экзаменаў па бале атэстата.
– Часам здаецца, што гэта прафесія выбрала мяне, – расказвае пра сябе Т. Ялковіч. – Калі была маленькай, мне вельмі падабалася збіраць вакол сябе малодшых дзяцей, гуляць з імі, вучыць маляваць, спяваць. А яшчэ на мяне аказалі вялікі ўплыў школьныя настаўнікі, асабліва класны кіраўнік Ганна Іосіфаўна Ярмалінская.
У адной групе з Тамарай Адольфаўнай вучыўся Павел Ялковіч. Яго жонка прызнаецца, што не заўважыць такога хлопца было немагчыма: разумны, высокі, займаўся фатаграфіяй. Сваю ролю адыграла і тое, што маладыя людзі пачалі сядзець за адной партай.
– З таго часу больш не расставаліся, – дадае настаўніца абслуговай працы. – Пасля таго як скончылі вучылішча і атрымалі дыпломы з адзнакай, разам паступілі ў Мазырскі педагагічны інстытут імя Н.К. Крупскай, а пасля другога курса пажаніліся.
Па размеркаванні маладыя людзей адправіліся ў Нясвіжскі раён, дзе працуюць і сёння. У Аношкаўскай сярэдняй школе Тамара Адольфаўна выкладае чарчэнне і абслуговую працу, а Павел Віктаравіч – фізіку і працоўнае навучанне. Настаўнікі штогод рыхтуюць пераможцаў раённых, абласных і рэспубліканскіх алімпіяд па працоўным навучанні.
– Першым да алімпіяднага руху далучыўся Павел Віктаравіч, – гаворыць Т. Ялковіч. – Гледзячы на яго, я захацела, каб і мае навучэнкі заявілі пра сябе. Заўсёды кажу дзецям, што працоўнае навучанне – неабходны прадмет. Кім бы вучань ні стаў — матэматыкам, фізікам ці лётчыкам, працаваць рукамі трэба ўмець заўсёды.
Былая вучаніца Т. Ялковіч Таццяна Гесь тры гады запар займала прызавыя месцы на заключным этапе рэспубліканскай алімпіяды і пайшла па слядах свайго педагога: паступіла ў Баранавіцкі дзяржаўны ўніверсітэт на спецыяльнасць «Тэхналагічная адукацыя (абслуговая праца і выяўленчае мастацтва)».
– Яшчэ адна мая вучаніца Дар’я Качура ўжо скончыла такую ж УВА па адпаведнай спецыяльнасці і выкладае гэтыя прадметы дзецям, – зазначае Т. Ялковіч.
Майстэрні Аношкаўскай сярэдняй школы аснашчаны шматлікім абсталяваннем. На кухні для дзяўчынак ёсць мультыварка, мікрахвалевая печ, халадзільнік і інш. А ў кабінет для кройкі і шыцця закуплены сучасныя раскройныя сталы, машыны для вышыўкі і для пашыву адзення, прасы, манекены. Майстэрня хлопчыкаў таксама абнавілася новымі інструментамі і станкамі.
– Сакрэт поспеху перш за ўсё ў любові да сваёй працы, а яшчэ ў агульнасці інтарэсаў педагога і вучняў, – падсумоўвае Т. Ялковіч. – А тым выпускнікам, хто выбірае прафесію настаўніка, заўсёды нагадваю, што не трэба баяцца памылак і расчараванняў. У педагогіцы трэба быць гатовым да доўгага шляху, які абавязкова прывядзе да поспеху.
Наталля САХНО
Фота Алега ІГНАТОВІЧА
