У сувязі з камп’ютарызацыяй адукацыі і асаблівасцямі ўспрымання цэнтэніялаў ва ўжытак паступова ўваходзіць гейміфікацыя. Гэта адна з самых эфектыўных методык навучання, у аснову якой пакладзены элемент гульні. Вэб-інструменты, дзякуючы мыльтымедыйнаму фармату інфармацыі, дазваляюць зрабіць гульню больш займальнай і, як вынік, палепшыць засваенне і запамінанне матэрыялаў урока, а таксама павысіць цікавасць да прадмета.
Адным з найбольш мэтазгодных і эрганамічных спосабаў укаранення гейміфікацыі ва ўрок з’яўляецца выкарыстанне мабільных віктарын. Яны маюць інтуітыўна зразумелы інтэрфэйс, лёгкі для асваення ўсімі ўдзельнікамі адукацыйнага працэсу. Мабільныя віктарыны дазваляюць задзейнічаць максімум каналаў успрымання навучэнцаў.
Адным з найбольш папулярных вэб-інструментаў для стварэння мабільных віктарын, які пастаянна абнаўляецца, з’яўляецца Quizizz. Гэты маляўнічы сэрвіс з дынамічным музычным афармленнем зручны для выкарыстання на смартфонах, планшэтах і камп’ютарах, дазваляе рэгуляваць час на адказ, ствараць розныя варыянты лексічных гульняў і, як вынік, выводзіць турнірную табліцу дасягненняў кожнага вучня. Вэб-інструмент просты ў асваенні, а таксама можа выкарыстоўвацца для стварэння дамашняга задання ў фармаце гульні.
Віктарыны, створаныя з дапамогай Quizizz, рэалізуюць індывідуальны падыход да навучэнцаў, паколькі пераход паміж заданнямі ажыццяўляецца ў індывідуальным тэмпе кожнага вучня.
Не менш важнай рысай вэб-інструмента з’яўляецца магчымасць правядзення як індывідуальнай, так і каманднай гульні, дзякуючы функцыі Teammode. Пры наяўнасці праектара бягучы прагрэс гульні і, адпаведна, прагрэс кожнага вучня можна вывесці на экран, падаграваючы цікавасць да гульні. Пры адсутнасці праектара (і нават камп’ютара) гульню можна запусціць са смартфона настаўніка, з захаваннем усіх функцый, уключаючы міні-дошку бягучых дасягненняў.
Віктарыны, створаныя з дапамогай вэб-інструмента Quizizz, могуць быць выкарыстаны для адпрацоўкі і замацавання лексічнага і граматычнага матэрыялу як на ўроку, так і дома.
Прыклады віктарыны для 7 класа (Unit 3):
па тэме Present Perfect:
па тэме Present Perfect Continuous:
па тэме Clothes:
Стварэнне віктарыны
Для стварэння віктарыны неабходна рэгістрацыя на сайце https://quizizz.com. Таксама ёсць магчымасць уваходу пры дапамозе google-акаўнта. У першую чаргу патрабуецца даць назву віктарыне (пры неабходнасці яе можна будзе пазней скарэкціраваць) і ўказаць прадмет.
У наступным полі вам прапануюць два варыянты: стварыць свае пытанні ці выкарыстаць функцыю “тэлепорт” і падабраць адпаведныя вашай тэме варыянты ў вялізнай базе гатовых элементаў, створаных педагогамі раней. Quizizz пастаянна абнаўляецца, дабаўляюцца новыя варыянты стварэння пытанняў.
Пры складанні новага пытання неабходна запоўніць поле пытання і варыянты адказу ад 2 да 5. Пытанне можа быць прадстаўлена тэкстам, карцінкай, аўдыя або відэа, адказ — тэкстам ці выявай. Пры неабходнасці ў правым верхнім вуглу ёсць функцыя ўключэння некалькіх правільных варыянтаў адказу. Час адказу на пытанне можна настроіць у дыяпазоне ад 5 секунд да 15 хвілін.
Справа ад пытання, якое вы ствараеце, паказваецца, як яно будзе выглядаць на смартфоне навучэнца. Пасля стварэння пытання націскаем кнопку “Захаваць” і пераходзім да наступнага. Завяршаем віктарыну пры дапамозе Finishquiz і пераходзім непасрэдна да гульні.
У раздзеле Myquizzes выбіраем неабходную віктарыну і націскаем Livegame — Host game.
Навучэнцы на сваіх устройствах уваходзяць на https://quizizz.com або карыстаюцца аднайменным дадаткам, уводзяць гульнявы код і імя (рэгістрацыя не патрабуецца). Спіс навучэнцаў, якія ўвайшлі ў гульню, адлюстроўваецца на загрузачным экране запускаемай гульні як у настаўніка, так і ў дзяцей. Пасля гэтага настаўнік запускае віктарыну. Усе вучні атрымліваюць аднолькавыя заданні, але кожны з іх на сваім мабільным устройстве ўбачыць выпадковую паслядоўнасць пытанняў і будзе працаваць у прымальным для сябе тэмпе. Пры неабходнасці можна ўстанавіць фіксаваны парадак пытанняў.
У раздзеле “Справаздача” Quizizz прадаставіць вам даныя і статыстыку вынікаў удзельнікаў віктарыны. Там ёсць магчымасць адсочваць, колькі навучэнцаў адказалі на вашы пытанні, колькі дадзена правільных адказаў і многае іншае, а таксама спампаваць гэтую статыстыку ў выглядзе табліцы Excel. Створанай віктарынай (тэстам) можна падзяліцца па электроннай пошце і ў сацыяльных сетках.
Віктарыны, распрацаваныя з дапамогай вэб-інструмента Quizizz, можна прапаноўваць у якасці дамашняга задання. Тэрмін выканання абмяжоўваецца двума тыднямі. Для ўваходу ў дамашнюю віктарыну генерыруецца код, які навучэнцы могуць выкарыстоўваць на працягу вызначанага тэрміну.
Унікальныя асаблівасці
Сэрвіс валодае шэрагам адметных рыс, якія вылучаюць яго сярод альтэрнатыўных варыянтаў:
- Мемы-карцінкі з забаўнымі паведамленнямі. Яны адлюстроўваюцца пасля адказу на пытанне, каб паказаць, з’яўляецца ён правільным ці няправільным. Вы можаце выкарыстоўваць гатовыя выявы ці загрузіць уласныя.
- Бонусы. Правільныя пытанні даюць навучэнцам такія здольнасці, як імунітэт (другі шанс пасля няправільнага адказу), сіла (на 50% больш ачкоў за 20 секунд) і ×2 (падвоеныя ачкі за адно пытанне). Бонусы пастаянна абнаўляюцца.
- Фенікс. Гэта магчымасць паўторна адказаць на выпадковае пытанне ў канцы гульні.
Адной з апошніх навінак вэб-інструмента з’яўляецца магчымасць стварэння паўнавартасных урокаў на яго базе.
Такім чынам, выкарыстанне мабільных віктарын для ўкаранення элементаў гейміфікацыі ва ўрок — актуальны і перспектыўны напрамак. Яны дазволяць змяніць адукацыйны працэс да лепшага, захапіць школьнікаў і стварыць для іх трывалую матывацыю, дапоўніць урокі сучаснымі сродкамі прадстаўлення і апрацоўкі інфармацыі.
Вынікам выкарыстання гейміфікацыі ў вучэбным працэсе з’яўляюцца павышэнне пазнавальнай цікавасці навучэнцаў, развіццё іх творчага патэнцыялу, стварэнне асабістай вучэбнай прасторы і пабудова індывідуальных адукацыйных маршрутаў.
Таццяна ЯКУСЕВІЧ,
настаўніца англійскай мовы гімназіі № 6 Гродна.
