Класная гадзіна з «Настаўніцкай» прайшла на вясенніх канікулах для навучэнцаў гімназіі № 14 Мінска, паведамляе карэспандэнт «Настаўніцкай газеты».
У пачатку сакавіка журналісты ўжо наведвалі гэтую сталічную навучальную ўстанову і разам з педагогамі абмяркоўвалі адукацыйныя і выхаваўчыя магчымасці школьных СМІ, у прыватнасці, гімназічнай газеты «На далонях». Цяпер жа тэмай сустрэчы стала стварэнне якаснага відэакантэнту.
– Перад намі стаіць задача здымаць відэаролікі пра розныя аспекты жыцця гімназіі: прыняцце ў піянеры, уручэнне пашпартоў, удзел настаўнікаў і вучняў у алімпіядах, канферэнцыях, сустрэчах з вядомымі людзьмі. Таксама плануем асвятляць тэму ўзаемаадносін паміж аднакласнікамі, вучнямі і настаўнікамі, педагогамі і бацькамі. Таму, безумоўна, хацелася б пачуць меркаванне журналістаў нашага прафесійнага выдання, якія, як мы ведаем, не толькі цудоўна пішуць, але і здымаюць відэа, – паведаміў кіраўнік медыяцэнтра гімназіі настаўнік гісторыі Павел Манголаў.
І такія парады юныя блогеры атрымалі ад начальніка ўпраўлення вэб-рэсурсаў Святланы Грыб, начальніка цэнтра інтэрнэт-рэсурсаў Юліі Нікандравай. Сваім вопытам здымак відэасюжэтаў для YouTube-канала «Педагагічная прэса» падзялілася і вядучы карэспандэнт Святлана Нікіфарава.
У першую чаргу Святлана Грыб засяродзіла ўвагу на такіх момантах адкрыцця школьнага YouTube-канала, як выбар назвы, лагатыпа, абарона ад узлому. Ад правільнасці гэтых пачатковых крокаў у тым ліку залежыць далейшае паспяховае функцыянаванне канала. Зрабіўшы акцэнт на розных тэхнічных момантах пры рабоце ў YouTube, Святлана Грыб звярнулася да такога аспекту, як музычнае суправаджэнне ролікаў:
– Відэа з музычным суправаджэннем больш прыцягальнае. Пры выбары кампазіцыі важна ўлічваць аўтарскае права. На YouTube ёсць свая фанатэка, дзе змешчана музыка, якая не абмежавана аўтарскімі правамі. Важны этап прасоўвання роліка ў інтэрнэце – прапісванне загалоўка. Ён павінен быць ёмістым і арыгінальным. Для прыцягнення ўвагі гледачоў трэба падабраць удалую вокладку. Гэта можа быць або стоп-кадр відэа, або фотаздымак.
На думку Юліі Нікандравай, пры стварэнні відэакантэнту неабходна вызначыць мэтавую аўдыторыю гледачоў, каб правільна выбраць платформу. Калі размова ідзе пра больш афіцыйную тэматыку, то тут будзе дарэчы адкрыццё YouTube-канала, а калі кантэнт арыентаваны на вучнёўскую моладзь, добра падыдзе, напрыклад, TikTok.
Не важна, на якой платформе будзе размяшчацца відэа, галоўнае, каб яно прыцягвала гледача. Нават на афіцыйных мерапрыемствах можна зрабіць цікавыя акцэнты, зняць яркія моманты, якія будуць чапляць. На YouTube-канале «Педагагічная прэса» таксама ёсць падобныя відэа – яны набралі значную колькасць праглядаў. Напрыклад, уласны карэспандэнт па Гомельскай вобласці Алена Касьян-Паўлянкова працавала на рэспубліканскім семінары па здароўезберажэнні і зрабіла дынамічны пачатак роліка (паглядзець яго можна тут), дзе вучні і настаўнікі Светлагоршчыны дзяліліся вопытам умацавання здароўя дзяцей. Здаецца, афіцыйнае мерапрыемства, асноўную частку яго праграмы складаюць даклады, але знятыя фрагменты з выставы, прэзентацый зрабілі ролік жывым.
Закон журналістыкі – дакладнасць фактаў – актуальны і для відэаблогераў. Каб не ўзнікала непрыемных момантаў, варта правяраць правільнасць подпісу прозвішчаў спікераў, назваў устаноў адукацыі.
– Што здымаць? Мы паглядзелі навіны, змешчаныя на сайце вашай гімназіі, і хацелі б даць пэўныя парады. Напрыклад, вы наведвалі з экскурсіяй Інстытут мяса-малочнай прамысловасці. На наш погляд, адтуль можна прывезці яркія кадры пра дэгустацыю прадукцыі. Яшчэ ў вас праходзіў фестываль педагагічных класаў. Чаму б не прапанаваць яго ўдзельнікам расказаць на камеру пра свае дасягненні? Можа, хтосьці з дынастыі педагогаў – няхай падзеліцца сямейнымі гісторыямі. Знятыя на фестывалі майстар-класы пры мантажы добра перабіваць меркаваннямі вучняў, якія выбралі для сябе педагагічную прафесію, – падзялілася Святлана Грыб.
У якасці навіны, пра якую можна зняць арыгінальны ролік, яна прывяла паведамленне пра ўтварэнне Заводскага раёна Мінска, на тэрыторыі якога знаходзіцца ўстанова. Калі звесткі пра гісторыю дапоўніць кароткімі аповедамі вучняў пра любімыя месцы раёна (хтосьці катаецца на скейце, іншыя ў парку малююць і г.д.) і накласці прыгожую музыку, то можа атрымацца яскравы, шыкоўны кантэнт.
– Праз асобы вучняў, настаўнікаў варта знаёміць шырокую аўдыторыю і з традыцыямі, сённяшнім жыццём гімназіі. Чаму тыя ці іншыя настаўнікі прыйшлі ў прафесію? Як яны вучыліся ў педкаледжы або ўніверсітэце? Як змяніўся іх погляд на прафесію за гады працы? Пошук блогерамі адказаў на гэтыя пытанні мог бы стаць цудоўным сюжэтам відэа, – падзялілася Святлана Нікіфарава.
На яе думку, увагу юнага гледача прыцягваюць ролікі і на прафарыентацыйную тэматыку, тым больш што цяпер ва ўніверсітэтах і каледжах праходзяць дні адкрытых дзвярэй. Гэта можа быць погляд на прафесію як вопытных спецыялістаў, так і ўчарашніх студэнтаў, навучэнцаў.
– Несумненнай папулярнасцю карыстаюцца відэа накшталт лайфхакаў, як дзяўчатам заплятаць косы, а хлопцам, напрыклад, завязваць гальштук. Пры гэтым, калі здымаеце майстар-клас, часцей паказвайце буйныя планы, таму што асноўная мэта майстар-класа – навучыць гледача, – працягнула журналіст.
Важна звяртаць увагу на задні фон, гукавое асяроддзе, асвятленне памяшкання, у якім вядуцца здымкі, плаўнасць руху камеры… Дзясяткі парад і разгорнутыя адказы на ўсе пытанні атрымалі юнкары сталічнай гімназіі ад супрацоўнікаў Выдавецкага дома «Педагагічная прэса». Цяпер усё гэта яны будуць прымяняць на практыцы.
Ігар ГРЭЧКА
Фота аўтара
