Кожны педагог варты любові і павагі, але сёння хочацца расказаць пра настаўніцу беларускай мовы і літаратуры Святлану Варава, якая працуе ў Райцаўскай сярэдняй школе імя У.А.Галавача Карэліцкага раёна больш за 15 гадоў.
Родам Святлана Аляксандраўна з невялікай вёскі Зарэчча, што таксама ў Карэліцкім раёне. Паспяхова закончыла БДПУ.
Напэўна, значны ўплыў на выбар будучай прафесіі аказалі яе дзядуля Адам Іосіфавіч Кузьміч, які працаваў дырэктарам школы, і бабуля Ніна Рыгораўна, настаўніца рускай мовы і літаратуры. Са слоў аднавяскоўцаў, былых вучняў, гэта былі найдабрэйшай душы людзі, справядлівыя настаўнікі.
Святлана Аляксандраўна — не проста настаўнік, але і добры сябар, цікавы суразмоўнік. Яна любіць і выдатна ведае свой прадмет, на яе ўрокі дзеці ходзяць з асаблівым настроем. Настаўніца вучыць не проста атрымліваць веды, а ўмець прымяніць іх на практыцы, лагічна думаць, развіваць мысленне. Сама ж часцей за ўсё абапіраецца на жыццёвы вопыт і веды, якія пастаянна ўдасканальвае з дапамогай метадычнай літаратуры, інтэрнэту.
Для яе ўласцівы высокая эрудыцыя, імкненне да творчасці і самаўдасканалення, аб’ектыўная ацэнка сваёй дзейнасці. Настаўніца ўдала вырашае метадычныя праблемы, што ўзнікаюць, выпрацоўвае свой педагагічны почырк, выкарыстоўвае найбольш прагрэсіўныя і эфектыўныя формы, метады і прыёмы. Дарэчы, некаторыя выпускнікі нашай школы пайшлі па шляху сваёй настаўніцы — сталі педагогамі.
Неабходна дадаць і тое, што кабінет беларускай мовы, якім загадвае Святлана Аляксандраўна, уяўляе сабой своеасаблівую творчую майстэрню, дзе сабраны і сістэматызаваны багаты дыдактычны і метадычны матэрыял. Настаўніца таксама праводзіць значную пазакласную работу па прадмеце, займаецца разам з вучнямі навукова-даследчай дзейнасцю. Распрацоўкі яе ўрокаў змешчаны на педагагічным партале Рэспублікі Беларусь, на сайце адзінага інфармацыйна-адукацыйнага рэсурсу. Сёлета Святлана Аляксандраўна ўключана ў склад рэспубліканскай доследнай праверкі вучэбных дапаможнікаў.
Настаўніца мае вышэйшую кваліфікацыйную катэгорыю, яе педагагічная праца неаднаразова была адзначана граматамі галоўнага ўпраўлення адукацыі Гродзенскага аблвыканкама, аддзела адукацыі Карэліцкага райвыканкама.
Антаніна МЯЛЕШКА,
намеснік дырэктара Райцаўскай сярэдняй школы імя У.А.Галавача
